B&B Henriquez

Dr. Leo King

2012-01-02T11:44:00.000-08:00

Ruman Leo,
Nos kier felicita Leo y Leo su esposa y yiunan awe! Nos ta desea boso un Felis Anja Nobo den Senjor - cu tur Su bendishonnan abundante! Nos kier bisa danki na Leo pa sigui nos BLOGNAN dor di e anjanan ku nos ta skirbiendo. Nos ta drentando nos e di seis anja den e ministerio aki. Mas ku 2500 hende a bishita nos blog y esey ta enckurasha nos pa sigui. Pues, pasa un Felis Anja Nobo!! di "Pachi y Betty"

E BERDAT TA HASI NOS LIBER - Huan 8:31.32

2012-01-02T11:37:00.000-08:00

Awe ku nos ta skirbiendo e mensahe aki, ya nos tin dia 2 di Januari di aña 2012. Problemente ya hopi di nos a èksperimentá, ku apesar di tur e bon deseonan ku nos a risibí di nos amigonan i konosínan; ya nos a realisá ku nos tin e mes un debilidatnan ku nos tabatin den e aña ku a pasa.
Amigonan di tur edat, e Palabra di Dios ta rebelá na nos masha kla mes i ku hopi énfasis e motibu i e kousa di nos frakasonan, i e úniku poder ku por libra nos, y hasi nos liber.

Pa kuminsá: e problema aki di piká ta algu universal. I esaki a kuminsá ku e prome persona ku Señor, nos Dios a crea, esta Adam. Asina pronto cu Adam a desobedesé Dios piká a drenta i a kuminsá reina i morto tambe a reina. (Lesa 1 Cor. 15:20-28)

Pues, ta pa e motibu ei nos deseonan i asta promesanan di aña nobo, ta frakasá masha lihe. Nos ta purba lapi e hende bieu ku nos bon deseonan, pero separá di Kristo e naturalesa pekaminoso lo sigui viktorioso. Te ora ku nos yega na e lugar unda nos lo sklama meskos ku e Apòstel Pablo a skirbi den Romanonan kapítulo shete. (Lesa Rom. 7:7-25)
Den e versíkulonan 21-25, e ta bisa nos lo siguiente: “Asina mi ta deskubrí e lei aki: Ora mi ta deseá di hasi loke ta bon, maldat ta presente den mi. Pasobra segun e hende interior mi ta deleitá mi mes den lei di Dios, ma den e miembronan di mi kurpa mi ta mira un otro lei ku ta batayá kontra e lei di mi mente i ta hasi mi un prisonero di e lei di piká kual ta aktivo den mi miembonan. Ki un hende miserabel mi ta!

Kende ta libra mi di e kurpa di morto aki? Danki sea na Dios, dor di Hesu-Kristo, nos Señor! Pues, ami mes den mi mente ta un esklabu na e lei di Dios, pero den mi naturalesa pekaminoso, un esklabu na e lei di piká.”
Asina anto, amigonan stimá, e kontesta pa nos lucha kontra piká ta: FE den Esun Kende a karga nos pikánan den Su kurpa ariba e krus, pa nos librá di piká por biba pa hustisia. Bicento i Betty Henriquez

Aña Nobo

2012-01-01T07:27:00.000-08:00

Awe cu nos ta scirbiendo e mensahe aki, ta e prome dia di aña 2012. Como custumbra nos ta desea un y otro tur loke ta bon y agradabel, etc., etc. Pero un dia tin solamente 24 ora, y pronto nos lo experimenta e mes un rutinanan diario. E lo ta bon pa cada uno di nos scrudiña nos mes y mira kico nos por siña for di nos erornan of nos logronan. Si nos mira bon, nos lo mira con, instiga pa algun lider, hopi hende kier mira cambionan pa e future cercano. Pa sea franco, e tendencia ey a existi semper. Y no solamente den e Islanan aki, ma tambe den e nacionnan grandi.
P’esey nos ta encurasha tur hende cu lesa e mensahe cortico aki, pa habri bo Beibel y lesa, y pidi Dios Su yudansa pa por comprende y pa obedece. Scritura Santo ta spierta nos hopi adelanta tocante e situacion cu lo tin ariba mundo den e ultimo dianan aki.

Pero tambe Scritura ta presenta na nos, e unico fuente di victoria pa nos mes y pa nos yiunan. Y e unico fuente di victoria ta e Yiu di Dios cu ta Jesus, Kende ta libra nos di e rabia di Dios cu ta bini.

Y nos ta laga e versiculo aki pa tur e almanan precioso den e Islanan aki, cu ta: Hebreonan 13:8 “JesuCristo ta mescos ayera y awe y pa semper.”

FELISIDAT DI ANA NOBO

2011-12-30T06:36:00.000-08:00

Di akuerdo ku kustumbra i tradishon, semper nos ta desea un i otro un Bon Aña yen di felisidat na e prinsipio di kada aña. I sin luga na duda, esei ta un bon deseo i un bon kustumbra. P’esei e lo ta bon pa cada uno di nos stòp un rato, i eksaminá nos mes tokante e asuntu ei, i puntra nos mes tokante e asunto ey di felisidat.
Mi tabata felis durante e aña cu a pasa? Mi famia kompletu tabata felis durante e aña ku a pasa? Manera nos tur sabi, basta hende a muri durante e aña aki. Y kada un di esunnan ku a muri, tin nan famianan. Y esunnan ku a muri ta di varios edat. P’esei kada uno di nos mester eksaminá su mes tokante e fakto aki di morto.
Kiko Skritura ta bisa nos tokante di morto? Beibel ta bisa nos masha cla mes, ku ta establesí pa hende muri, I despues di esei ta sigui huisio. Pa hasi e mensahe aki kòrto, nos ta konkluí ku e bon notisia tokante felisidat di Aña Nobo pa Aruba, Kòrsòw i Boneiru. REPENTIMENTO DI PIKA, y fe den nos Señor i Salbador JesuKristo; ta e úniko fuente sigur di berdaderu felisidat awor i pa semper. P’esei: Kere den Señor Jesus, i lo bo ta salbá, abo i e hendenan di bo cas.
B&B Henriquez

SEGURO DI BIDA

2011-10-26T13:14:00.000-07:00

Nos ta bibando den un periodo di tempo cu hopi enfasis ta wordo duna na SEGURONAN. Seguro pa cas, pa auto, pa enfermedad, pa biahamento, etc., etc; y te hasta seguro pa morto.

Mi no ta bisa cu e seguridadnan ey ta malo. No, y no; pasobra cada uno di nan tin su balor propio. Ma e loke, sí, nos kier adverti tur hende, ta e peliger masha masha grandi mes pa cada uno di nos den e Islanan aki, y na cualke otro lugar den e mundo; y e peliger cu nos ta spierta tur hende di dje ta: E peliger di ta sigura cu tur forma di seguro, te asta seguro di morto, pero no ta SIGURA pa DESPUES DI MORTO.

Tur otro forma di seguro ta termina pa nos ora cu nos muri. Pero tin UN SEGURO cu ta continua pa semper, pa tur eternidad. Realmente e ta wordo yama: “BIDA ETERNO”. Ta pa e autoridad di e Autor di e Bida Eterno aki, nos ta scirbi e mensahe aki: Y e Autor di e bida aki, ta Dios, nos Tata Celestial, pa medio di Su Unico Yiu, nos Señor y Salbaor JesuCristo. Corda e Scritura mundialmente conoci cu ta bisa: “Pasobra Dios a stima mundo asina tanto, cu El a duna Su unico Yiu; pa tur cu kere den djE, no bai perdo, ma haya bida eterno. Pasobra Dios no a manda Su Yiu den mundo pa condena e mundo, ma pa mundo wordo salba dor di djE. Esun cu kere den djE no ta condena; esun cu no ta kere den djE ta condena caba, pasobra e no ta kere den e nomber di e unico Yiu di Dios.” Lesa cu calma y oracion den bo curason Juan 3:16-21.

Bolbiendo awor na e tema SEGURO DI BIDA, ya mi a declara caba, y mi ta repiti, nos no ta conta seguronan. Pero, e berdad ta keda cu ta pa e bida corto aki so eseynan ta sirbi, y ademas nan ta masha limita. Y no esey so, pero semper tin un preis cu nos mester contribui. Ma ora nos ta papiando di seguridad di Bida Eterno, nos ta papiando di e loke Señor nos Dios ta ofrece na nos sin placa y sin preis. Beibel ta papiando di e gracia di Dios, y e misericordia y amor di Dios pa nos pecador.
Ora cu Beibel ta bisa nos cu Dios a stima mundo, etc., e no ta nifica cu Dios a stima e bon hendenan, of cierto rasa, etc., etc. Pero e ta nifica cu Dios a stima humanidad asina tanto, etc., etc. Y esey ta inclui cada persona den e tres Islanan aki, y mescos pa henter mundo. P’esey nos por y kier bisa na cada persona cu ta lesa e mensahe aki, Dios ta stima bo, y ta ofrece bo Bida Eterno dor di kere den Su unico Yiu, kende a carga nos picanan den Su curpa ariba e crus.

Nos por comprende anto, cu ta nos picanan a causa e morto di nos Señor. Pero E no a keda den graf, morto no a triunfa ariba djE. Pasobra E nunca a comete un pica, y ni un mintira a wordo haya den Su boca. Awor Señor nos Dios y Tata Celestial sperando cu pasenshi pa cada persona na tur parti por repenti y kere e Bon Noticia di pordon di tur nos picanan, y Bida eterno pa medio nos fe personal den e Yiu di Dios, Kende a stima nos y a entrega Su mes pa nos. No sigui rechasa y resisti contra e amor di Dios den Cristo. Pasobra ta awe y awor ta e Dia di Salbacion. Di mañan nos no sabi nada.

FOTONAN SACA NA BONAIRE

2011-10-16T12:50:00.000-07:00

Dia 16 di November, ta e fecha cu Dr. Haime a pone pa opera mi heup banda robes; mi tin un anja di dolor y dificultad den camnamento. Tur dos heup mester wordo reemplasa y mi tin simannan largo mi dilanti pa ehersita, si Dios Su boluntad ta pa mi pasa dor di esaki. Aki ya mi ta ehersitando nan den un zwempul na Bonaire. Y hunto nos ta wak un bunita regenbog - un promesa di Dios den e cielonan! Ki balor hende su salud ta - e ta baloroso manera ora ma TIN COS MAS BALOROSO AINDA -- lesa y lo bo haya sa kico ta:

MAS BALOR CU ORO Ta parce cu den e ultimo dianan aki, e balor di oro ta aumentando. Y personanan cu vision pa e sorto di cosnan aki, ta ofrece bon preis pa articulonan di oro, cu ken por tin, por haya pa nan. Realmente oro semper tabatin balor, y mas tanto ta e riconan tabata montana oro pa nan mes, pa despues cu nan muri, nan laga pa otronan cu kisas no a traha p’e.

Pero awe mediante e mensahe breve aki, nos lo trece padilanti e loke tin mucho mas balor cu oro, na cada persona den e Islanan aki. Y Esun cu ta ofrece esaki na nos, ta e Todopoderoso Kende a Crea e Universo, cu ta inclui mundo cu tur loke tin den dje.

Nos ta encurasha cada persona cu lesa e mensahe aki, pa bo lesa e prome carta scirbi door di e Apostel Pedro cual ta solamente 5 capitulo yen di bendicionnan spiritual cualnan ta ofreci na cada uno di nos di puro gracia. Den Capitulo uno y cuminsando cu e versiculo diestres, e ta bisa lo siguiente na e personanan cu a kere e Evangelio den e diferente lugarnan unda nan a wordo plama. “P’esey, prepara boso mente pa accion; controla boso mes, y pone boso speransa completo ariba e gracia cu lo ta duna na boso ora JesuCristo ta revela. Como yiunan obedecido, no conforma na e mal deseonan cu boso tabatin, tempo cu boso tabata biba den ignorancia. Ma mescos cu Esun Kende a yama boso ta santo, asina sea santo den tur loke boso haci. Pasobra ta scirbi: Sea santo, pasobra Ami ta Santo.” Anto e ta sigui bisando: “Pasobra boso sabi cu no ta cu cosnan cu por daña manera plata y oro cu boso a wordo redimi for di boso manera bano di biba cu boso a ereda di boso antepasadonan; ma cu e sanger precioso di Cristo, manera un Lamchi sin mancha y sin defecto. E tabata scogi prome cu e creacion di mundo, pero tabata revela den e temponan aki pa boso motibo. Ta pa medio di djE boso a kere den Dios, Kende a lant’E for di e mortonan, y a glorifik’E, y asina boso fe y speransa ta den Dios”. Lesa 1 Pedro 1:13-25. Y si bo no por, pidi un otro persona lesa e Scritura aki pa bo.

Pone bon atencion na unda e ta bisa nos, cu nos fe ta mas precioso cu oro! E fe menciona aki ta fe personal y idividual den Cristo nos Señor. Y e ta bisa hopi cla, cu ta nos fe den Cristo ta wordo poni na prueba. P’esey manera e ta bisa nos na otro lugar: Examina boso mes si boso ta den e fe. Lesa 2 Corintionan 13:5.

Esaki Amigonan, stima di nos Tata Celestial, ta e fe cu su balor ta mas cu oro.

E IGLESIA

2011-09-13T11:51:00.000-07:00

Aruba tin lugarnan masha bunita y diferente! Aki nos ta maraviya e formacion di e piedranan aki banda di Alto Vista.

Den e Buki di Mateo 16: 13-20, nos por lesa lo siguiente: Ora Hesus a bin den e distrito di Cesarea di Felípo, El a puntra Su disípelnan bisando: “Ta ken e hendenan ta bisa ku e Yiu di Hende ta?” I nan a kontestá: “Algun ta bisa Huan Boutista; otronan, Elias, i otronan Heremías, òf un di e profétanan.” El a bisa nan: “Ma ta ken boso ta bisa ku Ami ta?”

Simon Pedro a kontestá i a bisa: “Abo ta e Kristo, Yiu di e Dios bibu!” I Hesus a kontestá i a bis’e: “Bendishoná bo ta, Simon, yiu di Jonas, pasobra no ta karni i sanger a revelá esaki na bo, sino Mi Tata ku ta den shelu. I tambe Mi ta bisa bo, ku abo ta Pedro, i ariba e baranka aki lo Mi traha Mi Iglesia, i e portanan di fièrno (Hades) lo no triunfá ariba dje. Lo Mi duna bo e yabinan di e reino di shelu, i tur loke bo mara ariba tera, lo ta mará den shelu, i tur loke bo lòs ariba tera lo ta gelòs den shelu. E ora ei, El a prohibí e disípelnan pa nan no bisa ningun hende ku E ta e Kristo.” (Beibel Santo)

Amigonan stimá pa Señor Su mes, e porshon di Skritura aki no ta pa e tres islanan aki solamente, ma nan a wòrdu skirbí pa tur hende di tur nashon sin eksepshon di rasa òf kolor. Pone atenshon ku Señor Hesus no a bisa: “Mi Iglesianan, sino: “Mi Iglesia”. I esei ta bisa nos bon kla ku ta un Iglesia solamente tin, I su miembronan ta plamá den henter mundu, inkluiendo den e tres islanan aki di abla Papiamentu. Lástima ku e porshon aki di Skritura a wòrdu mal interpretá I a kousa hopi divishon den mundu te ariba e dia di awe. Pa e motibo ei nos no ta bai deskutí tokante religionnan i ni tampoko tokante Iglesianan den e mensahe kòrto aki. Manera ya nos a menshoná Señor Hesus no a menshoná Mi Iglesianan, sino Mi Iglesia ku ta uno. Y e kabes di e Iglesia aki no ta ni Pedro, ni Pablo, ni Huan, sino JesuKristo, e Yiu di Dios Su mes.

E Apòstel Pablo ta bisa nos lo siguiente: “Segun e grasia di Dios ku a wòrdu duna na mi, mi a pone e fundeshi manera un arkitekto sabí, i un otro ta trahando ariba dje.Ma laga kada hende tene kuidou kon e ta traha ariba dje. Pasobra ningun hende no por pone otro fundeshi ku esun ku ta poní kaba, kual ta JesuKristo”, etc. Lesa 1 Cor. 3:10-23 (Por fabor, les’e)

Meskos ku Kristo ta e fundeshi di e Iglesia, E ta tambe e kabes di e Iglesia. Den e karta skirbí na e Efesionan: “Sea sumiso na boso esposo, manera na Señor. Pasobra e esposo ta kabes di e esposa, meskos ku Kristo ta e kabes di e Iglesia. E mes siendo Salbador di e Kurpa”. Efesionan 5:22,23. Lesa tambe Kolesensenan 1:12-20. Pa fabor lesa esaki tambe sin falta.
Nos ta konkluí ku un spiertamentu solemne na kada uno ku tuma tempo pa lesa e mensahe kòrto aki: For di kuminsamentu kaba nos a menshoná ku Kristo ta e Kabes di e Iglesia, i no di e Iglesianan. Ta berdat ku Iglesianan ta menshoná den e Buki di Rebelashon. Pero nos mester komprendé ku aki nos tin di hasi ku rumannan den Kristo ku ta reuní huntu den e diferente lugarnan ku ta menshoná. Ma e spiertamento solemne ku mi ta duna na tur e kongregashonnan di Aruba, Bonaire i Curaçao ta esaki: E ta peligrósamente posibel pa un persona ta miembro den un òf otro kongregashon ku ta wòrdu yamá Iglesia, ma sinembargo no ta un miembro den “E Iglesia”. Si bo tin observashon, anto papia ku bo pastor òf un ruman di konfiansa, òf bo por skirbi nos na e direkshon aki: cjwmitesoro@gmail.com

2011-09-01T08:10:00.000-07:00

E foto aki a wordo saca dilanti e cas di mi sobrino Wayne, y su esposa Bonnie, cu ta biba na Canada. El a haci mi corda awe di e Scritura na Salmo 42, unda e Salmista David tabatin sedu pa Dios, y el a scirbi lo siguiente: "Manera e bina ta anhela pa e riunan di awa, asina mi alma ta anhela pa Bo, O Dios. My alma tin sedu pa Dios, pa e Dios bibo."

CUA TA E FE CU TA SALBA?Beibel ta bisa nos hopi cla, cu sin fe ta imposibel pa hende agrada Dios, pasobra kende cu bini serca djE, mester kere cu E ta exsisti y cu E ta recompensa esunnan cu seriamente ta busk’E. (Hebreonan 11:6)

Awe cu nos ta scirbi esaki, nos tin Beibel habri nos dilanti cu ta splica nos tur loke tin di haci cu fe. For di hopi añanan pasa mi a tende menciona e palabra ey cu yama “FE”. Pero ta te na e edad di binti y tres aña, mi a tende pa prome bes di e fe cu ta segun Scritura Santo. Berdad; nos tabata resa e Credo cu ta bisa: “Mi ta kere den Dios Tata Todopoderoso y den Su Yiu nos Señor” etc., etc. Pero pa e mayoria di nos cu ta hasi esey, e ta solamente un repeticion di palabranan religioso cualnan nos ta repeti bes tras bes cu nos boca mientras cu nos curason ta leu di Dios.
Pues, mi no ta bisa cu e palabranan “mi ta kere den Dios e Tata” ta robes, ma e problema ta, ora cu nos ta bisa esey cu nos boca solamente, mientras cu nos curason ta leu di Dios.

Laga nos mira loke Scritura ta bisa na tur hende di mundo. Y ta claro cu esey ta inclui e tres islanan aki, mescos cu e resto di humanidad.
Den e carta cu e Apostel Pablo a scirbi na e keredornan cu tabata biba na Roma, el a bisa lo siguiente: “Kico nos lo conclui anto? Ya nos a culpa Judiunan y Gentilnan mescos, cu tur ta bou di pica. Manera ta scirbi: No tin ni un husto, ni sikiera uno; no tin ni uno cu ta comprende, ni uno cu ta busca Dios. Tur a desvia, hunto nan a bira inutil; no tin ni uno cu ta hasi bon, ni sikiera uno. Nan garganta ta grafnan habri; nan lenga ta practica mintira. Veneno di colebra ta ariba nan lipnan. Nan boca ta yen di maldicion y amargura. Nan pia ta lihe pa drama sanger; ruina y miseria ta marca nan pasonan, y e camina di pas nan no conoce. No tin temor di Dios dilanti nan wowonan. Awor nos sabi cu tur loke e ley ta bisa, e ta bisa na esunnan cu ta bou di e ley, asina cu tur boca por wordo cera, y henter mundo conta como culpable pa cu Dios. (Mira Romanonan 3:9-20).

Amigonan di tur edad, kisas algun por puntra siendo cu wardamento di Ley no ta scapa ningun persona di e castigo eterno; pakico anto e Ley a wordo duna?

Mi ta encurasha tur alma precioso cu ta lesa e mensahe aki pa lesa e carta scirbi na e Romanonan, y e carta na e Galationan, y esun scirbi na e Hebreonan. Den e Scrituranan ey, nos por siña masha hopi e pakico di e Ley, e proposito di e Ley, y e cumplimento di e Ley. Segun e Scrituranan ey, e Ley ariba su mes ta santo y husto y bon. Ademas e Ley a wordo duna pa motibo di faltamento of transgreshon, pero no pa duna bida. (Galationan 3:19)

E pregunta awor por ta: Ta cua ta e fe anto cu ta salba? E contesta cla y sigur di Scritura ta: e fe cu ta salba nos, ta e fe cu ta bini via tendemento di e Palabra di Dios. Den e carta scirbi na e Romanonan, nos ta lesa lo siguiente: “E palabra ta cerca di bo; e ta den bo boca y den bo curason, esey ta e palabra di fe cu nos ta proclamando. Cu si bo confesa cu bo boca Jesus ta Señor, y kere den bo curason cu Dios a lant’E for di morto, bo lo ta salba. Pasobra e ta cu bo curason cu bo ta kere y ta hustifica, y e ta cu bo boca cu bo ta confesa y ta salba. Manera Scritura ta bisa: Tur cu confia den djE, nunca lo wordo poni na berguensa. Pasobra no tin diferencia meimei Judiu y Gentilnan, e mes Señor ta Señor di tur, y ta bendiciona ricamente tur cu invoca of yama na nE. Pasobra tur cu yama na e Nomber di Señor, lo ta salba.

Esakinan, Amigonan Stima di Dios Su mes, ta e contesta na e pregunta: Cua ta e fe cu ta salba?

Nos biaha pa Boneiro

2011-08-03T12:55:00.001-07:00

Esaki ta un foto di Bicento y ami banda di un "swimming pool" pega cu nos camber: sali for di e porta di camber strait pa e pool! Nos tabata keda tres dia cerca nos amigonan Alan y Jane (Townsend) Gross - Americanonan cu ta ya ta biba na Bonaire pa hopi anjanan mes!

UN MEDIADOR

2011-08-03T12:48:00.000-07:00

Den Beibel e Apostel Pablo ta bisa nos cu Señor, nos Dios, kier pa tur hende wordo salba, y bini na conocemento di e berdad. “Pasobra ta un Dios tin y un Mediador meimei Dios y hende, e hende Cristo Jesus, Kende a duna Su mes como un preis di rescate pa tur hende – e testimonio duna den Su tempo apropia. Y pa e proposito aki mi a wordo apunta como predicador y Apostel, mi ta bisando e berdad, mi no ta gaña – y como siñador di e fe berdadero na e paganonan.” 1 Tim. 2:1-7 (NIV)

Rumannan y amigonan stima, pa nos Tata Celestial Su mes, e berdadnan menciona aki pa e Apostel Pablo, guia pa e Spirito Santo ta keda mescos te awe. Mescos cu tin solamente un Dios y Tata, mescos tin solamente un Mediador meimei hende y Dios. Tuma tempo pa lesa e siguiente Scrituranan aki: Juan 17:3 y Rom. 3:29,30 y 1 Cor. 8:4-6, Efe. 4:4-6 y 1 Tes. 1:1-10.) Lesa eseynan relaciona tocante e doctrina den Beibel tocante un Dios solamente. Y mes importante cu e doctrina segun Scritura Santo tocante Dios e Tata ta; mes importante e doctrina di un Mediador meimei hende y Dios ta.

Mescos cu no ta existi un otro Dios, mescos no ta existi un otro Mediador mei mei hende y e unico Dios. O cu Señor lo bendiciona e tres islanan aki pa nos comprende y obedece e Evangelio di Dios y di Cristo di henter nos curason. Nos mester repenti, cada uno di nos, y pone nos fe den Esun cu e Tata a manda den mundo pa busca y salba pa nos por wordo libra , rescata, salba for di nos picanan. Ta imposibel pa nos describe of splica e preis cu a wordo paga pa nos tur. Ta simplemente imposibel pa nos comprende con nos Señor Jesus a carga e picanan di henter humanidad den Su curpa ariba e crus; pa nos libra di picanan por biba awor pa husticia. Pasobra ta pa medio di Su heridanan nos a wordo cura. Siendo cu Scritura ta masha cla mes tocante e berdad cu Cristo ta e Unico Mediador meimei nos y e Tata; con por ta posibel cu den e tres islanan aki tin asina tanto otro mediadornan den cualnan nos ta confia?

For di chikito ami mescos cu otronan a confia den otro mediadornan. Antes mas cu awo, ora cu un baby ta nace den e islanan aki, nos mayornan tabata scohe nomber di un of otro persona cu nan ta considera como un Santo, pa sea manera un mediador pa e baby recien naci. Pa e motibo ey, principlamente tabatin masha hopi hende cu e nomber di Maria, y Filomena, y Jose, etc., etc., den e islanan aki. Cu tur respet pa cualke di e personanan aki, ma e berdad ta, cu ta UN MEDIADOR so tin meimei hende y Dios. E nomber di e Mediador ey ta: JESUS, e Yiu di Dios. Tur otro nomber cu a bini den e mundo aki desde Adam te na e ultimo persona cu lo nace, tin mester di e Jesus aki, Kende a muri y resucita pa cada uno di nos.

Si bo cu ta lesando e mensahe corto aki, te ainda ta confiando den un otro mediador, anto repenti awe y acepta cu henter bo curason Señor Jesus, como bo unico y suficiente Salbador. Pasobra no tin otro nomber duna na hende pa medio di cual nos por wordo salba.

E DIA DI HUICIO - continua

2011-07-05T06:42:00.000-07:00

E mucha cu ta piscando ta un RATZLAFF di e di 5 GENERACION - continuando cu e tradicion cu ta yama: "Ratzlaff Fishing!!"

Practicamente tur dia nos por lesa den medionan di comunicacion, di un of otro persona cu a fayese of sea cu a muri. Segun Scritura Santo cu ta e Palabra di Dios, tur e almanan aki lo resucita na e final di historia humano, pa nan wordo huzga pa Esun sinta ariba e gran trono blanco cu ta scirbi den e Buki di Rebelacion 20:11-14.

Aki nos ta lesa cu e bukinan a wordo habri, y esey ta indica cu tabatin bukinan. Y e no ta bisa cuanto, pero simplemente e bukinan. Anto e ta sigui bisando: Un otro buki a wordo habri cual ta e Buki di bida. Aki nos tin di haci cu un buki solamente, y e ta wordo yama claramente: “E buki di Bida”. Y den Rebelacion 13:8, y 21:27, e ta wordo yama, “E buki di bida di e Lamchi.” Aki e Lamchi ta nos Señor y Salbador JesuCristo, Kende a carga e picanan di nos tur den Su curpa ariba e crus, pa nos libra di picanan por biba pa husticia. Pasobra ta pa medio di Su heridanan (nos) a wordo cura. Pasobra (nos) tabata manera carne cu ta dual, pero awor (nos) a bolbe na e Wardador y Cuidador di (nos) almanan. Lesa 1 Pedro 2:21-25. Algun hende por tin e pregunta: “Pakico nos Señor ta wordo yama “E Lamchi”? E contesta ta masha cla den Scritura cuminsando for di e Buki di Genesis capitulo cuater. Aki nos ta lesa cu Abel a ofrece un ofrenda na Dios for di e prome naci di su rebaño of tao di bestia chikito. Mientras cu Cain a trece algun frutanan di e tera como ofrenda na e Señor. Anto Señor a aprecia e ofrenda di Abel, pero Señor no a acepta Cain y su ofrenda. Lesa tocante esaki den e Buki di Rebelacion captiulo cuater.

Mas despues cu hende a multiplica despues di e deluvio, e Ley a drenta den e tempo di Moises. Y tambe e ley di sacrificionan pa pica cu tur su reglanan, etc., etc. Pa un bon comprendemento di e tema aki tocante Cristo como e Lamchi di Dios cu ta kita pica di mundo, lesa sin falta e Buki di Hebreonan. Den e buki ey, nos por mira claramente cu e sacrificio di nos Señor JesuCristo, Kende a muri ariba un crus, ta e unico sacrificio acepta pa Dios e Tata pa pordon di picanan di cada persona cu repenti di su picanan, y acepta Señor Jesus personalmente como su Salbador y Señor.

Scritura ta hopi cla tocante e doctrina aki di pordon y bida eterno. Manera e Apostel Pedro ta bisa na e lidernan religioso den Echunan 4:12: “No tin salbacion den ningun otro, pasobra no tin otro nomber bou di cielo duna na hende pa medio di cual nos mester ta salba.” P’esey amigonan di tur edad di henter Antiyas. Sea sigur y masha sigur cu separa di fe personal den Cristo pa pordon di tur nos picanan y bida eterno, no ta existi den nada otro, y den ningún otro. Lesa 2 Pedro 3:8,9.

2011-06-25T14:48:00.000-07:00

Den Ken y kico bo FE ta ankra?
E DIA DI HUICIO
Segun Scritura Santo, na final di e sistema den cual nos ta bibando actualmente ya pa miles di añanan, lo tin un dia di huicio, of sea, un dia di huzgamento. Y esey lo ta asina leu cu nos por comprende, pa tur ser humano cu a biba ariba e planeta aki, desde Adam te na e ultimo persona cu lo nace.
E Buki di Rebelacion, Capitulo binti, tin un descripcion hopi cla tocante e dia ey. Ey nos por lesa lo siguiente: ( y laga nos sea sigur cu e tempo ey lo yega) Y esaki ta loke e Apostel Juan a scirbi di loke Señor Dios a revela na n’e, e futuro y e final di historia humano ariba e mundo actual: “Y mi a mira un gran trono blanco, y Esun cu tabata ariba dje, pa Kende Su presencia tera y cielo a hui, y no tabatin lugar pa nan. Y mi a mira e mortonan, grandi y chikito, para dilanti di e trono, e bukinan a wordo habri. Un otro buki a wordo habri, cual ta e buki di bida. E mortonan a wordo huzga di acuerdo cu loke nan a haci, manera tabata scirbi den e bukinan. E laman a entrega e mortonan cu tabata den dje, y morto y hades a entrega e mortonan cu tabata den nan, y cada persona tabata huzga di acuerdo cu loke el a haci. Anto morto y hades a wordo tira den e tanki di candela. E lago di candela ta e di dos morto. Y si un hende su nomber no a wordo haya scirbi den e buki di bida, e tabata tira den e tanki di candela.” (Rebelacion 20:11-15).
Claramente amigo y amiganan di tur edad, e cosnan aki a wordo scirbi pa cada uno di nos, sea homber of mohe fo’i tur nacion sin excepcion. Y e proposito pa cual Señor a rebela e berdadnan aki pa nos, ta pa nos repenti y kere e Evangelio di nos Señor y Salbador JesuCristo. Si nos haci menos caso, of sea nos ignora e spiertamento sagrado aki, ta nifica cu nos ta bira lomba pa tur e bendicionnan spiritual di cielo cu lo ta pa tur eternidad; pa nos enfrenta y sigui biba un bida cu nunca a, y no por duna berdadero felicidad. Bashi nos a bini den mundo, y bashi nos lo bai den graf.
Pero pa esunnan cu tende y obedece e Evangelio bendiciona di Dios, nos ta lesa den e Palabra di Dios lo siguiente: “Loke cu wowo no a mira, ni orea a tende, ni a drenta curason di hende, ta loke Dios a prepara pa esunnan c u ta stim’E. Pero na nos, (cu ta kere) Dios a revela nan pa medio di Su Spirito. Pasobra e Spirito ta envestiga tur cos, asta e profundidadnan di Dios.” (Lesa 1 Corintionan 2:6-16 sin falta)

NEGLIGENCIA

2011-06-12T07:08:00.000-07:00

Un di e plasernan grandi cu nos tin ta di subi nos auto y keiro den e espacionan rond di nos bunita isla Aruba y explora, esdici, mira loke ainda nos no a mira, y admira e grandesa di Dios, E Tata Eterno Kende a crea e mundo, door di Senjor JesuCristo Su Yiu. (Hebreonan 1:1-3)

Bicento ta gusta cana wak p'aki y p'aya y "peep" den e buraconan cu naturalesa y creacion a forma den e barancanan! " Tene Cuidou! Por tin un Boa di Aruba ta scondi den un di e buraconan ey!"

AWOR, pa loke Palabra di Dios ta bisa tocante: NEGLIGENCIA

Nos tabatin algun mensahe na unda nos a enfatisa e doctrina di fe. Y nos por sigui hopi mas tocante e doctrina ey, pasobra tur otro siñansa fundamental ta mara na e fe. Separa di fe den nos Señor y Salbador JesuCristo, ta impusibel pa nos agrada Dios. P’esey awe nos lo papia tocante negligencia.
Den Hebreonan 2:1-3, nos por lesa lo siguiente: “P’esey nos mester paga mas atencion cuidadoso na e loke nos a tende pa nos no drief y pasa bai. Pasobra si e mensahe papia door di Angelnan a keda firme, y tur violacion y desobediencia a ricibi su castigo husto; con nos lo scapa si nos neglisha (of ignora) un salbacion asina grandi?”
Amigonan stima pa nos Tata Celestial, y pa JesuCristo Kende a duna Su mes boluntariamente pa libra nos di picanan mediante Su morto ariba un crus. Ta na nos cu ta na bida awe e spiertamento serio ey ta dirigi.
Masha hopi hende aki den Antiyas y Aruba, a tende e Evangelio bes tras bes. Corda bon cu e palabra “Evangelio”, ta nifica Bon Nobo, of Bon Noticia. Y e bon noticia ta, cu nos por ricibi pordon di tur pica, si nos repenti y acepta e Yiu di Dios como nos único Salbador. Awor: Kico negligencia of ignora ke men? Realmente tur dia nos por experimenta e nificacion di e palabranan ey. Na e momento aki mes cu mi ta scirbiendo e mensahe aki, mi esposa ta ocupa den cushina cu hasimento di cuminda. Anto e ta cende e stove y ta pone un wea cu sea pisca of carni of algo otro. Pero kico lo pasa si e bai hasi otro trabao y neglisha e wea cu ta riba candela? Wel, nos tur por tin un idea di kico lo pasa despues di un poco tempo. E cuminda lo bira carbon den e wea, etc., etc. Ma esey ta algo cu pronto por wordo regla door di cumpra otro wea y otro alimento.
PERO, relaciona cu e Evangelio bendiciona di nos Señor, nos ta lesa lo siguiente den Scritura Santo: “Con nos lo scapa si nos neglisha un salbacion asina grandi?” E mensahe y e spiertamento cu nos ta ricibi den e declaración ey ta: “cu no tin scapatorio.” Durante e corto tempo cu mi a biba, mi a tende tocante otro oportunidad despues di morto. Asta nos a wordo siña cu tin un lugar purgatorio, na unda un persona cu muri cu picanan sin confesa, e lo tin cu pasa un tempo den e candela di purgatorio te ora cu el a wordo purifica di tur su picanan. E siñansa ey no ta existi den Beibel, y ademas e ta contradici e Evangelio di gracia di Dios. E siñansa cla y persistente den e Palabra di Dios ta: Cu cualke persona cu tende e mensahe di pordon y bida eterno cu ta solamente den nos Señor y Salbador JesuCristo. Y esun cu tende siendo convenci dor di e Spirito Santo di Dios. Y e persona aki, ken cu e por ta, lo admiti cu e ta un pecador perdi.
Anto e ta repenti di su picanan, y e ta pone su fe absoluto y completo den nos Señor Jesus, e persona ey ta ricibi pordon di tur su picanan, y e lo cuminsa den un bida nobo. Beibel ta yama e transformacion ey: Regeneracion, of Nace di Nobo. Sea cu bo ta un persona di basta edad, of un hoben, of un mucha na e edat di comprendemento, etc. Den tur caso for di e momento ey, bo ta un creación nobo. Y no ta importa con educa un persona por ta; sinembargo e ta manera un baby spiritual, y tin mester di e lechi spiritual pa e por crece y bira un adulto spiritualmente segun Scritura. (Lesa Efesionan 4:1-16 y tambe 1 Corintionan 12:12-31).
Awor un spiertamento di amor den Cristo. Y e ta bai tocante nos mensahe pa awe cu ta cuminsa cu e palabra negligencia. Masha hopi almanan precioso aki na Aruba y Antiyas, y rond mundo ta permiti pa e peliger grandi aki vence ariba nan. Y ta esaki: Hopi hende di tur edad, ora cu e tende e mensahe di Evangelio lo bisa den nan mes, of na un y otro: BERDAD, esey ta un bon mensahe cu bunita palabranan, etc., pero kico ta pasa? Nada; e persona ta sigui hiba e mes un bida sea religioso of no religioso. Ma e no ta obedece Dios mediante di repentimento y fe den nos Señor y Salbador JesuCristo. Pues, e ora ta e mes un sentencia aki ta keda, esta: “CON NOS LO SCAPA SI NOS NEGLISHA UN SALBACION ASINA GRANDI?

Te otro biaha, corda communica cu nos si bo a lesa e mensahe cortico aki. Comparti bo pensamentonan cu nos pa nos un edifica e otro den nos temponan dificil den cual nos ta. {2 Timoteo 3:1-9} Nos email ta: cjwmitesoro@gmail.com of bettyratzlaff@hotmail.com

2011-05-30T05:20:00.000-07:00

Bon dia na tur nos amiga/onan riba nos dushi islanan di Aruba, Bonaire y Korsow!! Ta nos deseo cu awe lo ta un dushi dia pa bo den Senjor! Riba foto boso ta mira un dos bistanan na e parti zuit dje isla di Aruba - den loke tabata yama "The Lago Colony" -un lugar cu ta trece hopi memorianan pa esnan di mas edad. Tambe na e entrada na Lago Colony boso ta mira e bunita bista aki di un anker! Esey ta pone nos corda ariba Cristo Jesus - e anker di nos alma den e laman turbulente di bida! Bo ta ancra riba e Roca Fiel? Nos ta sigui awe nos tres mkensahe cortico ariba e topico di Fe:

Den Scritura nos ta wordo spierta masha cla mes tocante Fe. E fe di cual nos ta wordo spierta den Scritura ta, pa nos kere den e Yiu di Dios, esta nos Señor y Salbador JesuCristo.
Asina pronto cu Adam a peca, pica a drenta den mundo. Y na e mes un tempo Señor a duna e promesa di un Salbador Kende lo nace for di mohe. (Genesis 3:15,16). Segun e Scritura ey, ta e simiña di e mohe lo pachura cabes di e colebra (cual ta representa Satan), y no e mohe mes. (Mira Rebelacion 20:1-9).
Cu tur respet y reverencia na e mama di Señor Jesus, esta Maria; nos mester duna e spiertamento aki, esta: Cu den nos Islanan muchu mas hende ta haci oracion y ta depende pa nan salbacion ariba e mama di Jesus na lugar di confia den nos Señor Jesus. Pero esey ta e berdad.
Di acuerdo cu Scritura, ta e personanan cu ta confia den Señor Jesus, ta ricibi pordon di picanan y bida eterno. Ta pa e proposito ey nos Señor a nace di un birgen pa medio di obra di Spirito Santo. E historia relaciona cu Su nacemento por ser lesa den Mateo 1:18-25, y tambe den Lucas capitulo uno y dos. Aki mi kier encurasha tur hende pa bo lesa e Scriturnan ey, y tambe e resto di Scrituranan, tanto ta den Testament Biew como den Testament Nobo. Anto cu yudansa di e Spirito Santo di Dios, nos lo comprende hopi cla cu: “No tin salbacion den NINGUN OTRO, pasobra bou di cielo no tin otro nomber duna na hende, pa medio di cual nos mester wordo salba”. Lesa Echunan 4:8-12 (anto huzga pa bo mes).
Amigonan di tur edad, segun Scritura, Fe ta bini pa medio di tendemento, y tendemento pa medio di e Palabra di Cristo. Otro traduccionnan ta pone asina aki: “Fe ta bini door di tendemento di e mensahe, y e mensahe ta wordo tendí door di e Palabra di Cristo.” (Romanonan 10:17). Di manera anto, si un persona ta anhela pa sabi ta kico e mester haci pa e por tin e fe di salbacion y pordon di picanan; nos mester scucha y obedece na e loke cu e Palabra di Dios ta bisa nos. Y nos por ta sigur cu cerca Dios no tin distinccion di persona, pasobra nos tur a peca, y ta falta e gloria di Dios. Pero door di obedece Dios pa medio di fe den Cristo, nos ta wordo hustifica gratuitamente door di e gracia di Dios, pa medio di e redencion cu ta den Cristo Jesus. (Lesa Romanonan 3:21-30).
Amigonan stima pa nos Señor Dios Su mes; siendo cu E no a spaar ni Su propio Yiu, ma a dun’E pa nos tur. Con anto E lo no duna nos tur cos di gracia cu nE?
E Apostel Pablo, scribiendo na e keredornan na Roma, ta declara na nan lo siguiente: “Tempo cu nos tabata sin forsa ainda, Cristo a muri pa nos net na tempo.” Anto e sigui bisando: “Pa un bon hende kisas un persona lo risca muri p’e. Pero Dios a demonstra Su propio amor pa nos den esaki: mientras cu nos tabata pecadornan ainda, Cristo a muri pa nos.” Lesa pa fabor Romanonan 5:1-11. Lesa e porcion aki cu sinceridad y seriedad, y cu yudansa di Spirito Santo di Dios nos lo comprende y wordo encurasha pa obedece di henter nos curason. Ta e Spirito Santo di Dios, mediante e Palabra di Dios, ta yuda nos den e dia aki di salbacion.
Awor laga nos conclui cu un spiertamento solemne na henter Antiyas di abla Papiamento, y tur otro cu ta residencia aki riba e islanan. Y ta for di e mes carta sciribi na e rumannan cu tabata biba na Roma. Na prome lugar e spiertamento ta bai particularmente na e Judiunan e tempo, ma e berdad tocante e spiertamento ey ta mescos pa nos tambe cu no ta Judiu di nacemento. Aki e Apostel ta declara cu no ta tur e Israelitanan a acepta e bon nobo. Pasobra Isaias ta bisa, “Señor, kende a kere nos mensahe? Asina ta cu fe ta bini for di tendemento di e mensahe, y e mensahe ta wordo tendí pa medio di e Palabra di Cristo.” Anto e Apostel ta puntra e loke por wordo puntra na henter Antiyas y Aruba. “Nan no a tende? Sigur cu si: nan bos, of nan palabranan a bai den henter mundo, te na e finnan di e mundo.” Nos ta scirbi esaki pa henter Antiyas y Aruba por sabi cu e Evangelio a wordo proclama den e Islanan aki pa ya mas cu cincuenta añanan. P’esey ta para scirbi: “Si bo a tende Su bos awe, no haci bo curason duro.” (Lesa Hebreonan 2”1-4 y tambe 2 Corintionan 6:1-2).

FE - continua

2011-05-18T07:09:00.000-07:00

Den nos prome mensahe tocante fe, nos a menciona e spiertamento cu Spirito Santo ta duna pa e dianan aki den cualnan nos ta bibando actualmente. Y esey ta, cu algun hende lo cai for di e fe, y scucha na spiritonan gañador y cosnan siña pa demoñonan. Siendo cu e Apostel ta menciona cu ta algun lo cai of lo bandona e fe; e spiertamento solemne aki ta bai principalmente na personanan cu ta siña of te predica na otronan.
Y pa e motibo ey, e Apostel ta spierta Timoteo pa e predica e palabra; of manera e por wordo bisa tambe: predica, of proclama e mensahe , of e Evangelio, cu ta nifica pa proclama e noticia, e bon noticia. Sea cla na tempo of for di tempo –pues, proclama e bon nobo na tur tempo. Ademas, coregi, reprende y encurasha cu hopi pacenshi y cu instruccion cuidadoso. Pasobra e tempo lo bini cu hende lo no soporta doctrina sano mas. Ma na lugar di scucha na doctrina sano, nan lo tin un gran numero di siñadornan pa bisa loke nan orea cu ta kishiki kier tende. Y nan lo bira nan oreanan for di e berdad, y bira un banda na mito, of sea na fabula.
Sea sigur, Amigonan stima pa Señor Su mes, cu no ta pornada e Spirito Santo a y ta spierta nos awe tocante di e peliger grandi aki cu lo tin consecuencianan eterno pa esunnan cu sera nan oreanan pa e berdad cu ta den Cristo, pa nan biba den brasa di mentira y di inmundicia. Y peor ora cu un persona no kier ni tende mes tocante di repentimento di pica y fe den nos Señor JesuCristo. Anto e Apostel ta conclui cu e palabranan aki como un encurashamento na cada uno cu su fe ta den Jesus awe, y cu ta boluntario pa sigui den Su stapnan: “Pasobra ami ta cla pa wordo drama manera un ofrenda di bebida, y e tempo a yega pa mi bai. Mi a lucha e bon lucha, mi a termina mi careda, mi a warda e fe. Di awor padilanti e corona di husticia ta reserva pa mi, cual e Señor, e Hues husto lo recompensa mi cu n’e ariba e dia ey – y no ami so, ma tambe na tur cu a anhela pa Su binida (aparición).
Beibel ta spierta y encurasha nos masha serio mes tocante fe den Cristo, y fe den nos bida diario. Ma e fe aki ta esun cu ta bini pa medio di e palabra di Dios den Scritura. Ta pa e proposito ey, Señor a y ta duna donnan na hende. Segun Scritura, Dios a duna e Iglesia donnan spiritual despues di e resureccion y asencion di Señor Jesus. Mira Efesionan 4:1-16. Aki nos por lesa cu despues di Su morto y resureccion, Señor Jesus a duna algun como Apostel, y algun como profeta, y algun como Evangelista, y algun como pastornan y siñadornan. Y esakinan a wordo duna pa prepara e pueblo di Dios pa e trabao di sirbimento, pa e curpa di Cristo wordo edifica, te ora cu nos tur (cu ta kere e Evangelio) por yega na e unidad den e fe, y den e conocmento di e Yiu di Dios, y bira madura te na e medi di plenitud di Cristo. Pasobra no ta e boluntad di nos Tata Celestial, pa nos keda infantenan tira di un banda pa otro door di e olanan, y supla aki y aya dor di tur sorto di biento di doctrina y dor di triki di hende cu ta astuto den mentira pa desvia hende.
Nos lo continua si Señor permiti pa nos biba – B&B Henriquez

FE

2011-05-03T07:48:00.000-07:00

FE
Nos mensahe pa awe ta bai tocante fe. Scritura y principalmente e Testament Nobo, ta papia cu nos cu hopi énfasis tocante di fe. Den e Testament Bieu nos por haya fe menciona dos bes, mientras cu den e Testament Nobo, fe ta wordo menciona banda di dos shen y cuarenta bes (240).
E mensahe pa awe na prome lugar ta un spiertamento for di Scritura, na nos tur cu ta profesa fe den nos Señor y Salbador JesuCristo. Den prome Timoteo capitulo cuater cuminsando cu versículo uno, nos ta lesa lo siguiente: “E Spirito ta bisa claramente cu den e ultimo dianan of temponan, algún lo cai for di e fe dor di duna atención na spiritonan engañoso y cosnan siña pa demoñonan.” Aki, amigonan, e spiertamento ta dirigi na cada uno di nos cu ta profesa fe den nos Señor y Salbador JesuCristo. Pasobra un hende no por bandona of cai for di algo cu e no tin.
Den prome Timoteo, capitulo seis, cuminsando cu vers 3, nos ta haya e mes un spiertamento cu ta bisa nos lo siguiente: “Si algún ta siña doctrinanan falso, y no ta di acuerdo cu e instruccion sano di nos Señor JesuCristo, y na doctrina cu ta según santidad; e ta orguyoso, y no ta comprende nada; ma e tin un interés cu no ta saludabel tocante preguntanan controversial y argumentonan cu ta resulta den envidia, pleitamento, palabranan di abuso, y sospecho malo. Anto e Apostel ta sigui spierta tocante e pensamento robes, cu un persona cu ta hiba un bida consagra na Dios lo tin ganashi of entrada financiero. Sigui lesa e Capitulo 6 di 1 Timoteo 1-10. Kere of no, rumannan precioso den Cristo; cualke di nos por cai pa e sorto di siñansa ey. Pero e contesta berdadero ta wordo haya den e versnan 6-8, unda cada uno di nos cu ta kere di curason den nos Señor y Salbador Jesus ta inclui. Ey, e ta bisa nos lo siguiente: Ma santidad (esaki ta e persona cu ta bibando tur momento den comunión cu nos Tata Celestial, mediante di fe den Señor Jesus, y e presencia di Spirito Santo continuamente den nos bida. Y realmente, esey ta e parti y un bendicion grandi dia tras dia, y momento tras di momento). Pues aki e Apostel ta bisa nos, cu un bida dedica na Señor compaña cu contentamento ta di gran ganashi. Na Hulandes e ta wordo traduci pa “tevredenheid”, y esey ta e berdadero nificacion aki – y e ta scirbi pa cada uno di nos cu ta den Cristo. Y e ta repiti den vers 8. Nos lo continua cu e mensahe aki, si Señor permiti. Keda pendiente!!

Diabierna Santo

2011-04-22T13:28:00.000-07:00

Nos ta confia cu boso tur ta pasando un dushi dia liber, un dia cu nos por tuma tempo pa refleha ariba e nificacion berdadero di e dia aki. Esta, pa refleha pakico nos Jesus mester a muri ariba e crus. E motibo ta cla den Juan capitulo 3! Lesa henter e capitulo. Pasa un dushi weekend, y Diadomingo, celebra e Resureccion di Jesus for di morto. Pasobra E ta bibo, nos tambe lo biba - pasobra nos ta kere den djE!

LAGRIMA - continua

2011-04-22T07:20:00.000-07:00

Den nos prome mensahe corto tocante e tema aki di "Lagrimanan", nos a menciona cu te asta nos Senjor Jesus a drama lagrimanan durante Su ministerio publico. Y particularmente ora cu E tabata wordo tenta pa haci pica. Nos ta bibando awe den e ultimo dianan prome cu Su binida; y nos a wordo spierta pa e Apostelnan y particularmente door di e Apostel Pablo, cu den e ultimo dianan lo bini tempo teribel. Pasobra hende lo ta bira stimador di nan mes, stimador di placa, gabado arogante, blasfemado, desobedicido na mayornan, ingrato, impio, sin stimacion, ireconciliabel, cu mal lenga, sin dominio propio, grosero, odiado di loke ta bon, traidor, imprudente, soberbe stimador di placer na lugar di stimadornan di Dios; cu tin apariencia di ta deboto, pero ta nenga su poder.

Amigonan, e cosnan aki tabata scirbi banda di dos mil anja pasa, bou di guia y inspiracion di e Spirito Santo di Dios. Anto e Apostle Pablo a menciona cu e hendenan aki tin un forma di debocion, pero ta nenga su poder. E pregunta cu nos mester haci na nos mes ta esaki: "Nos tin e sorto di cosnan aki awe, aki na Aruba y Antiyas? E contesta ta masha cla mes den Scritura, pasobra ta cla pa mira cu nos ta bibando den e ultimo dianan di cual Scritura ta papia di dje. Lesa cualke corant y mira con lihe nos ta drief bai for di e berdad.
Pasobra nos Senjor, y e Apostelnan, cu El a autorisa pa participa e bon noticia di pordon y bida etern0 a spierta nos hopi cla tocante e caimento for di fe, y particularmente for di "e fe", cu ta tumando lugar den e islanan aki, y rond mundo. Ora cu Scritura ta papia di "e fe", e ta papia di loke ta unico. Y e fe aki ta inseparabel di e bida y morto y e resureccion di nos Senjor y Salbador, Jesus. Pues, aki nos ta papiando di fe personal di un pecador, den Esun cu a muri den nos lugar y dera, y resucita despues di tres dia. Y e fe aki ta bini via di tendemento di e Evangelio cu yudansa di e Spirito Santo di Dios. P'esey, nos ta wordo spierta den Scritura Santo, pa nos no haci nos curason duro ora cu nos tende e bon nobo cu ta bini di Dios Su mes.

Pasobra, Amigonan, ta den Cristo Dios a haci e posibel pa nos sea reconcilia cu nE. O cu nos lagrimanan por ta lagrima di berdadero repentimento y fe den Senjor Jesus. Y corda bon cu nos dianan ta poco, y morto por bini inespera - esey ta un facto. P'esey no tarda mas.

Negligence & Its Consequences

2011-04-01T13:55:00.001-07:00

Good afternoon! It is very warm here in Aruba today. We have had months of rainy and comfortable weather, so the heat is hitting us in a new way! We are continuing our thoughts on the subject of what the Scriptures say about negligence and its consequences.

In the Scriptures we read this very significant verse, "Salvation is found in no one else, for there is no other name under heaven given to men by which we must be saved." (Acts 4:12). This testimony was given by the Apostle Peter to religious Jewish leaders in his time, who had imprisoned them for having proclaimed that in Jesus there was a resurrection for the dead.

Friends of all ages, it is this very same message that we proclaim today, some two thousand years after. In our previous Blog we exhorted our readers about the danger of procrastination or negligence. Without maybe realizing it we think that other things of far greater importance than to obey the Gospel of our Lord Jesus Christ. We do not say NO to those things that seem so very important but are not. Rather we decide to ignore, postpone or neglect the call of God to repentance from sin and faith in Lord Jesus Christ. By doing this we dishonor God, Who loved humankind so much, that He gave His only begotten Son, that whosoever believes in Him should not perish but have eternal life. Are you one of those persons guilty of ignoring His call to repentance and faith in His Son? Are you guilty of dishonoring His love?

In our previous message we also mentioned negligence for such who are already believers. The Scriptures are very clear about the fact that faith comes by hearing the Word of God. This is the question for such who already believe: How can they call on Him on Whom they have not believed? And how can they call on Him of Whom they have not heard? And how can they hear if no one proclaimed the Word to them? And how can they proclaim the Word if they were not sent? As it is written: "How beautiful are the feet of those who bring good news! (If possible read Romans 10:1-21 and in more than one translation).

That is why it so important to each and every one of us who have professed Jesus Christ as Lord and Savior to not neglect to give a good testimony to the world around us, to the ones we rub shoulders with each day at work, on the streets, etc. We need to have a good testimony not only with our words, but also our daily conduct. This is the will of God for each one of us no matter what our gender is.

Think on these things!

Today is the day of salvation!

Today is the day to share the Good News with someone!

Until another Blog…. Remember to send us a note, either on the blog or in an email.

TARDANSA y Su Consecuensianan – part 2

2011-03-31T12:10:00.001-07:00

Den Scritura Santo nos ta lesa lo siguiente: "Y no tin salbacion den ningun otro; pasobra no tin otro nomber bou cielo duna na hende pa medio di cual nos mester wordo salba." Echunan 4:12. E testimonio aki a wordo duna door di e Apostel Pedro na e lidernan religioso Judiu, cu a encarcela nan pa motibo cu nan tabata proclama den Jesus, e resureccion for di morto.

Y amigonan di tur edat, ta e mes mensahe aki nos ta sigui proclama te awe cu ta mas cu dos mil añanan despues. Den nos ultimo mensahe nos a duna e spiertamento for di Scritura tocante e peliger di tardansa door di posponemento. Sin cu nos sabi nos ta considera cu tin asuntonan mucho mas importante pa haci awor, cu di obedece e Evangelio di Dios. Nos no ta bisa no; pero nos ta sigui ignora y neglisha e yamada di Dios pa repentimento di pica y fe den Jesus. Haciendo esey nos ta menos aprecia e amor di Dios, Kende a stima humanidad asina tanto, cu El a duna Su unico Yiu, pa tur cu kere den djE no bai perdi, ma haya bida eterno.

Den nos ultimo mensahe mi a menciona cu e spiertamento contra negligencia ta conta pa esunnan cu ya ta kere di curason tambe. Pasobra manera Scritura ta bisa nos hopi cla, cu fe ta bini via tendemento di e palabra di Dios den e Evangelio. Anto e pregunta ta wordo hasi na nos asina aki: Con anto nan por yama na Esun den cual nan no ta kere? Y con nan por kere den Esun di Kende nan no a tende? Y con nan por tende si un hende no predica na nan? Y con nan lo predica si nan no ta manda? Manera ta para scirbi, "Ki bunita ta e pianan di esunnan cu ta predica e Evangelio di pas, esunnan cu ta trece noticianan alegre di loke ta bon." Lesa Romanonan 10:1-21 (si ta posibel den mas cu un tradicion). P'esey cu cada un di nos cu pa e gracia y misericordia di Dios a kere den nos Señor y Salbador JesuCristo, ta wordo spierta pa nos no neglisha nos parti di ta testimonionan pa Cristo. No solamente cu palabranan, ma tambe cu nos echonan y nos conducta. Y esaki ta Dios Su bon boluntad tanto ta pa e hombernan y e mohenan.

TARDANSA y su Consecuencia

2011-03-24T06:58:00.000-07:00

Den Scritura Santo nos por lesa e spiertamento serio aki: "p'esey nos mester duna mas atencion cuidadoso na loke nos a tende, pa nos no drief pasa bai. Pasobra si e mensahe papia door di Angelnan tabata firme, y cada violencia y desobedienciaa ricibi su castigo husto, con nos lo scapa si nos ignora un salbacion tanto grandi asina? E salbacion aki cual a wordo anuncia prome door di Senjor, a wordo confirma ma na nos pa medio di esunnan cu a tend'E. Dios tambe a duna testimonio na esey pa medio di senjalnan, y obranan maraviyoso y varios milagernan y donnan di Spirito Santo destribui di acuerdo cu Su boluntad." Hebreonan 2:1-4

Amigonan stima pa Dios Su mes, e spiertamento serio y solemne aki ta dirigi na cada uno di nos cu ta lesando e mensahe cortico aki. Pasobra e no ta bisa: Con nan lo scapa", etc., ma e ta bisa: con nos lo scapa..etc. Ademas, e no ta bisa: si nos nenga of si nos rechasa, ma e ta bisa: "si nos neglisha..."

E palabra "ignora" tin varios aplicacion. Pa cuminsa e por nifica cu e persona cu ta tende e mensahe di Evangelio, ta haya cu e ta un bon mensahe, pero pa awe no, laga esey pa un otro dia! Un hoben studiante por bisa den su mes cu repentimento di pica y fe den nos Senjor JesuCristo por bin despues cu mi a haya mi diploma, etc.

Pero kico Scritura ta bisa? Den e buki di 2 Corintionan 6:1,2, nos ta lesa lo siguiente: "Como trahadornan hunto cu Dios, nos ta urgi boso, pa no ricibi e gracia di Dios enbano." Pasobra e ta bisa: "Den Mi tempo favorable Mi a tende bo, y den e dia di salbacion Mi a yuda bo. Ami ta bisa boso, awor ta e tempo di Dios Su fabor. Awor ta e dia di salbacion."

Amigonan y rumannan den Cristo, tanto ta esun cu ya ta kere di curason, como esun cu te na e momento aki no a repenti di pica y kere den Senjor JesuCristo. Awor ta e tempo favorable di Dios. Awor ta e dia dia salbacion!

Den un siguiente BLOG nos lo sigui cu e tema aki. Nos ta combida pa bo comenta riba e Blog aki mes (tin lugar p;e) of scirbi nos via email: bettyvicenteaw@yahoo.com

Nos Number di Telefon y Email

2011-03-22T06:36:00.000-07:00

Ola! Nos ta trahando ariba un Blog nobo, ma mi mester a cambia computer y awor mi ta tin e trabao pa comprende e programa cu yama WINDOWS 7 - no ta facil pa un hende cu ta bai cumpli 84 anja otro luna. Ademas, Bicento mester haya un poco mas forsa fisicalmente; e ta hopi cansa, ma poco poco nos ta confia cu su energia lo bolbe.
Nos telefon ta: 297-744-1111 y nos email ta: bettyvicenteaw@yahoo.com. Nos adres di cas ta Kamay 5, Noord, Aruba, Dutch Caribbean.

Un Informacion

2011-02-02T11:17:00.000-08:00

Ola, nos tin problema di post nos mensahe pa Pasco Grandi ariba nos blog. Cada bes mi ta purba do transferi e mensahe di mi document file na e Blog, mi ta haya e mensahe cu "Firefox had a problem and crashed!" Wel, lo mi mester busca yudansa pasobra mi no sa ta kico esey ke meen!! Ma nos ke laga boso tur sabi si Dios permiti nos lo bai Curacao un di e dianan aki pa Bicento bai haya bestraaling pa e malesa cu e tin ya for di prome cu nos a bin di Canada. E ta yama "Bacterial Lymphoma" - e tin problema pa cuminda pasa e slokdaarm net na e entrada pa e stoma. Ta hopi sera eynan y mi mester prepara tur su cuminda na sopi. Esey mi ta haci hopi contento, basta cu e ta haya alimento y poco poco wordo yuda. Nos ta sperando e yamada di AZV pa haya sa e dia y ora. Doctornan a bisa cu nan ta spera cu e papelnan lo bin cla pa dia 8 di Februari. Haci oracion pa nos. E ta un experiencia nobo pa nos, ma enspecial pa Bicento cu no tabata sa kico ke meen "bira malo" - ma awor el a expermenta hopi siman dificil mes, ma Su gracia tabata y ta basta.

Si aina mi por haya remedi pakico mi no por stort e mensahe - nos lo haci e.... sino te ora nos bolbe di Curacao cu poder di Dios. E ta grandi!! E ta misericordioso!!

STAP PA STAP - continua

2010-12-31T11:50:00.001-08:00

Bicento y ami, Betty, kier desea tur nos amigonan y amiganan di nos Blog y Facebook un Felis AŇa Nobo – cu Dios mes, pa medio di Su Yiu stima, nos Seňor JesuCristo, a stima nos asina tanto cu El a duna Su Yiu na mundo pa tur cu kere den djE no bai perdi ma tin bida eterno! Ker'E – no vacila. PUES: FELIS AŇA den Cristo.

STAP PA STAP (continua)

Den nos prome mensahe tocante e tema aki, nos a termina bisando “Ora cu un persona cu a tende e Evangelio y obedece; el a tuma e prome stap den un bida cu tin nificacion. Cu esey nos no ta bisando cu tin varios stapnan cu un pecador mester tuma prome cu e por ricibi pordon di picanan y bida eterno. Pasobra si nos hasi asina, nunca nos por ta sigur cu nos picanan ta pordona, y cu nos tin bida eterno.

Pero e loke nos ta enfatisa ta, cu for di e momento cu un persona ta repenti y kere e Evangelio di henter su curason; e ta bira, segun Scritura, un creacion of un criatura nobo. Den otro palabra, un persona cu ta na e edad di comprendemento, sea cu ta un mucha, of un hoben, of un adulto of un anciano; for di e momento ey, cu e ta repenti y pone su fe den nos Seňor y Salbador JesuCristo, e ta nace di nobo.

Amigonan stima pa Dios Su mes; e nacemento di nobo aki, ta un misterio spiritual, pasobra e ta obra di e poder di Dios, den cada persona cu ta repenti di su picanan y ta pone su fe den nos Seňor y Salbador JesuCristo.

Pues, e asunto di e prome stap, ta solamente un manera di papia tocante crecemento den nos bida nobo den Cristo. Mi ta enfatisa cu cada persona cu a repenti y a kere di curason; no tin diferencia si e ta un persona bon educa cu puesto importante den sociedad, of un persona cu a apenas ta scirbi y lesa, etc., etc. Scritura ta papia di babynan den Cristo, y cu no ta Seňor Su boluntad pa nos keda babynan cu tin mester di lechi enbes di cuminda pisa.

Nos ta recomenda na cada uno, y nos ta encurasha cada ruman den Cristo pa lesa e capitulo cuater di Efesionan sin falta. Anto despues lesa e mes un carta ey, scirbi p'e Apostle Pablo, completamente. E carta aki ta yen di doctrinanan sano pa cada uno di nos. Pasobra nos ta bibando actualmente den un tempo dificil y yen di siňansanan robes y falso. Ta te aki nos ta yega awe. Nos lo aprecia bo observacionnan y criticanan sano.

Nos direccion ta: bettyvicenteaw@yahoo.com

of bbhenriquez.blogspot.com – por laga comentario ey tambe, of scirbi nos via email. Corda nos ta na ARUBA awor.

STAP PA STAP

2010-12-28T11:39:00.000-08:00

Manera nos tur sabi, nos camnamento den e mundo aki ta bai stap pa stap; y pa cada stap di nos, lo yega e momento, cu nos lo tuma nos ultimo stap den e mundo aki! Aki no tin diferencia di nacionalidad, di nos posicion social, esta si un persona ta bon educa, sea cu e ta rico of pober, gordo of delega, etc., etc. Pasobra segun Scritura Santo, no tin excepcion, pasobra TUR a peca y ta falta e Gloria di Dios. Segun Scritura, ta stableci pa hende muri un bes y despues ta sigui huicio. Segun Scritura e huicio cu ta sigui despues di morto lo bini na su tempo, y e huicio ey lo ta e huicio di condenacion pa cada persona cu a ignora of rechasa e yamada di Dios pa repenti y kere e Evangelio di Cristo.

Pakico kere e Evangelio ta asina importante? Pa cuminsa e palabra, "EVANGELIO" ta nifica "BON NOTICIA". Y e bon noticia aki ta wordo proclama den henter mundo como un testimonio cu e Dios Todopoderoso no kier pa un solo persona bai perdi, pero cu cada uno por repenti y kere e Evangelio. Pasobra den e Evangelio un husticia di Dios ta wordo rebela di fe pa fe, manera ta para scirbi: E husto lo biba pa medio di fe. Siendo cu no ta existi ni sikiera un solo persona husto den henter mundo, ta nifica cu e invitacion pa kere e Evangelio di Dios y di Cristo; ta dirihi na tur hende di mundo, encluyendo Aruba, Curacao y Bonaire.

P'esey amigonan pa Dios stima, ta para scirbi cu Dios a stima mundo (of sea) humanidad asina tanto cu El a duna Su unico Yiu pa tur cu kere den djE, no bai perdi, ma haya bida eterno. Y den otro lugar ta para scirbi: E, cu no a spar ni Su propio Yiu, ma dun'E pa nos tur, con anto E lo no duna nos tur cos pornada of di gracia cu nE? Obedece y repenti di bo picanan, y esey lo ta prome stap, cu bo ta tuma den un bida cu tin nificacion, sea cu bo ta un hoben of adulto of un anciano, of un anciana; no ta haci diferencia.

Te akinan pa awe. Nos adres nobo ta: Bicento y Betty Henriquez, Kamay 5, ARUBA, Dutch Caribbean, y nos email adres pa awor ta: bettyvicenteaw@yahoo.com

Pues, te nos siguiente blog!

FE Y OBEDIENCIA

2010-09-17T09:18:00.000-07:00

Ata, nos melatanan paketa pa Aruba!! Kere of no, e maleta a costa nos net

0.25 cent na un lugar di baratia!! Ainda e prijs t'ey'riba. Awor nos ta conta

e dianan!!

FE Y OBEDIENCIA

Di acuerdo cu Scritura Santo cu nos ta yama “BEIBEL”, sin fe e ta imposibel pa agrada Dios, pasobra esun cu bini cerca djE, mester kere cu E ta existi y cu E ta recompensa esunnan cu ta busc’E seriamente of sinceramente. (Hebreonan 11:6)

Otro Scritura ta declara lo siguiente: Mi no tin berguensa di e Evangelio pasobra e ta e poder di Dios pa e salbacion di tur (cada uno) cu ta kere, pa e Judiu prome, y tambe pa e Griego (of e otro nacionnan no Judeo). Pasobra den e Evangelio un husticia for di Dios ta revela; un husticia cu ta pa medio di fe for di principio te fin, (of: di fe pa fe) net manera cu ta scirbi: “E husto lo biba pa medio di fe.” Den nos papiamento comun nos por bisa cu: Salbacion ta pa medio di fe di A te Z. (Lesa Rom. 1:14-17)

E doctrina di fe ta cubri di Genesis te na Rebelacion. Y henter Aruba, Bonaire y Curaçao y e resto di humanidad ta consisti di esunnan cu ta kere, y esunnan cu no ta kere. Y cu “kere”, mi no ke meen hende religioso, y ni tampoco esunnan cu ta bisa cu nan ta kere cu tin un Dios. Pasobra ta masha hopi hende tin den mundo cu ta bisa cu nan ta kere cu tin un Dios; pero esey no ta basta. Scucha kico Scritura ta bisa nos den Santiago 2:19. “Abo ta kere cu tin un Dios. Bon! Asta e demoñonan ta kere esey – y nan ta tembla.” (NIV)

Ma awor; con nos por haya e fe ey cu ta asina importante pa mundo completo? E contesta cla y sigur ta den e Scrituranan Santo. Romanonan 10:17 ta bisa nos lo siguiente, “Asina ta cu fe ta bin for di tendemento y tendemento pa medio di e palabra di Cristo.” (Lesa Romanonan 10:1-21)

Na di dos lugar: fe y obediencia ta bai hunto. Echunan 5 y 6, ta bisa nos tocante e Apostelnan cu despues di a ricibi e Spirito Santo ariba e dia di Pentecostes, a bai rond proclamando e Evangelio, apesar di e resistencia y amenasa di e Judiunan; y particularmente di e lidernan religioso. Anto den Capitulo 6 y versiculo 7, nos ta lesa lo siguiente: “Asina e palabra di Dios a plama. E cantidad di discipelnan den Jerusalem a aumenta rapido, y un cantidad grandi di sacerdotenan a bira obedecido na e fe.”

Aki nos por siña hopi cla cu fe y obediencia ta bai hunto. Y amigonan stima pa nos Tata Celestial Su mes; esaki ta e mensahe cu nos ta haya door di henter Scritura, esta: Tendemento di e Palabra, esta e Evangelio, anto fe y obediencia. E obediencia aki ta nifica cu nos ta obedece Dios nos Tata Celestial tocante Su Unico Yiu, nos Señor JesuCristo, Kende a carga nos picanan den Su curpa ariba e crus, pa nos libra di picanan por biba pa husticia. Pues, pa medio di Su heridanan, nos a wordo cura. P’esey, amigonan rond di mundo, ora cu nos ta obedece e Evangelio, no ta hende nos ta obedece sino Dios Su mes. E oferta di pordon y bida eterno a costa un preis masha cara mes, Y ta pa e motibo ey ta para scirbi: “P’esey nos mester paga mucho mas atencion na e loke cu nos a tende, pa nos no drief bai. Pasobra si e mensahe papia dor di angelnan a keda proba di ta firme, y tur violacion y desobediencia a ricibi nan castigo husto, con nos lo scapa si nos ignora un salbacion tanto grandi asina:? (Lesa Hebreonan 2:1-4 – si ta posibel den mas cu un idioma y version,)

Nos lo continua cu e tema aki den un siguiente Blog!

2010-09-10T14:27:00.000-07:00

Bon tardi, bon tardi, lesadornan di nos BLog. Mi ta sigur cu boso ta cla pa sigui cu e segundo parti di nos tema: IMPOSIBEL y POSIBEL! E foto? celebrando Bicento su dia special - cu el a cumpli 87 aña!!

Nos ta bibando den un era, den cual ta parce cu no tin nada imposibel mas pa e ser humano. Durante e ultimo shen aña di e siglo dos mil, tabatin un progreso increibel den e asina yama: “Sabiduria Humano.”

Ta durante e siglo ey, a bin e sabiduria pa combati hopi enfermedadmam cu antes a causa bida di masha hopi hende di babunan te na ancianonan. Mescos e tabata cu e medio di comunica for di un continente pa e otro. Pero tambe a bin e sabiduria pa produci armanan cu awe por destrui mayoria di bida ariba mundo.

Pero e mensahe cortico aki, no ta bai tocante e sabiduria di e mundo aki cu segun Scritura ta caba na nada. (Lesa 1 Cor. 2:6) Mi no kier meen cu tur sabiduria humano y tur descubrimento ta malo. Ma ta ora cu un ser humano pa medio di e asina yama Sciencia, ta rechasa e existencia di Dios basa ariba pruebanan scientifico.

Como cu e asunto ey di sciencia ta mucho complica pa mi, lo mi bai na Scritura pa proba cu pa medio di sabiduria humano e ta imposibel pa conoce Dios. Nos prome Scritura pa awe ta for di e buki di Romanonan Capitulo 1:18-20. “Pasobra e rabia di Dios a wordo revela for di cielo contra tur e impiedad y maldad di hende cu ta oprimi e berdad pa medio di nan maldadnan. Siendo cu loke por sea conoci tocante Dios, ta manifesta na nan, pasobra Dios a maniifesta esey na nan. Pasobra desde e creacion di e mundo Dios Su cualidadnan invisible – Su poder eterno y naturalesa Dibino – a worde mira claramente siendo comprendi for di e loke a wordo traha, di manera cu hende no ta dispensá.” (Sigui lesa henter e Capitulo)

Siendo cu Cristo ta enfatisa cu ta imposibel, pa hende conoce Dios pa medio di sabiduria humano, anto ta masha cla pa comprende cu e scientificonan cu tur nan sabiduria nunca por comprende e existencia di un Dios Todopoderoso cu a crea e cielonan y e tera y tur loke tin den nan. Den e buki di prome Corintionan uno, nos por lesa algun spiertamento hopi cla tocante sabiduria humano versus sabiduria di Dios. Den e porcion di Capitulo uno 17-18, nos ta lesa lo siguiente, “Pasobra Cristo no a manda mi pa batisa, ma pa predica e Evangelio, no cu palabranan di sabiduria humano, pa e crus di Cristo no perde su poder. Pasobra e mensahe di e crus ta locura pa esnan cu ta pereciendo, ma nos cu ta wordo salba e ta e poder di Dios. Pasobra ta para scirbi: Ami lo destrui e sabiduria di e sabínan, e inteligencia di e inteligentenan, lo Mi frustra.”

Un spiertamento simple, ta na su lugar aki. Nos no mester pensa solamente di e Scientificonan y e Maestronan bon educa, pasobra danki na Señor, cu pa Su gracia y misericordia a haci e posible cu tin pordon y bida eterno pa tur cu repenti di pica y kere e Evangelio. Si un Scientifico tende e Evangelio y repenti di su picanan y pone su fe den Cristo, e lo ricibi pordon y bida eterno hunto cu e otronan cu ta kere. Si un persona cu no tin bon educacion y e ta pober den cosnan material tende e mes un Evangelio y kere di curason e lo ricibi pordon y bida eterno mescos cu e Scientifico of cualke otro persona cu tende e Evangelio, y kere di curason manera nos por lesa den Romanonan 10:1-15. Pero si e Scientifico of esun cu no tin bon educacion rechasa e Evangelio ambos lo perece di mes manera.

Nos lo continua e topico aki cu un otro Blog.

IMPOSIBEL Y POSIBEL

2010-09-04T06:14:00.000-07:00

Bon dia, bon dia: Tuma tempo pa busca un cop'i cofi y sinta hunto cu mi, y lesa y medita den loke ta sigui tocante loke Dios ta bisa den Su Palabra tocante loke ta imposibel pa hende ta posibel cu Dios.

*********************************

Nos ta bibando den un era, den cual ta parce cu no tin nada imposibel mas pa e ser humano. Durante e ultimo shen aña di e siglo dos mil, tabatin un progreso increibel den e asina yama: “Sabiduria Humano.”

Ta durante e siglo ey, a bin e sabiduria pa combati hopi enfermedadmam cu antes a causa bida di masha hopi hende di babunan te na ancianonan. Mescos e tabata cu e medio di comunica for di un continente pa e otro. Pero tambe a bin e sabiduria pa produci armanan cu awe por destrui mayoria di bida ariba mundo.

Pero e mensahe cortico aki, no ta bai tocante e sabiduria di e mundo aki cu segun Scritura ta caba na nada. (Lesa 1 Cor. 2:6) Mi no kier meen cu tur sabiduria humano y tur descubrimento ta malo. Ma ta ora cu un ser humano pa medio di e asina yama Sciencia, ta rechasa e existencia di Dios basa ariba pruebanan scientifico.

Como cu e asunto ey di sciencia ta mucho complica pa mi, lo mi bai na Scritura pa proba cu pa medio di sabiduria humano e ta imposibel pa conoce Dios. Nos prome Scritura pa awe ta for di e buki di Romanonan Capitulo 1:18-20. “Pasobra e rabia di Dios a wordo revela for di cielo contra tur e impiedad y maldad di hende cu ta oprimi e berdad pa medio di nan maldadnan. Siendo cu loke por sea conoci tocante Dios, ta manifesta na nan, pasobra Dios a maniifesta esey na nan. Pasobra desde e creacion di e mundo Dios Su cualidadnan invisible – Su poder eterno y naturalesa Dibino – a worde mira claramente siendo comprendi for di e loke a wordo traha, di manera cu hende no ta dispensá.” (Sigui lesa henter e Capitulo)

Siendo cu Cristo ta enfatisa cu ta imposibel, pa hende conoce Dios pa medio di sabiduria humano, anto ta masha cla pa comprende cu e scientificonan cu tur nan sabiduria nunca por comprende e existencia di un Dios Todopoderoso cu a crea e cielonan y e tera y tur loke tin den nan. Den e buki di prome Corintionan uno, nos por lesa algun spiertamento hopi cla tocante sabiduria humano versus sabiduria di Dios. Den e porcion di Capitulo uno 17-18, nos ta lesa lo siguiente, “Pasobra Cristo no a manda mi pa batisa, ma pa predica e Evangelio, no cu palabranan di sabiduria humano, pa e crus di Cristo no perde su poder. Pasobra e mensahe di e crus ta locura pa esnan cu ta pereciendo, ma nos cu ta wordo salba e ta e poder di Dios. Pasobra ta para scirbi: Ami lo destrui e sabiduria di e sabínan, e inteligencia di e inteligentenan, lo Mi frustra.”

Un spiertamento simple, ta na su lugar aki. Nos no mester pensa solamente di e Scientificonan y e Maestronan bon educa, pasobra danki na Señor, cu pa Su gracia y misericordia a haci e posible cu tin pordon y bida eterno pa tur cu repenti di pica y kere e Evangelio. Si un Scientifico tende e Evangelio y repenti di su picanan y pone su fe den Cristo, e lo ricibi pordon y bida eterno hunto cu e otronan cu ta kere. Si un persona cu no tin bon educacion y e ta pober den cosnan material tende e mes un Evangelio y kere di curason e lo ricibi pordon y bida eterno mescos cu e Scientifico of cualke otro persona cu tende e Evangelio, y kere di curason manera nos por lesa den Romanonan 10:1-15. Pero si e Scientifico of esun cu no tin bon educacion rechasa e Evangelio ambos lo perece di mes manera.

Nos lo continua e topico aki cu un otro Blog.

E CRUS (continua)

2010-08-27T14:34:00.000-07:00

Aki Señor Henriquez ta admira e naturalesa aki na Canada. Loke boso ta mira ta un veld grandi (y masha hopi tin) di e grano cu yama CANOLA. E ta wordo usa pa traha azeta dushi. Podise boso tin e Azeta Dushi ey mes na Aruba. Check e!!

Dilanti loke boso ta mira ta un veld di trigo!

MA AWOR nos ta continua ariba "E CRUS"
Den nos prome mensahe relaciona cu e crus di Cristo segun Scritura, nos a menciona con Jesus a compara Su crucificacion, cu e colebra di brons cual Moises bou di e mandato di Señor, a lanta ariba un palo meimei di nan campamento. Lesa e relato ey den Numbernan 21:4-9.

Den e caso ey, ora cu un persona wordo mordi pa un colebra, e lo scapa su bida si e obedece y hisa su cara ariba na e colebra di brons. Esey ta nifica: “Obedece y biba, desobedece y muri.” Pa e autoridad di e Palabra di Dios, nos ta spierta tur hende na tur parti, cu nos ta bibando den un situacion similar awe. Nos tur a wordo venena dor di e Colebra Satanas. ( Y Scritura ta clarisimo mescos cu e solo cu ta briyando na e momento cu mi ta scribiendo e mensahe aki) y esey ta cu: “E pago di pica ta morto, ma e regalo di Dios ta bida eterno DEN CRISTO JESUS NOS SEÑOR.” (Rom. 6:23)

Segun e Palabra di Dios, no tin ni un hende husto den mundo, ni sikiera UNO. No tin uno cu ta comprende, ni uno cu ta busca Dios. Tur a desvia, y conhuntamente a bira inutil. No tin ni uno cu ta haci bon, ni sikiera uno. Nan garganta ta un graf habri, nan lenga ta practica mentira. Veneno di colebra ta ariba nan lip. Nan boca ta yen di maldicion y amargura. Nan pianan ta lihe pa drama sanger; ruina y miseria ta marca nan pasonan, y e camina di pas nan no conoce. No tin temor di Dios dilanti nan bisa.” (Romanonan 3:9-18)

Siendo cu ta asina e condicion spiritual di cada persona na cualke parti di mundo ta; nos mester duna tur atencion na e palabranan di Señor Jesus cu El a papia durante e mas of menos tres aña di Su ministerio publico, prome cu Su morto cologa ariba un crus. For di e tempo te awe, un gran cantidad di personanan a kere Su palabranan y a obedece. Pero mucho mas a dicidi di ignora pa desobedece e Evngelio di gracia di Dios; y asina enfrenta e dia di huicio eterno. E yamada di Dios awe den henter mundo ta pa nos repenti y kere e Evangelio. Un mirada di fe na Jesus crucifica, dera y resucita, den berdadero repentimento ta nifica pordon di pica y bida eterno na tur cu obedece.

Ma awor nos lo conclui cu un spiertamento solemne tocante e crus. E mes un colebra di metal, cual Señor nos Dios den Su sabiduria a usa pa scapa e bida temporario di e Israelitanan den e desierto; mas despues contra e proposito di Señor Dios, a bira un obheto di idolatria. A sosode cu e Israelitanan a keda cu e colebra di brons cu Moses a traha (obedeciendo e orden di Dios). Pero den e corida di tempo, nan a cuminsa ta kima incensia na e colebra di brons aki. Anto a tin un rebibamento durante e reinado di Rey Hezekia, y el a kibra e colebra di brons aki na pida pida. Y e Señor tabata cu ne.

Awor algo tocante e crus ariba cual nos Señor a wordo mata. Mi sabi cu lo tin diferente storia y comentario tocante e crus real ariba cual nos Señor a muri; pero personalmente mi no sabi nada concreto riba esey, Pero si mi por menciona e enorme cantidad di crusnan cu religioso y no religiosonan ta usando awe como un obheto di adoracion. Pa e autoridad di e Palabra di Señor nos Dios, mi ta adverti pa e posibilidad di ta carga un crus sea di brons of di palo of di oro of sea marca cu inkt na un persona su curpa; y sinembargo ta un enemigo di e Crus di Cristo.

Amigonan stima pa Dios Su mes; separa di repentimento y fe den Señor Jesus, Kende e Tata a lanta for di morto; no tin pordon di picanan. Y no tin salbacion den ningun otro pasobra no tin otro nomber bao di cielo duna na hende, pa medio di cual nos mester wordo salba. (Echunan 4:12). E mes Jesus cu a wordo mata ariba un crus, awe ta sinta na e man drechi di e Tata den e cielo. El a ricibi for di e Tata, e Nomber cu ta ariba tur pasobra no tin otro nomber bao di cielo duna na hende,, y pa e Nomber di Jesus tur rudia lo dobla, y tur lenga lo confesa cu Jesus ta Señor, pa Gloria di Dios e Tata. (Fil. 2:9-11)

Crus tabata un simbolo di maldicion, pasobra ta para scirbi: Maldiciona ta cada uno cu wordo cologa na un palo. (Lesa Galationan 3:13,14 y Genesis 21:22,23)

P’esey amigonan, na lugar di confia ariba un crus, confia ariba ESUN Kende a muri ariba un crus cargando nos picanan; y cu awor ta sinta na e man drechi di e Tata den cielo sperando pa e momento cu e Tata lo pone tur Su enemigonan como un banki pa Su pianan. (Lesa 1 Corintionan 15:20-28. Compara Hebreonan 1:13 y Salmo 110:1.

E CRUS

2010-08-21T10:28:00.000-07:00

Despues di un aña, Bicento y ami tabatin e privilegio grandi di bolbe pasa un siman y pico na "Sled Lake" - un lago cu ta keda un cinco ora di careda cu auto, den parti Noord di nos provencia. Tabata un regalo di nos sobrino David y su esposa Dianna. Tur dia nos a wak bina come yerba y pasa cas bebe awa! Un dia nos a wak 11 bina den un solo paseo cu auto den e sendanan den mondi! Masha bunita mes!

AWOR nos mensahe awe: E CRUS!

Den e buki cu nos ta yama E EVANGELIO segun Juan, capitulo tres versnan 1-21, nos por lesa e storia di Jesus siñando Nicodemo, kende tabata uno di e siñadornan principal den e lidernan religioso di Israel.

Aki Señor Jesus ta enfatisa cu ta imposibel pa un ser humano mira y drenta e Reino di Dios, si e no nace di nobo. Nicodemo na e momento ey a considera esey como algo imposibel, cu excepcion si un persona muri y bolbe nace pa di dos bes for di su mama. Aki ta unda Señor Jesus ta rebela na Nicodemo cu E no ta papiando di cosnan terenal, sino celestial. Y cu nunca ningun ser humano a yega di bai cielo, cu excepcion di Jesus Su mes Kende a bini for di cielo. Ma awor e Señor ta continua cu un declaracion cual ta enclui cada uno cu lo tuma tempo pa lesa e mensahe corto aki. Y e declaracion ta esaki: “Mescos cu Moses a halsa e colebra den desierto, asina y Yiu di Hende mester wordo halsa, pa tur cu kere den djE por tin bida eterno.”

Amigonan stima pa Señor Su mes; e storia aki tocanto Moses halsando un colebra den desierto, nos por les’e den e buki di Numbernan 21:4-9. (Lesa esey sin falta). Aki ta unda e Señor a manda colebranan venenoso meimei di e puebel, pa motibo cu nan a perde pasenshi contra Dios y contra Moses. Y hopi Israelita a muri mordi pa colebranan. E ora e puebel a realisa nan mal conducta y a bini cerca Moses reconciendo cu nan a peca contra e Señor y contra Su sirbidor Moses. Y nan a pidi Moses haci oracion pa nan. Anto Señor a bisa na Moses, pa e traha un colebra di brons, y pone ariba un palo unda tur cu a wordo mordi pa colebra por mira na n’e y biba.

E historia berdadero aki ta pa siña nos awe cu nos tambe por biba si nos repenti di nos picanan y mira na Cristo, Kende a wordo colga ariba un crus, pa E por salba nos for di e veneno mortal di pica causa pa e Colebra Satanas.
(Lesa Reb. 20:1-3 y 1 Pedro 5:5-10).

Ademas di tur e berdadnan importante cu nos por siña tocante e loke Scritura ta presenta como: “E crus di Crusto”. (Lesa por ehempel: 1 Cor. 1:17-31; Gal. 5:11; Gal. 6:12-14; Col. 1:20; Col. 2:13-15 y Heb. 12:1-3)

Lesando tur e scrituranan ey cu reverencia y oracion den nos curason, nos por mira claramente e balor inexplicable cu ta encera den e morto di Señor Jesus, ariba un crus pa nos. Anto na di tres dia despues di Su morto, Dios e Tata, a dun’e bida atrobe, y a hals’E te den halturanan. (Lesa 1 Pedro 2:20-25).

Sinembargo Scritura tin un spiertamento solemne relaciona cu e crus di Cristo. Nos ta combida bo pa lesa sin falta nos proximo mensahe relaciona cu e Crus.

Nos lo sigui e tema aki den nos siguiente blog, si Dios permiti! Pues, te otro dia!!

2010-07-18T08:53:00.000-07:00

E baby bina aki a nace na e cunucu di mi sobrino den e siman cu a pasa. Tin un famia di bina cu ta biba den e mondinan rond di su habitacion, y bistanan asina ta algo di tur dia! E mama y tata ta hopi protectivo di nan "bambi" chikito!

Pordon di picanan ta uno di e doctrinanan fundamental di Scritura. Si un persona ta muri sin ricibi pordon, ta nifica cu e ta muri bou di condenacion eterno.

E ta imposibel pa ami splica e detayanan cu ta compaña e declaracion di condenacion eterno. Esey ta enclui pa finalmente wordo tira den e tanki di candela.

Den e Buki di Rebelacion 20:11-14, nos ta lesa lo siguiente., “E ora mi a mira un trono grandi y blanco, y Esun cu tabata sinta ariba dje. Tera y cielo a hui for di Su presencia, y no tabatin lugar pa nan. Y mi a mira e mortonan, grandi y chikito para dilanti di e trono, y e bukinan a wordo habri. Un otro buki a wordo habri, cual ta e buki di bida. E mortonan a wordo huzga di acuerdo cu loke nan a haci, cu ta scirbi den e bukinan. Laman a entrega e mortonan cu tabata den dje, y morto y hades a entrega e mortonan cu tabata den nan, y cada persona tabata huzga di acuerdo cu loke el a haci. E ora morto y hades a wordo tira den e tanki di candela. E tanki di candela ta e segundo morto. Si algun su nomber no a wordo haya scirbi den e buki di bida, el a wordo tira den e tanki di candela.”

Manera ya mi a menciona, cu ta imposibel pa mi splica e detayanan cu ta encera den henter e episodio aki, manera como ehempel: E personanan cu nunca a tende e Evangelio, y e muchanan, y esunnan cu ta mentalmente retarda of incapacita, etc.
Pero di un cos sí mi ta sigur, y esey ta cu ta imposibel pa nos Tata Celestial comete un solo unhusticia.

Awe pordon di picanan ta sigui wordo proclama den tur nacion den e Evangelio. Despues di Su resureccion nos Señor a aparece varios bes na Su discipelnan y algun otro persona. Den Lucas 24:1-52, nos por lesa algun di nan. Versnan 44-49 ta bisa nos lo siguiente: “El a bisa nan; esaki ta loke Mi a bisa boso mientras cu Mi tabata cu boso ainda: Tur cos mester wordo cumpli di loke ta scirbi tocante di Mi den e Ley di Moses, e profetanan y e Salmonan.” E ora El a habri nan mente pa nan por comprende e Scrituranan. El a bisa nan; “Esaki ta loke ta scirbi: E Cristo lo sufri y lanta for di morto ariba e di tres dia, y repentimento y pordon di picanan lo ta predica den Su nomber na tur nacionnan, cuminsando na Jerusalem. Boso ta testigonan di e cosnan aki. Mi ta manda boso loke Mi Tata a priminti, pero keda den e ciudad te ora cu boso a wordo bisti cu poder for di Ariba.”

Aki amigonan di tur edad, nos por lesa hopi cla cu nos ta bibando den e tempo cu pordon pa tur nos picanan ta posibel pa motibo di loke Cristo a haci pa nos. Repentimento ta indispensabel, pasobra sin repentimento no tin pordon. Lesa Echunan 2:37, 38, Echunan 17:30 y 2 Pedro 3:9. Pa un mihor comprendemento tocante e tema aki, busca un Beibel. Y si ya bo tin un caba, sac’e fo’i cashi, y cuminsa lesa den dje cu tur sinceridad, pidiendo Señor na e mes un tempo pa Su yudansa. Sea sigur cu E lo yuda bo, pasobra no ta Su boluntad pa un solo persona bai perdi. Kere den Señor Jesus, y sea salba, abo y e hendenan di bo cas. (Te un otro ocasion)

PORDON DI PICANAN

2010-06-25T10:38:00.000-07:00

Riba e foto aki boso ta mira Bicento y ami cu tres cuña cu a bin bishita nos! Tur tres tin mas cu 90 aña! Nan ta entre 91 y 96 - hopi balente!! Nan ta yamá: Edna, Elsie y Salome. Tur a yega di bishita Aruba!

*************

Awor: Lesa nos meditacion tocante loke Dios ta bisa nos den Su Palabra tocante PORDON DI PICANAN!

Si Señor nos Dios no a haci loke tabata imposibel bira possible pa nos, ningun ser humano lo a scapa condenacion eterno. Awe pordon di picanan y bida eterno ta ser proclama na nos tur, den e bon noticia, esta, “E EVANGELIO”.

Pero e pordon aki di cual Scritura ta enfatisa, ta ofreci na nos di gracia; pasobra un otro a paga e preis. Pasobra e pago di pica ta morto; y no tin excepcion di persona, pasobra tur ser humano ta culpabel di pica. Señor Jesus durante Su bida den un curpa manera esun di nos, ta e unico cu nunca a peca. Y pa e motibo ey E tabata e unico cu por a carga pica di humanidad completo den Su curpa ariba e crus. Y siendo sin culpa y sin mancha, Dios e Tata a lant’E for di morto y dun’E bida di nobo. Si Cristo no a wordo lanta for di morto, tur cu ta profesa y confesa di tin fe awe, ta hasi esey pornada. P’esey, pordon di picanan ta basa riba e morto y e resureccion di Señor Jesus pa nos. (1 Cor. 15:12-29)

P’esey amigonan stima, pa nos Tata Celestial, pordon di pica no ta nifica simplemente un dispensa pa nos ofensa contra Dios; ma loke pordon ta nifica ta: cu un persona inocente y sin culpa, a ricibi y carga nos picanan den Su curpa ariba un crus, y asina a ricibi e castigo cu nos a merece, cual ta: “Morto”. Tal amor y sacrificio ta imposibel pa wordo splica humanamente. Pero den Scritura e Spirito Santo di Dios ta revela na nos, cu ta e amor cu Dios tin pa humanidad ta tras di e echo inexplicable aki. Y ta pa e motibo ey nos ta wordo spierta den Scritura na lo siguiente: “Pasobra si e palabra papia pa medio di angelnan a keda proba di ta firme, y tur transgression y desobediencia a ricibi su castigo husto, con nos lo scapa si nos ignora un salbacion asina grandi?

E prome persona cu a anuncia e salbacion aki, tabata nos Señor Su mes. Y esunnan cu a scuch’E a confirma esey na nos. Ademas Dios Su mes a testifica hunto cu nan pa medio di señalnan y maraviyanan y milagernan, y pa medio di donnnan di Spirito Santo comparti di acuerdo cu Su boluntad.
(Lesa Hebreonan 2:1-4). Otro Scritura ta bisa nos lo siguiente: Y no tin salbacion den ningun otro, pasobra no tin otro nomber bao di cielo duna na hende; pa medio di cual nos mester ta salba.” (Echunan 4:12.

E Apostel Pablo, kende prome di a kere e Evangelio y ricibi for di Señor e autoridad pa ta un Apostel, ta bisa nos lo siguiente, “Ami no tin berguensa di e Evangelio, pasobra e ta e poder di Dios pa Salbacion di tur of cada uno cu ta kere; prome pa e Judiu, y tambe pa e Griego of paganonann. Pasobra den e Evangeleo un husticia for di Dios ta revela, un husticia cu ta pa medio di fe pa fe, manera cu ta scirbi: E husto lo biba pa medio di fe: (Romanonan 1:16,17)

Di manera anto amigonan; pa medio di e mensahe aki cu ta basa ariba e palabra di Dios, bo ta keda recorda cu Dios ta stima bo, y El a prove salbacion pa cada uno di nos. Y esey ta enclui, e pordon di tur nos picanan, y bida eterno. Manera ta para scirbi: “ Dunando gradicimento na e Tata, Kende a cualifica nos pa tin parti den e erencia di e santonan den e reino di lus. Pasobra El a rescata nos for di e dominio di scuridad y a trece nos den e reino di Su Yiu stima, den Ken nos tin redencion, e pordon di picanan.

Nos lo continua e topico aki ariba un otro BLOG.

E DIA DI HUICIO

2010-06-06T09:01:00.000-07:00

FOTO: Bicento ta cla pa bai dal un keiro chikito den e cunuco!

E Dia Di Huicio
Scritura Santo ta bisa nos enfaticamente cu lo tin un dia di huicio, of sea un dia den cual Dios lo huzga henter mundo, esta humanidad completo. Den e buki di Echunan capitulo 17 y versnan 30,31; nos ta lesa lo siguiente, “Den tempo pasa Dios a pasa por alto e temponan di ignorancia, ma awor E ta comanda tur hende na tur parti pa nan repenti. Pasobra El a fiha un dia cu El lo huzga e mundo cu husticia, pa medio di e homber cu El a apunta. El a duna prueba di esaki na tur hende, dor di a lant’E for di morto” (of: for di e mortonan). Otro Scritura ta, Rebelacion 20:11-14.

Di un cos nos por ta sigur, y esey ta cu ningun ser humano lo scapa for di e husicio aki, Ta masha importante pa nos tene na cuenta cu e huicio of huzgamento aki tin di haci cu pica. Ademas ta hopi importante pa nos sabi cu no tin ni un ser humano cu nunca a of ta peca. Scritura ta enfaticamente cla tocante e tema ey, tanto den Testamento Bieu como den e Testamento Nobo.

Ehempel: E profeta Isaias ta scirbi lo siguiente: “Pasobra nos tur a bira manera un cu ta impuro, y tur nos echonan di husticia ta manera lapinan sushi; nos tur ta marchita manera foyonan, y nos picanan ta hiba nos manera biento. Ni un ta yama na Bo nomber, of ta haci esfuerso pa tene na Bo; pasobra Bo a sconde Bo cara pa nos, y a haci nos caba na nada pa motibo di nos picanan.” (Isaias 64:6-7) Si ta possible, lesa e porcion ey den mas cu un idioma y den mas cu un version, pasobra e ta enclui nos tur sin excepcion.

Mescos den Testamento Nobo nos ta lesa lo siguiente: “Kico nos lo conclui anto? Nos ta miho cu nan? Di ningun manera! Ya nos a culpa cu tanto Judiunan y paganonan tur ta bou di pica.” Manera ta scirbi: “No tin ni un husto, ni sikiera un; no tin ni un cu ta comprende, ni un cu ta busca Dios. Tur a desvia, hunto nan a bira inutil. No tin ni un, cu ta haci bon, ni sikiera un. Nan garganta ta un graf habri, nan lenga ta practica mintira. Veneno di colebra ta ariba nan lip. Nan boca ta yen di maldicion y amargura. Nan pianan ta lihe pa drama sanger; ruina y miseria ta marca nan pasonan, y e camina di pas nan no conoce. Y reverencia pa Dios, nan no tin.”

E Scrituranan ey ta tuma for di mas cu un traduccion, y ta di Romanonan 3:9-18. Compara: Salmo 36:1-4, Salmo 14:1-3 y Isaias 59:1-8. Tuma tempo pa lesa e Scrituranan ey y comprende cu ta nos tur ta enclui. No ta haci diferencia sea ta pober of rico, bon educa of un peon. No ta haci diferencia den nacion of e color, etc., etc. Ta nos tur ta enclui.

E huicio di Dios ta sin excepcion. Siendo cu ta asina e situacion ta; kico nos mester haci pa scapa e huicio di Dios?

Amigonan, danki na Señor cu nos tin BON NOTICIA cu ta scirbi hopi cla den e Scrituranan mes. E mes un Dios contra Kende nos tur a peca, ta stima nos asina tanto, cu El a duna Su unico Yiu, pa tur cu kere den Dje, no bai perdi, ma haya bida eterno. Si; e bida eterno ta e loke ta ofreci na cada uno di nos den Cristo, nos Señor. Señor Jesus a entrega Su mes boluntariamente como sacrificio pa nos picanan. Esey ta nifica cu El a carga e pica di henter humanidad den Su curpa ariba e crus, pa nos libra di pica, por biba pa husticia.

Amigonan stima, segun e Scritura cu nos por lesa den Echunan 17:30,31, ya e tempo di ignorancia a pasa,. Sinembargo, Scritura ta bisa nos, cu Satanas ta sigui gaña humanidad, y multitud di hende den tur nacion ta sigui den ignorancia dor di ignora e Evangelio di Gracia di Dios. Asta den e tres islanan aki di abla Papiamento, tin miles di almanan precioso cu ta sigui confia den nan propio husticia, y den un of otro religion cu no por salba.

Cu lagrima y berguensa nos mester admiti, cu te awe tin miles di almanan cu ta spera te ariba e dia di huicio, pa nan sabi sin nan bon obranan ta mas cu nan picanan, y asina haya salbacion. Scritura ta bisa masha cla, cu Señor nos Dios ta manda na tur hende na tur parti, pa nan repenti. Esey ta nifica pa nos reconoce nos picanan, y pone nos fe den e Yiu di Dios, Kende a carga nos picanan den Su curpa ariba e crus. Obedece e Evangelio awe y sea reconcilia cu Dios. Sea liber pa pasa e mensahe aki na tur bo amigonan. Y sea liber pa preguntanan of observacionnan.

E TOU DI SEÑOR

2010-05-10T09:48:00.000-07:00

Si Señor permiti, den dos siman nos tin plan di bai "Sled Lake" y bolbe pasa algun dianan ey den cabina di nos sobrino David! E fotonan a wordo saca na luna di September, aña pasa! Dushi pa sinta combersa rond di candela y wak e lago!! Y pisca tambe!!

Despues di Su resureccion Señor Jesus a aparece na varios persona encluyendo e Apostelnan cu El a scohe. Y di e manera ey El a duna pruebanan pa convence nan cu E ta na bida. (Ech. 1:1-9)

Y den Reb. 1:1-20, Señor Jesus a manifesta Su mes den otro forma na e Apostel Juan. Den e versiculonan 17,18, nos ta lesa lo siguiente, “Ora cu mi (Apostel Juan) a mir’E, mi a cai na Su pia manera morto. E ora El a pone Su man drechi ariba mi bisando: No tene miedo, Ami ta e prome y e ultimo. Ami ta Esun cu ta biba; Mi tabata morto, y ata Mi ta na bida pa semper y semper! Y ami tin e yabinan di morto y Hades.” Segun Scritura, Señor Jesus ta e prome cu a resucita for di e mortonan. Y ora cu E bolbe, esunnan cu ta kere den djE lo resucita den un curpa glorifica. Siendo cu te na e momento cu mi ta scirbiendo aki, Cristo no a bolbe ainda; ta nifica cu ningun di esunnnan cu a muri den pasado, no a resucita ainda. Scritura ta bisa nos bon cla, cu nos Señor JesuCristo ta e prome persona cu a wordo lamta for di e mortonan.

Ademas Scritura ta enfatisa cu ta Dios, e Tata a dun’E bida for di morto. Y Scritura ta bisa nos masha cla cu esunnan cu a muri den Cristo, no a resucita ainda. Ma nan lo resucita ora cu nos Señor lo bolbe y no prome. Prome Corintio 15:23 ta bisa lo siguiente, “Ma cada un segun su mes orden (of turno) Cristo ta e prome fruta, despues di esey, esunnan cu ta di Cristo na Su binida.” (Lesa pa fabor 1 Cor. 15:12-33)

Den nos traduccion na Papiamento nos tin, - “fruta” den 1 Cor. 15:20 y 23. Pero mira e traduccion na Ingles cu ta pone “frutanan” enbes di “fruta”. Pasobra Cristo ta e number uno for di un multitud cu lo resucita ora cu Jesus ta bolbe. Un otro porcion di Scritura importante relaciona cu e doctrina aki tocante e resureccion ta 1 Tes. 4:13-18 compara e Scritura ey cu 1 Cor. 15:51-58. Aki nos ta haya scirbi cu e resureccion ta tuma lugar rapido, y no ta asunto di mira aki of mira aya. Anto pa depues e dunador di noticianan bai na TV y duna tur sorto di comentario bruha den otro. Absolutamente no!

E traduccion na Papiamento ta bisa: “Den un momento, den un frega di wowo…” etc. Pero e traduccion na Ingles ta busa: “den un momento”, den bisa un “kinipi di wowo.” Etc. Na Hulandes ta bisa, “In een ondeelbaar ogenblik.”

Amigonan y rumannan, esaki ta un asunto masha serio mes, pasobra e cosnan aki a wordo scirbi pa nos tur por siña for di nan. Scritura ta pone enfasis ariba e ultimo dianan bisando na nos cu lo bini temponan peligroso. Y e motibonan pa esey tambe ta scirbi pa nos sabi. Ata aki algun di e motibonan pakico temporadanan malo ta bini riba mundo. 2 Tim. 3:1-5 ta bisa lo siguiente: “Pero marca esaki: Lo tin tempo teribel den e ultimo dianan. Hende lo bira stimado di nan mes, stimadonan di placa, gabador, orguyoso, abusador, desobedecido na nan mayornanm ingrato, impio, sin amor, no ta pordona, ta gusta plama redashi, sin domino propio, grosero, ta odia loke ta bon, tracionero, imprudente (of prufia) soberbe, stimado di placer na lugar di stima Dios. Tin un apariencia di ta deboto, pero ta nenga su poder.” Lesa e porcion aki, y compara esey cu nos situacion actual mundialmente.

Amigonan y rumannan den e fe. Sigur cu ta bon pa nos reuni como Iglesia fielmente. Pero nos no mester tuma esey como complimento di un deber unicamente. Anto e resto di siman nos ta biba manera nos ta lesa den 2 Tim. 3:1-9. Ta pa e motibo ey, e Spirito Santo a guia e Apostel pa scirbi lo siguiente na Timoteo: “Den e presencia di Dios y di Cristo Jesus, Kende lo huzga e bibonan y e mortonan, y na bista di Su aparicion y Su Reino, mi ta duna bo e encargo aki: Predica e Palabra, sea prepara na tempo y for di tempo; coregi, reprende, y incurasha, cu gran pasenshi y instruccion cuidadoso…”, etc., etc.

Rumannan stima, y co-pastornan, y tur cu ta den e ministerio di e Evangelio: Mescos cu e Apostel a spierta Timoteo, mescos e ta spierta nos awe y ta encurasha nos pa tene firme na e Palabra di Dios, y asina evita doctrina cu ta falso. Himeneo y Fileto a desvia for di e berdad, y nan tabata bisa cu e resureccion a pasa caba, y asina tabata trastorna of destrui cu fe di algun di e rumannan. (2 Tim. 2:16-18)

Mi ta combida rumannan pa lesa e cartanan scirbi na Timoteo y esun scirbi na Tito. Pasobra tin hopi spiertamento tocante siñansa y doctrina falso den e cartanan ey. Sea liber pa pregunta pf observacion. Te otro ocasion....

CUIDA E TOU (parti 1)

2010-05-01T14:35:00.000-07:00

Zoyando riba un cerito na canto di un riu! Nunca muchu bieu pa zoya!!

Den e prome carta di e Apostel Pedro nos ta lesa con e Apostel ta spierta e ancianonan di Iglesia, pa nan pastoria e tou di Dios cu ta na nan encargo. Y pa nan haci esey boluntariamente y no como un obligacion. Tampoco pa e placa cu nan por ricibi, y ni como un cu ta manda ariba loke ta pertenece na Señor, ma como ehempelnan pa e tou. “Anto ora cu e Gran Wardador aparece, boso lo ricibi un corona di gloria cu nunca lo caba”. Lesa: 1 Pedro 5:1-4.

E tempo di carne, a pasa pa Aruba. Pero antes nos tabatin hopi cunuceronan cu tabatin nan tou di carne. Durante dia mester a cuida y alimenta nan, y durante anochi nos tabata sera nan den nan cura como proteccion. Nan tabata depende totalmente ariba nan Wardador dia y anochi. Y ora cu uno di nan dwal for di e tou, e wardador ta busca esun perdi te ora cu nan hay’e. Y na lugar di castiga e carne cu a dwal, e wardador, cu ta doño tambe, ta keda masha contento mes. Y asta e por gaba cu su amigonan con el a haya su carne cu tabata perdi sano y salvo.

Manera ya menciona, carne ta depende completamente ariba nan cuidador y guiador. Pero un di e caracteristiconan di carne ta, cu si uno bai den mal direccion, otronan ta sigui su tras ciegamente. Mescos e ta den e Iglesia di Dios bibo awe. Hopi bes ora cu un di e rumannan scohe un camina robes, otro rumannan cu ta debil den e fe ta cla pa sigui nan tras. E ora esey ta bira un carga pa esun cu ta encarga pa cuida e tou di Dios, pa purba trece e rumannan aki den e bon camina cu yudansa di e Spirito di Dios y un curason umilde.

Relaciona cu e doctrina aki tocante un persona cu a ricibi e encargo for di Señor pa cuida e miembronan den e curpa di Cristo esta e Iglesia di Dios bibo; nos ta haya un spiertamento solemne den Ezekial capitulo ocho y nuebe - den Testament Bieu. E ta hopi importante pa cada uno di nos cu a ricibi e encargo pa cuida e tou di Señor, pa nos lesa e dos capitulonan cu tur reverencia. Mi no por bisa cu e porcion di scritura aki ta facil pa comprende; pero, sí, e por sirbi pa yuda nos comprende e spiertamento cu ta duna na nos como pastornan, etc., cu ta encarga dor di e Spirito Santo pa alimenta e Iglesia di Señor.

Pone atencion unda e ta bisa: “Cuminsa na Mi Santuario” (Ezekial 9:6). E promenan cu a wordo castiga severamente tabata e lidernan spiritual. Y nos por ta sigur cu e cosnan ey a wordo scirbi pa nos cu a ricibi e encargo pa cuida y alimenta e puebel di Dios yama e Iglesia di Dios bibo, pilar y fundeshi di berdad. (1 Timoteo 3:14,15). Nos ta e promenan pa ricibi disciplina for di Señor. Y nos mester ta e promenan pa repenti di nos propio erornan prome cu nos ta reprende e erornan di nos otro rumannan.

E buki di Rebelacion ta cuminsa cu e declaracion aki: Dios, e Tata, a duna na Señor JesuCristo, e rebelacion cu ta sigui den henter e buki di Rebelacion. Pa E mustra na Su sirbidornan loke mester tuma lugar pronto. (Reb. 1:1-3)

Pa e autoridad di e Palabra di Dios, mi por bisa, cu e promenan pa ricibi e mensahe aki for di nos Señor JesuCristo, ta nos cu a ricibi e gracia pa cuida e Iglesia di Dios. Nos mester ta na wowo cla tocante doctrinanan fundamental pa nos mes, y pa e puebel di Dios. Nos ta e promenan cu mester pone atencion na e spiertamentonan relaciona cu e ultimo dianan.

E Apostel Pablo ta bisa lo siguiente na Timoteo, y na nos: “Den e presencia di Dios y di Cristo Jesus, Kende lo huzga e bibonan y e mortonan, y na bista di Su aparicion y Su Reino, mi ta encarga bo: “Predica e Palabra; sea prepara na tempo y for di tempo; corrigi, reprende y encurasha cu hopi pasenshi y doctrina. Pasobra e tempo lo bini ora cu hende lo no soporta doctrina sano mas, ma na lugar di esey nan lo acomula hopi siñadornan pa bisa nan loke nan orea cu ta kishiki kier scucha; y nan lo bira nan orea for di e berdad, y bolbe na fabula.” (2 Timoteo 4:1-8)

Aki nos ta wordo spierta hopi cla mes tocante e loke ta Señor Su boluntad pa nos predica y siña. “E PALABRA” y “DOCTRINA SANO”. Cada uno di nos na kende Señor a duna e encargo pa cuida y alimenta Su puebel, mester repenti y bolbe na e Palabra y Doctrina Sano. Y rumannan, esey ta inclui lucha spiritual te na e final di nos bida.

No lo sigui den un otro Blog.

FE, SPERANSA y AMOR (continua)

2010-04-22T09:01:00.000-07:00

E FOTO: Saca na Aruba na aña 2007 - nos ta soñando cu nos por haci esey un biaha mas!! - esdicir cana na canto di laman!Nos ta pidi boso yuda nos busca un lugar pa biba na Aruba, unda nos por pasa nos ultimo dianan trankilo - no mester ta luhoso, ma simpel y comfortable! Danki pa vigila pa nos y laga nos sabi. Nos pensamento ta pa banda di fin di Agosto of principio di September.

AWOR E PALABRA pa awe:

Den nos ultimo mensahe nos a menciona, cu amor ta fruta di Spirito Santo cu ta duna na cada persona cu a tende Evangelio y a kere y repenti di tur pica.

E mensahe aki ta wordo duna fielmente door di Scritura den diferente forma. Nos ta lesa hopi cla cu ta Dios Su boluntad pa tur hende tende e Evangelio; pasobra fe ta bini via tendemento, y tendemento di e mensahe, of e Palabra di Cristo. Pues, pa un hende kere e Evangelio, e mester tende esey prome. Y pa e tende, un persona mester bisa esey. Y ta esey nos ta haciendo via di e mensahe cortonan aki. Nos ta haci esaki pa spierta y encurasha otro almanan precioso cu ainda ta morto den picanan, pa scapa e huicio di Dios cu ta bini, door di obedece e Evangelio di gracia di Dios.

E palabra “EVANGELIO” ta nifica “BON NOTICIA”. E bon noticia ta, cu Señor Jesus a muri pa nos ariba un crus, cargando nos picanan den Su curpa. El a muri pa picanan cu no ta di djE, sino di cada un di nos. Y na di tres dia e Tata a dun’E bida atrobe, y a permiti pa El a wordo mira pa un tempo di cuarenta dia door di varios persona. Y den un ocacion El a aparece na mas cu (500) rumannan hunto na e mes un tempo. (1 Cor. 15:3-8)

Den nos ultimo mensahe nos a menciona e tres birtudnan relaciona cu e Evangelio, cualnan ta: Fe, speransa y stimacion, y cu e di mas grandi di esakinan ta stimacion of amor. Pero, pa nos comprende e declaracion ey unda e Apostel ta bisa cu amor ta mas grandi cu fe y speransa, nos mester studia otro scrituranan cualnan ta papia cu nos tocante e mes topiconan ey.

Pa cuminsa nos tuma e capitulo 12 di 1 Corintionan, unda e Apostel ta papia di e diferente donnan spiritual, cu ta wordo duna na cada berdadero keredor, door di e Spirito Santo. Pues; ta e Spirito Santo ta dicidi ta cual don cada keredor lo ricibi pa bon di e curpa completo, esta, e Iglesia di Dios bibo, e pilar y fundeshi di berdad. (1 Tim. 3:15).

Pues aki no ta asunto cu cada un di nos cu ta kere e Evangelio di gracia di Dios, por scohe e don cu nos kier of gusta. Nos mayornan tampoco tin e autoridad pa scohe nos ministerio spiritual pa nos. Ni e minister of e pastor di un congregacion tin e autoridad ey. Esakinan por encurasha y yuda, etc., pero ningun por scohe un don spiritual pa un otro ruman den Cristo.

Un don ta un regalo, e ta algo cu ta duna na un persona. Siendo cu nos ta papiando di amor aki, tur loke nos ta purba haci ta, pa proba for di Scritura cu: “Amor berdadero ta un regalo di Dios na tur cu ta kere den nos Señor JesuCristo.” Di acuerdo cu Scritura, salbacion y bida eterno ta regalo di Dios, cu ta ser ofreci na tur hende via e Evangelio cu nos ta proclama. Efesionan 2:8-10 ta bisa nos masha cla mes cu: “Pasobra ta pa gracia boso a wordo salba pa medio di fe, y esaki no ta for di boso mes, e ta e regalo di Dios. No pa medio di obranan, pa ningun hende por gaba.” Of: “di manera cu ningun hende por gaba.”

Amigonan stima pa Dios Su mes, y pa kendenan Cristo a muri y a resucita; Scritura ta papia masha hopi mes tocante e regalo di amor di Dios cu ta duna na nos den Cristo door di e Spirito Santo. Y e proposito ta pa nos practica esey den nos bida diario durante e pruebanan cu cada uno di nos lo enfrenta. Lesa di nobo 1 Cor. 13: 1-13 y medita ariba cada palabra.

2010-04-06T09:02:00.000-07:00

Un poco nostalgia pa Aruba!

Prome Corintionan capitulo diestres ta unda cu e Apostel Pablo a infatisa e tema di amor, como e don di mas importante den bida di un cu ta kere e Evangelio di gracia di Dios.

E Apostel a dirigi e mensahe aki na e personanan cu a kere e Evangelio ey na Corintio. Prome cu esaki, el a papia cu nan den capitulo diesdos tocante e diferente donnan cu e Spirito Santo di Dios ta duna na cada uno cu ta kere. Nos ta pidi cada uno pa lesa 1 Corintionan 12:1-31; y tambe Efesionan 4:1-16. Ma awor, pone atencion cu no ta tur cu ta kere e Evangelio tin e mes un donnan.

No ta tur ta Apostel, no ta tur ta siñador of predicador, etc. Pero amor ta fruta di Spirito Santo cu ta duna na cada pecador cu repenti di su bida di pica, y pone su fe den e Yiu di Dios cu ta nos Señor y Salbador JesuCristo; pa pordon di picanan y bida eterno. Galationan 5:22, ta bisa lo siguiente: “Ma e fruta di e Spirito ta amor, goso, pas, pasenshi, cariño, bondad, fielded, mansedumbre, y dominio propio.” Pues, aki nos ta haya scirbi hopi cla, cu amor ta fruta di e Spirito Santo den e bida di cada uno cu tin fe den Cristo.

Sinembargo, mescos cu e otro donnan mester wordo practica, of sea poni na practica den momentonan di prueba, mescos e ta cu e amor di Dios cu ta duna na nos den Cristo nos Señor. Tuma cada uno di e frutanan di Spirito Santo, y compara nan cu e pruebanan menciona manera: amor, goso, pas, etc., etc. Tanto ta amor como e otro birtudnan, ta bini na claridad durante pruebanan diario. Prueba na cas, prueba na trabao, prueba entre esposo y esposa. Prueba entre mayor y yiunan. Prueba entre e keredor y e systema di mundo.

Mira cuanto di nos cu ta profesa fe den Cristo awe, ta sigui e systema di mundo cu ta wordo goberna pa e prins di scuridad cu ta Satan. Pone atencion cu den e fruta di Spirito Santo, nos ta haya dominio propio.

Test y pruebanan ta confronta nos via Television y Literatura binti cuater ora pa dia. E prueba di mas persistente cu a persigui e Iglesia di Dios bibo durante e siglonan, ta pa tuma parti den e custumbernan pagano. Y uno di esakinan ta pa sea parcialmente desnudo den e mundo feminino, Mientras cu e keredornan masculino ta duna nan aprobacion sea cu silencio of indiferencia.

Pone bon atencion rumannan loke e Apostel ta spierta nos di dje, prome cu e ta trece e fruta di Spirito Santo padilanti. Den e versiculonan 19-21, e ta menciona e obranan di carni di cualnan nos tur a experimenta di un of otro manera prome cu nos a tende e Evangelio bendiciona di Dios.

Entre otro e ta menciona: inmoralidad sexual, impuresa, idolatria, bruheria, envidia, buracheria, etc. Anto e ta conclui cu e spiertamento solemne aki bisando, “Mi ta spierta boso, mescos cu mi a haci caba anteriormente, cu esunnan cu ta biba di e manera ey lo no ereda e Reino di Dios. Lesa Galationan 5:19-21. Otro Scritura ta declara lo siguiente: “Boso no sabi cu e malbado lo no ereda e reino di Dios? No sea gañá: ni esnan cu ta sexualmente inmoral, ni e idolatranan, ni e adulteradonan, ni e homosexualnan, ni e ladronnan, ni esunnan cu ta golos pa placa, etc., lo ereda e reino di Dios.” 1 Cor. 6:9-11. Manera nos a mira caba, cu amor of stimacion ta fruta di Spirito Santo. Y e stimacion aki ta wordo yama; E amor di Dios drama den nos curason door di e Spirito Santo cu Dios a duna nos. Lesa Romanonan 5”1-5.

Den otro palabra, e amor di cual nos ta papiando aki, ta e amor di nos Tata Celestial Su mes, Y e amor aki no ta posibel separa di e Spirito di Dios. Y separa for di repentimento di nos picanan, y fe den e Yiu di Dios Kende a muri pa nos picanan ta imposibel pa e Spirito aki biba den nos.

Nos lo continua….

AMIGO of ENEMIGO (ultimo di e series aki)

2010-03-29T08:46:00.000-07:00

Señor Dios Su boluntad ta, pa tur hende tende e Evangelio, y pa tur cu tende por repenti y kere y ta salba. Segun Scritura, sin repentimento no tin pordon. Nos ta bibando den e era di gracia den cual Dios Su boluntad ta pa tur hende na tur parti di mundo REPENTI. Pasobra El a fiha un dia den cual E lo huzga e mundo cu husticia pa medioa di un Homber cu El a apunta pa esey. El a duna prueba di esaki na tur hende dor di a lant’E for di morto.

Laga cada un di nos comprende cla, cu aki ta tur hende dim undo ta enclui sin excepcion. Cristo a muri y resucita pa cada uno di nos. Dios ta stima cada ser humano, y E no kier pa uno bai perdi. Y El a demonstra esey den cu E no a spar ni Su propio Yiu, ma El a dun’E pa nos tur. Un di e hopi spiertamentonan cu tin den Scritura, ta esaki: “Con anto nos por scapa si nos neglisha un salbacion tanto grandi asina?”

Ma awor, siendo cu nos no por nenga e facto cu Dios ta stima humanidad, y cu no ta Su boluntad pa uno bai perdi; pakico anto e gran mayoria di sernan humano ta prefera pa sigui biba den pica na lugar di repenti di pica y ricibi e pordon y salbacion cu ta ofreci na cada uno di nos den e Evangelio di Cristo?

E contesta nos ta haya den Scritura Santo cual nos ta yama “Beibel”. Pesey tuma bo Beibel y lesa, pidiendo Dios na e mes un tempo pa E yuda nos comprende y obedece. Probablemente tur ser humano a tende cu tin un ser cu yama Diabel of Satanas. Y segun Scritura, esaki ta esun cu ta gaña e nacionnan. Pero mayoria di humanidad ta trankilo den e situacion ey di mintira y mas mintira. Beibel ta declara cu henter mundo ta drumi den e malbado, of bou di Su control.

Con por ta possible pa nos sigui biba sin ni un tiki di temor apesar cu nos Señor a spierta bes tras bes tocante e peliger di candela eterno? Scritura ta bisa nos lo siguiente, “ Y te asta si nos Evangelio ta cubri (tapa cu un mantel) e ta cubri pa esunnan cu ta pereciendo. E dios di e era aki a ciega e mente di e incredulonan, pa nan no mira e lus di e Evangelio di e Gloria di Cristo, Kende ta e imahen di Dios. Lesa 2 Cor. 4: 1-7 (si ta possible den mas cu un version).

Aki Satan ta esun cu ta ciega e mente di e persona cu no ta kere e Evangelio. Particularmente un persona cu a tende e Evangelio un biaha y mas cu un biaha. Pa un of otro motibo e persona aki ta nenga e bon noticia di pordon y bida eterno a base di repentimento y fe den Cristo. Y siendo cu ta e Spirito Santo di Dios ta convence nos di pica y di huicio; ta nifica cu e persona cu rechasa e bon nobo aki di pordon y bida eterno, ta rechasa ciegamente e amor di Dios e Tata, y e sacrificio di Señor Jesus; y e yudansa di e Spirito di Dios. Pasobra no ta e palabranan di esun cu ta proclama e Evangelio so ta conta; ma ta e Deidad completo. Esun cu nenga di kere e Evangelio cual ta nifica “Bon Noticia”, e ta rechasa e plan complete di Dios, prepara ya prome cu e mundo a existi manera cu e ta awor.

E persona cu rechasa e Evangelio ta rechasa e amor di Dios y ta desprecia e sacrificio di Cristo y ta hasi menos caso di e Spirito Santo di Dios. P’esey, si bo a tende e bos di Dios awe, no haci bo curason duro. Ma umiya bo mes y acepta Señor Jesus como bo unico y suficiente Salbador. (lesa Echunan 17:29-31 y Rom. 8:28-39; 1 Cor. 1:17-25 y Echunan 5:29-32)

AMIGO OF ENEMIGO (continua)

2010-03-13T09:21:00.000-08:00

Awe mi tin un poco nostalgia pa Aruba!! :Aruba, dushi tera, nos baranca tan stima!" .... Betty, y mi ta kere Bicento tambe!!

Ma awor laga nos tuma tempo pa lesa, medita den loke Dios ta bisa nos awe tocante e tema aki di "Amigo of Enemigo di Dios."

Den e prome mensahe tocante e tema aki, nos a trece padilanti cu nos no por ta amigo cu Dios y amigo di mundo na e mes un tempo. Den otro palabra: “Algo asina ta imposibel.”

E Apostel Juan ta bisa nos lo siguiente: “No stima e mundo ni loke ta den mundo. Si algun ta stima e mundo, e stimacion di e Tata no ta den dje. Pasobra tur cos den e mundo, e deseo di carni, e deseo di wowo, y e orguyo di bida, no ta bini for di e Tata, ma for di mundo. E mundo y su deseonan ta pasa bai, ma esun cu hasi e boluntad di Dios, lo biba pa semper.” - l Juann 2:15-17 - (tumá for di diferente traducion di Scritura).

Mescos Santiago scirbiendo tocante e mes un situacion, ta bisa: “Boso hendenan adulterado, boso no sabi cu amistad cu e mundo ta enemistad pa cu Dios? Kende cu scoge pa ta amigo di mundo, ta bira enemigo di Dios.” – Santiago 4:4-6.

Pero un hende por puntra: Kico stima e mundo ta nifica? No ta Dios Su mes a crea e mundo y tur loke ta den dje? Con anto nos por ta robes si nos stima e loke Dios mes a crea?

Amigonan stima pa Señor; mi ta admiti cu no ta facil pa splica e pakico stimacion pa e mundo y pa e cosnan cu ta den mundo por ta malo. Pero tene cuenta sí, cu no ta nos ta siña esey, no ta for di nos e advertencia ey a sali; ma for di Señor Jesus mes, y despues pa medio di e Apostelnan.

Pa cuminsa e titulo, “mundo”, tin mas cu un nificacion. Humanidad ta uno di nan. Ehempel: “Pasobra Dios a stima mundo asina tanto, cu El a duna Su unico Yiu, pa tur cu kere den djE, no bai perdi ma haya bida eterno.” - Juan 3:16.

Den e caso aki, mundo ta enclui humanidad completo. Esey ta nifica cu kende cu bo por ta cu ta lesando esaki, bo ta enclui den e amor di Dios den Cristo. Awor e ta keda na cada persona individual, si e ta obedece y ricibi e gran salbacion cu ta ofreci den e versiculo ey di Juan 3:16. E mensahe ta cu Dios ta stima bo, y ta p’esey cu El a duna Su unico Yiu Kende a carga den Su curpa ariba e crus bo picanan hunto cu picanan di henter humanidad; pues di cada uno di nos,

Sinembargo tuma nota na loke ta sigui despues di vers 16. Ey nos ta lesa cu: “Dios no a manda Su Yiu den mundo pa condena e mundo, ma pa salba e mundo (humanidad) dor di djE. Awor pone bon atencion na e loke ta sigui tocante kico lo socede ora cu un persona ta kere y ta obedece na e amor aki di Dios nos Tata demnostra mediante e sacrificio di Su Unico Yiu; y na e loke ta socode ora cu un persona no ta kere y
ricibi e amor aki di Dios, mediante e Sacrificio di Su Unico Yiu. Vers 18 ta bisa nos lo siguiente: “Kende cu kere den djE, no ta condena, ma ken cu no kere ta condena caba, pasobra e no a kere den e nomber di Dios Su unico Yiu.”
Ademas Scritura ta sigui splica hopi cla, e motibo pakico tanto almanan precioso ta rechasa e Amor di Dios demonstra den e morto di Su Yiu Stima. Continuando den vers 19 nos ta lesa lo siguiente:

“Y esaki ta e condenacion (of e causa) cu e lus a bini den mundo, y hende a stima scuridad mas cu e lus, pasobra nan echunan tabata malo. Pasobra tur cu ta haci malo ta odia e lus, y lo no bini den e lus, pa su echunan no wordo exponi. Ma esun cu ta practica berdad ta bini den e lus, pa por wordo manifesta cu su echunan ta wordo haci den Dios.”

Esey anto ta e motibo pakico un persona no por ta amigo y enemigo di Dios na e mes un tempo. Considera Amigonan, e preis cu Dios Su mes a paga den Cristo, pa nos por ta Su Yiunan.

Nos lo continua….

MEDAYA DI ORO

2010-02-18T13:56:00.000-08:00

Aki tin un foto di algun mas di nos bisanieto/anan na Aruba. E generacion di e futuro! Dios warda cada uno di nan di e maligno, ta nos oracion.

Durante e dianan aki, nos por mira masha hopi competencia cu ta tumando lugar na Vancouver, Canada. Ta masha hopi esfuerso y sacrificio y gasto henter e asunto aki ta costa. Particularmente esunnan cu ta tumando parti den e diferente competencianan. Pa dia y lunanan largo, nan ta disciplina nan curpa, mirando padilanti na un MEDAYA DI ORO. Y cada uno cu gana un medaya di oro lo ricibi hopi aplouso for di e multitud, y lo ta un honor pa nan nacion.

E Apostel Pablo den e prome carta scirbí na e Iglesia di Corintio, ta hasi uso di e sorto di competencianan aki, pa ilustra e competencia y e lucha spiritual diario di cada uno cu ta kere e Evangelio di Dios y di Cristro. Lesa sin falta 1 Corintionan 9:1-27. Ta importante pa cada uno di nos ricibi e spiertamento y encurashamento aki di henter nos curason. Pasobra aki nos tin di hasi cu un premio cu lo dura pa eternidad! Contrario na e medayanan di oro cu algun lo ricibi aya na Vancouver. Pasobra ora cu nos ta muri, nos no por hiba nada cu nos. Tin varios otro Scrituranan cu ta papia tocante e asunto aki di corona como simbolo di recompensa eterno. Lesa Santiago 1:12, 1 Pedro 5:4 y Rev. 2:10 y compara cu 1 Tes. 2:19,20.

Uno di e prome ehempel y di mas importante duna na nos den Scritura, ta nos Señor y Salbador Jesus Su mes. Hebreonan 12:1-3 ta bisa lo siguiente, "i Su dilanti, a soporta e crus, sin tuma su berguensa na cuenta, y a sinta na e man drechi di e trono di Dios. Considera Esun, Kende a soporta tanto oposicion for di hende pecaminoso, pa boso no bira cansa y perde animo."P’esey siendo cu nos ta rondona door di un nubia tanto grandi di testigunan, laga nos tira un banda tur strobacion y e pica cu ta mara rond di nos asina facil, y laga nos core cu perseverancia e careda cu ta marca nos dilanti. Laga nos fiha nos wowonan ariba Jesus, e autor y perfecionado di nos fe, Kende pa motibo di e goso poni Su dilanti, a soporta e crus, sin tuma su berguensa na cuenta, y a sinta na e man drechi di Dios. Considera Esun, Kende a soporta tanto oposicion for di hende pecaminoso, pa boso no bira cansa y perde animo."

Den Juan 19:1-5, nos por lesa con Señor Jesus a wordo suta pa orden di Pilato kende no a haya ningun motibo pa hasi esey despues di a scucha Señor Jesus Su testimonio. Anto e soldanan a vlegt un corono di sumpiña y a pone esey ariba cabes di Señor. Ademas nan tabata haci bofon di djE, y dal’E den Su cara, etc. Ta hopi importante pa cada uno di nos tene cuenta cu ta pa nos El a sufri y soporta berguensa y maltrato. Un otro ehempel cu mi por menciona, ta e Apostel Pablo. Lesando e buki di Echunan y e cartanan nos lo mira cuanto e Apostel a sufri na man di hende pa causa di su dedicacion pa proclama e Evangelio di e gracia di Dios. Den e carta scirbí na e Filipensenan, e ta bisa lo siguiente: "Pasobra tur loke tabata ganashi pa mi, awor mi ta considera nan como pierde pa e causa di Cristo. Loke ta mas, mi ta considera tur cos como pierde compara cu e grandesa superior di conoce Cristo Jesus mi Señor, pa Kende Su causa mi a perde tur cos. Mi ta considera nan como basura, pa mi por gana Cristo y wordo haya den djE, no teniendo un husticia di mi mes cu ta bini for di ley; ma e loke ta door di fe den Cristo, e husticia cu ta bini for di Dios, y ta pa medio di fe." Filipensenan 3:7-9. Y den 2 Timoteo e Apostel Pablo ta bisa lo siguiente: "Pasobra ami ta wordo basha caba como un ofrende di bibida, y e tempo pa mi bai a yega. Mi a lucha e bon lucha, mi a termina e careda, mi a warda e fe. Den e futuro e corona di husticia ta reserva pa mi, cual e Señor lo duna mi ariba e dia ey."

Anto pone bon atencion na loke e Apostel ta bisa na cada berdadero keredor: "Y no na ami solamente, ma tambe na tur cu ta stima Su binida." Lesa 2 Timoteo 4:6-8. Pa un solemne spiertamento, lesa 1 Corintionan capitulo 3 completo. Y corda esaki bon, cu ta nos tur cu ta kere e Evangelio ta inclui aki.

REPENTIMENTO

2010-01-31T14:15:00.000-08:00

E siman, si e sneuw a hera tapa ful nos auto!! Tur esey a cai den un dia y anochi - suave y keto, ma e tabata un sorpresa pa nos mira nos auto bou di sneeuw di e manera aki!!

Awor nos lo continua cu e TOPICO "Repentimento":
Basa ariba esun berdad aki, den cual Dios ta ordena of comanda na tur hende di mundo pa nan repenti prome cu e dia di huicio yega; cada uno di nos cu no obedece, ta bibando cada momento di nos bida bou di e condenacion di perdicion eterno.

Manera Scritura ta declara: "Con anto nos lo por scapa, si nos neglisha un salbacion tanto grandi asina? Manera e ta bisa den otro lugar, "Den e tempo di Mi fabor, Mi a scucha bo, y den e dia di salbacion Mi a yuda bo. Ata aki, awor ta e tempo di Dios Su fabor, awor ta e dia dia di salbacion." (Lesa 2 Cor. 6:1,2 y Echonan 17:30, 31 NIV)

Den e Buki di Rebelacion nos ta haya un otro spiertamento hopi serio relaciona cu repentimento. Y e spiertamento cu nos ta haya for di esaki por ser compara cu e loke a tuma lugar recientemente na Haiti. Ey nos ta lesa lo siguiente: "E resto di humanidad cu no a wordo mata pa e plaganan aki; ainda no a repenti for di e obranan di nan man; nan no a stop di adora demoñonan, y idolonan di oro, plata, brons, piedra y palo – idolonan cu ni por mira ni tende of camna. Ni tampoco nan a repenti di nan matamentonan, nan artenan magico, nan immoralidad sexual, of nan ladronicia." (Lesa Reb. 9:20.21)

E loke a pasa na Haiti, mester sirbi como un advertencia pa henter mundo . Si nos ignora e spiertamento ey y sigui biba sin hasi caso di e Evangelio di nos Señor, nos ta simplemente exponiendo nos mes continuamente na e peliger di condencion eterno segun Scritura. Ademas e promenan cu mester a tene cuenta cu e adverntencia ey y otronan mas cu ta tumando lugar den nos dianan, ta e Iglesianan rond mundo. Mundanalidad y carnalidad ta poderando mas y mas den e Iglesianan rond mundo. E prome tres capitulonan den Rebelacion tabata scirbi na e shiete iglesianan cu tabata existi e tempo di e Apostel Juan, pero aparentemente nan ta representa e Iglesianan cu lo existi te na e di Segundo Benida di nos Señor JesuCristo.

Mi ta sugeri na cada un di mi rumannan y na prome lugar tur e sirbidornan cu a ricibi e encargo pa cuida e tao of sea e Iglesianan di Señor. Pa lesa di nobo e prome tres capitulonan di Rebelacion, pone atencion cu e siete streanan cu Señor tabatin den Su man drechi, ta representa e shete angelnan of shete mensaheronan di e Iglesianan menshona. Pa autoridad di e Palabra di Dios, mi ta compara e mensaheronan ey cu e pastornan cu ta cuida y pastoria e tao di Señor awe. Pone atencion cu ta na e Lidernan e Señor ta dirigi palabra, y na e congregacionnan tambe.

P’esey, rumannan fiel den Cristo y Co-pastornan; ta nos cu ta cuida e tao di Señor ta e PROMENAN cu mester repenti confesando nos picanan, negligencia y comfortabilidad y carnalidad. Pone atencion cu for di e boca di Señor, un spada scerpi di dos fila tabata sali. (Reb. 1:16)

Nos mester bolbe na e PALABRA DI DIOS BIBO, pa nos no wordo hiba cu e coriente di banidad presente. Manera nos a wordo spierta ya for di e principio dor di e Apostel Pablo lo siguiente: " Den e presencia di Dios y di Cristo Hesus, Kende lo huzga e bibonan y e mortonan, y na bista di Su aparicion y Su Reino, mi ta duna bo e mensahe aki: Predica e Palabra; sea prepara na tempo of for di tempo; coregi, reprende, y encurasha, cu hopi pacenshi, y instruccion cuidadoso. Pasobra e tempo lo yega cu hende lo no soporta doctrina sano mas. Alcontrario pa satisface nan propio gana nan lo acumula rond di nan hopi siñadornan pa bisa nan loke nan orea cu ta kishiki kier tende. Nan lo bira nan orea for di e berdad, y bolbe na fabula. Laga nos lesa 2 Timoteo completo y depende ariba e Spirito pa yuda nos comprende y obedece. Y den e caso aki obediencia ta compaña cu repentimento.

Nos cu ta lidernan scohi pa gracia, ta esunnan cu mester repenti prome. E ora nos por spera pa henter e congregacion tambe repenti. Un biaha mas, rumannan, lesa e prome tres capitulonan di Rebelacion cuidadosamente y cu oracion. Y tambe 2 Timoteo capitulo 4.

Te otro ocacion! Bicento y Betty

REPENTIMENTO - kico e ke men?

2010-01-28T13:49:00.000-08:00

E foto ta di Junel Semereel, un bisanieto di Bicento su yiu Juanita y esposo Nel. Junior su tata tambe ta Junior. E tabatin mas of menos cinco aña, dies un aña pasa ora el a sirbi cargado di renchi na nos matrimonio!! Mira con grandi el a bira! Bo ta Juanita su prins, ma di nos tambe!! (Pachi y Betty)

REPENTIMENTO - kico e ke men?

Segun Scritura, sin repentimento no tin pordon pa picanan.

Cada persona den e mundo aki, mester yega na e lugar unda cu e ta reconoce di ta un pecador, y cu e tin mester, y kier pordon pa su picanan. Sinembargo sin yudansa di Ariba no tin berdadero repentimento. Ta posibel pa un persona sinti remordimento pa un of mas acto di maldad cu el a comente contra un persona.

Pero, nos picanan no ta solamente contra hende ma tambe contra Dios. Masha hopi mes Scritura ta menciona esey. Ta pasobra cu Dios ta Santo, den e berdadero sentido di puresa. E no por tolera pica. Y siendo cu nos tur a peca, ta nifica cu nos tur a perde comunion cu nos Tata Celestial. Y siendo cu e pago di pica ta morto, ta nifica cu nos tur tabata morto den nos picanan sin excepcion. Y esey ta nifica cu henter mundo, humanidad completo tabata y ta bou di e condenacion aki. Mi ta bisa tabata pasobra nos ta lesa den Scritura, cu Dios a stima mundo asina tanto, cu El a duna Su Unico Yiu, pa tur cu kere den djE no bai perdi, ma haya bida eterno.
Pone bon atencion cu ta e personan cu ta kere den e yiu di Dios no ta bai perdi y ta haya bida eterno. Pero esunnan cu no ta kere, lo no mira e bida, ma e rabia di Dios ta keda ariba dje. (Lesa Juan 3:16-18).

Sinembargo e mes Scritura cu ta papia di e amor di Dios pa humanidad, tambe ta papia di e rabia di Dios. Y e rabia di Dios ta contra pica y no contra hende. Pica ta un abominacion pa cu Dios; y esun cu a introduci pica den mundo ta e diabel y satanas cu ta e tata di mintira.

Durante e dianan aki; cu e puebel di Haiti ta pasando door di un tempo di hopi sufriemtento pa motibo di un teribel catastrofe causa pa temblor; ta masha papiamento mes tin, y varios opinionnan tocante e causa di e temblornan cu a laga e lugarnan den ruina, y hopi miles di mortonan y herida. Entre otro nos por tin e pensamento cu Señor ta castiga e nacion ey pa motibo di su picanan, etc.

Pero, Señor Jesus ta duna cada uno di nos un spiertamento hopi serio, pa cada uno di nos tene cuenta cu ne. Den un ocacion cu Señor tabata predicando y siñando e Palabra di Dios; tabatin algun persona presente, cu a conta Jesus tocante di algun persona cu Pilato a laga mata na un manera cruel mesclando nan sanger hunto cu nan sacrificionan, Señor Su contesta tabata "Boso ta kere cu e Galileonan ey tabata pecadornan mas malo cu tur e otro Galileonan pa motibo cu nan a sufri di e manera ey? Ami ta bisa boso NO! Pero si boso no repenti, boso tur tambe lo perece. Of e diesochonan cu a muri ora cu e toren di Siloam a cai ariba nan; boso ta kere cu nan tabata mas culpabel cu tur e otronann cu ta biba den Jerusalem? Ami ta bisa boso, NO! Ma si boso no repenti, boso tur lo perece tambe."

Awe e mes un preguntanan ey por ser hasi na tur hende di Antiyas y Aruba, "Boso ta kere cu e Haitianonan cu a muri den e temblor tabata mas culpabel cu esunnan cu a scapa di morto? Pa autoridad di e palabra di Dios nos por bisa, "NO!". Pero, si nos no repenti nos tur lo perece mescos. Den e buki di Echunan, Capitulo 17, nos ta haya otro spiertamento tocante e mes un doctrina di repentimento. Entre otro e Apostle ta spierta nos, cu e Dios Creador di e mundo y tur loke cu tin den dje, no ta biba den tempelnan traha dor di man di hende, etc., etc. Ta increibel con aki den Antiyas y Aruba e mayoria di hende cu ta yama nan mes Cristian, ta confia den un Dios cu ta sera den un tempel. Y cada diadomingo nos ta bai adora e Dios ey den tempel. Anto e Apostel ta sigui bisando: "Den pasado Dios a laga e tempo di ignorancia ey pasa por alto, pero awor E ta manda (of ordena) tur hende, na tur parti pa REPENTI . (enfasis ta di nos). Pasobra El a fiha un dia cu E lo huzga e mundo cu husticia pa medio di UN HOMBER Kende El a apunta. El a duna prueba di esaki na tur hende dor di a lant’E for di morto." (Lesa Echunan 17:22-34).
Nos lo continua cu e tema aki di Repentimento den e siguiente BLOG.

Ultimo Rosea - continua

2010-01-16T13:53:00.000-08:00

Riba foto por mira dos di nos bisa-nietanan, y prendanan precioso "Tani y Lixi", nietanan di Bicento su yiu conoci como Chinda.

NOS ULTIMO ROSEA (#3):

Scritura ta rebela bon cla, e motibo pakico morto ta bin pa nos tur. (Lesa Rom. 5:12), unda nos ta wordo bisa cu pica a drenta mundo door di un hende, y morto a bini door di pica, y asina morto a bini na tur hende, pasobra tur a peca. Ma e bon nobo cu nos kier comparti na henter mundo ta esaki:
Mescos cu nos tur a wordo condena pa muri como resultado di un transgrecion di Adam; mescos awor como resultado di un acto di husticia; hustificacion y bida eterno ta ofreci na tur hende. Pasobra mescos cu door di e desobediencia di Adam nos a wordo haci pecadornan;mescos pa medio di e obediencia di nos Señor y Salbador JesuCristo, hopi lo wordo hasi husto. (Lesa Romanonan 5:15-19)

Sinembargo e hustificacion aki no ta tuma lugar sin nos consentimento of nos obediencia. Pero un cos si nos mester tene cuenta cu n’e, y esey ta cu no tin diferencia di persona serca Dios, pasobra nos tur a peca, y ta falta e gloria di Dios.

Mi a cuminsa scirbi e mensahe aki sin caba cu n’e. Durante e corto tempo ey, ta hopi cos a tuma lugar rond mundo; incluyendo e teribel temblor na Haiti, unda hopi miles di almanan precioso a perece inespera. Nos por bien tuma e catastrofe aki como un spiertamento serio. Of kisas como un recordatorio na loke Scritura ta spierta nos tur dia ya for di miles di añanan pasa. Santiago a spierta nos di e siguiente manera, "Scucha, abo cu ta bisa, awe of mañan nos lo bai na e ciudad aki of na e otro, gasta un aña aya, haci negoshi y gana placa. Wel, boso ni sikiera sabi kico lo sosode mañan. Kico boso bida ta? Boso ta un neblina cu ta aparece pa un poco tempo, y ta desparece. Loke boso mester bisa ta: Si ta Señor Su boluntad, nos lo biba y haci esaki y esaya. Pero awor boso ta gloria y gaba. Tur sorto di gabamento asina ta robes."

Amigonan, pa kende Cristo a muri y a resucita, e spiertamento aki ta pa cada un di nos sin excepcion. Awe cu nos ta scirbiendo esaki ta apenas uno pa tres dia pasa, cu e calamidad causa pa un temblor a tuma lugar na Haiti. Pero durante e poco tempo aki, a muri mucho mas hende rond mundo for di tur edad. Sea cu un persona ta muri via un temblor of un acidente di trafico of di un of otro enfermedad; e cos di mas importante ta si un persona ta muri den Cristo.
Ni un momento mi no ke meen cu bida no ta precioso, y cu mi no ta stima bida. Pero ta Scritura Santo ta spierta cada uno di nos cu un persona cu no a repenti di su picanan, y kere di curason den nos Señor JesuCristo; lo no mira e bida berdadero, pasobra e rabia di Dios ta keda ariba dje.
E rabia di Dios ta contra pica, y no ariba ningun hende, pasobra si ta ariba hende e rabia di Dios tabata, anto E nunca lo a entrega Su Unico Yiu pa muri den nos lugar ariba e crus. P’esey nos ta desea pa cada persona cu lesa e mensahe aki sabi cu Dios ta stima nos mescos cu El a stima Su Unico Yiu, nos Señor Jesus.

Lesa sin falta Juan 17:20-26. Of lesa e capitulo 17 di Juan completo. Morto ta keda e peor enemigo di humanidad, y lo ta e ultimo enemigo pa wordo poni bou e pianan di Señor Jesus. Pero sea sigur cu e promesa ey lo wordo cumpli na su tempo apropia segun boluntad di nos Tata Celestial. Lesa cu calma 1 Cor. 15:50-58 y tambe 1 Cor. 15:20-29, of lesa e captitulo ey completo, pero no pura, ma cu calma, y cu reverencia pa e Palabra di Dios. Amen.

Si encaso bo tin pregunta, por fabor laga nos sabi via Email of Facebook, y sea liber pa pasa e mensahe aki na bo amigonan. Y si encaso esaki ta e prome biaha cu bo ta lesa e mensahe aki, y bo lo tin deseo di lesa e otronan, "click" ariba e "link" cu ta bisa "older posts". Ey por scoge di sitio Ingles of Papiamento.

Nos blog ta: B&B Henriquez.blogspot.com y nos email ta: bbhenriquez@shaw.ca

Ultimo Rosea (continua)

2010-01-04T16:34:00.000-08:00

Ya awe cu e mensahe aki ta bai aire, ta dia 4 di Januari 2010. Durante e dos dianan cu a pasa, miles di hende fo’i tur edad, homber y mohe, a hala nan ultimo rosea. Y segun Scritura, hende ta destina pa muri un bes so, y despues ta sigui huicio, of huzgamento.

Amigonan di tur edad, sea sigur cu e declaracion aki ta inclui nos tur, sea homber of mohe sin distinccion. Pero danki na Señor Dios, cu e Scritura no ta stop ey, pasobra e ta sigui cu e palabranan aki: "Asina tambe Cristo a wordo sacrifica un bes so pa kita picanan di hopi hende; y E lo aparece pa di dos bes ma no pa carga pica, ma pa trece salbacion na esunnan cu ta sperando pE." (Hebreonan 9:28, 28).

E salbacion den e caso aki, ta nifica e transformacion cu lo tuma lugar ora cu Cristo ta bolbe for di cielo. Esunnan cu a muri den Cristo lo lanta prome. Despues di esey nos cu ta na bida ainda y a keda lo wordo tuma ariba hunto cu nan den e nubianan pa contra e Señor den laira. Y asina nos lo ta cu e Señor pa semper. P’esey laga nos encurasha un y otro cu e palabranan aki. Den e mes un porcion di Scritura aki e Apostel e ta spierta nos, pa no ta ignorante tocante esunnan cu ya a muri, of pa keda tristo manera esunnan cu no tin speransa.

E doctrina di speransa ta hopi cla den Scritura. Esaki no ta e forma di speransa falso cu masha hopi hende tin te awe aki den Antiyas y na tur parti di mundo. E speransa berdadero ta esun ancra ariba e Palabra di Dios cu ta den Scritura Santo. Den Scritura e palabra ta Si of No. Y no si y no hunto. Ehempel: Esun cu kere tin bida eterno, e sin cu no ta kere lo no mira e bida, ma e rabia di Dios ta keda riba dje. (Lesa Juan 3:31-35).

Otro Scritura ta bisa lo siguiente: "Pasobra Dios no a manda Su Yiu den mundo pa condena e mundo, ma pa salba e mundo pa medio di djE. Ken, of esun cu kere den djE, lo no ta condena, ma esun cu no kere, ta condena caba pasobra e no a kere den e nomber di e Unico Yiu di Dios." (Juan 3:17,18).

Aki Amigonan di tur edad, no ta asunto di kisas of probablemente, etc., etc., MA e ta un of e otro. E persona cu no a repenti di pica y a pone of desposita su fe den e Yiu di Dios ta bou condenacion pa motibo cu e no ta kere den e Yiu di Dios. Segun Scritura, Cristo a muri pa nos picanan, y e Tata a lant’E for di morto. Cualke persona cu ta nenga di kere den e Yiu di Dios, ta mescos cu bisa: Ami no tin mester pa El a muri pa mi, pasobra mi mes sabi con pa salba mi mes. Scritura ta hopi cla tocante e motibo pakico tantisimo hende ta rechasa e salbacion grandi aki cu ta solamente den Cristo pa medio di fe. E motibo ta cu nos tur a nace for di barica di nos mama, cu e naturalesa di pica. Pica a drenta den mundo mediante un hende, cual ta Adam. Esun cu a causa e caida di Adam, ta Satanas, e diabel.

Y te na e momento aki cu mi ta scirbiendo e mensahe aki, Satanas tin enfluencia ariba tur hende di mundo. Si un persona no ta den Cristo, e ta keda bou poder di Satan. Ta solamente Cristo nos Señor tin poder y autoridad pa libra nos for di e dominio satanico. Y sea sigur cu religion ariba su mes no tin autoridad ariba Satan. Cristo solamente tin e poder y autoridad pa libra nos. Y esey ta na costo di Su morto ariba un crus, unda El a carga nos picanan den Su curpa. Y awor libra di pica nos tin autoridad di biba pa husticia, pasobra pa medio di Señor Jesus Su heridanan, nos a wordo cura. (Lesa sin falta e siguiente Scrituranan aki: 1 Juan 5:18-21 y 1 Pedro 1: 13-25 y 1 Pedro 5:6-11).

Sea liber pa pasa e mensahe aki na tur bo amigonan y conocinan. Nos lo continua.

ULTIMO ROSEA

2009-12-31T14:39:00.000-08:00

Antes na Aruba, nos bieuwnan tabata bisa na e final di un aña; cu e aña bieuw ta halando su ultimo rosea. Claro cu esey ta unicamente un manera di papia den comparacion. Sinembargo e comparacion ey ta ilustra e bida di cada uno di nos sernan humano, y asta di animalnan. (Compara Eklesiastes 3:18-22). Pero no tuma e scritura ey como un splicacion final di e tema aki; pasobra e diferencia entre hende y animal ta incomparabel. Pero laga cada uno di nos sea sigur cu mescos cu nos tabatin nos prome rosea den e mundo aki na e momento cu nos a nace; mescos cada uno di nos lo tin nos ultimo rosea na ora di nos morto.

Uno di e casonan mas interesante y importante, ta tocante nos Señor Jesus den Su encarnacion. Aunke cu El a existi for di eternidad, sinembargo ora cu El a bini na mundo den un curpa humano, E tabatin Su prome rosea. Y mescos cu nos, E tambe mester a hala y exhala rosea pa duna bida na e curpa. Y na, of ariba e crus El a hala Su ultimo rosea. Tur cuater Evangelio ta menciona esaki di un of otro manera. (Lesa Mateo 27:50 y Marco 15:37 y Lucas 23:46, y Juan 19:30). E prome persona cu a wordo mata pa motibo di Su fe den Señor Jesus tabata Esteban cu tabata un homber yen di fe y di e Spirito Santo. (Echunan 6:5)

Pero a socede cu un grupo religioso Judiu cu ta yama nan mes e snoa di libertad, motiva pa fanatismo, a traha un complot, y a acusa Esteban di blasfemia, y a logra pa kita su bida na un manera cruel. (Lesa Echunan capitulonan 6 y 7) Ora cu e tabata muriendo, e tabata haci oracion, y el a bisa: Señor Jesus ricibi mi spirito! Y pidiendo na Señor pa E pordona e pica di esunnan cu a mat’e, el a muri.

E palabra original cu a wordo traduci pa "muri" aki, realmente ta cu el a bai soño. Segun Scritura, e Resureccion no a tuma lugar ainda. Esunnan cu ta di Cristo, lo resucita ora cu E bolbe pa tuma Su Iglesia cu ta consisti di tur cu a muri den Cristo. Tempo cu Apostel Pablo tabata na bida ainda; tabatin algun profesante cu a desvia for di e berdad, y tabata siña cu e Resureccion a tuma lugar caba. Y sorto di siñansa asina ta trastorna fe di keredornan manera a socede e tempo caba. (Lesa 2 Timoteo 2:14-19) Na cua parti di mundo cu e por ta; un persona cu e repenti di su picanan, y a obedece e Evangelio; na ora di su morto cu e lo hala su ultimo rosea; e persona aki ta muri den Señor. Esey ke keen cu e ta na encargo di Señor. Sabiendo esaki cada uno di nos cu ta kere e Evangelio tin e siguridad di resureccion cual lo tuma lugar ora cu Cristo bolbe pa tuma nos cerca djE pa semper. (Lesa 1 Tes. 4:13-18)

Si encaso algun di boso cu ta lesa e mensahe corto aki, tin algun pregunta, sea asina bon pa scirbi nos na e direccion cu ta compaña e mensahe aki. Mientrastanto sea sigur cu nos ultimo rosea den e mundo aki, no ta nifica e final, pero solamente un periodo corto prome cu nos glorificacion uni ora cu nos Señor bolbe den Gloria.
Nos lo sigui cu e tema aki..... y un Felis Aña Nobo di parti di nos dos - Bicento & Betty Henriquz

E Evangelio (continua)

2009-12-24T15:34:00.000-08:00

Ola, bon tardi ariba Bispo di Pasco! Nos ta desea boso un bon anochi y tambe un felis dia mañan hunto cu famianan, cordando e berdadero motibo pakico Jesus a bini den e mundo aki. Lesa e siguiente (conclusion) mensahe tocante e Evangelio - E Bon Nobo - cu Awe a nace pa boso e Cristo cu lo salba Su puebel di nan picanan!

Durante e dianan aki cu mundo ta celebrando e Pasco di nacemento di Señor Jesus; e ta duna un apariencia falso cu ta henter mundo ta felis y contento cu e binimento na mundo di un Salbador. Pasobra segun Scritura, ta pa salba nos di nos picanan El a bini na mundo.

Ariba e mes un anochi cu Señor a nace for di e birgen Maria, un angel di Señor a presenta na algun wardadornan di carne, cu tabata den e bisindario di Bethlehem, teniendo warda ariba nan taonan, y a bisa nan: "No tene miedo; pasobra mira, mi ta trece bon nobo di gran goso pa boso, cu lo ta pa henter e puebel; pasobra awe den e ciudad di David a nace un Salbador pa boso cu ta Cristo e Señor." (Lesa Lucas 2:8-14).

Pues aki ta ser anuncia bon cla, cu e motibo di ta sumamente contento ta cu un Salbador a bini na mundo. Nos ta lesa den un otro lugar unda un Angel di Señor a aparece na Jose, e esposo di Maria den un soño y a bis’e; cu su esposa Maria lo duna lus na un yiu homber y pa e dun’E e nomber Jesus, pasobra E lo salba Su puebel di nan picanan. (Lesa Mateo 1:18-21). Siendo cu ta pa libra y salba nos for di nos picanan E Tata a manda Su yiu den mundo, y siendo cu esey a costa Su morto ariba un crus; ta nifica cu si nos ta celebra e nacemento sin cu nos ta repenti di nos picanan, y acepta Jesus como nos unico Salbador; ta unicamente un burla di ignorancia.

E Apostel Pablo ta duna su testimonio personal bisando: Esaki ta un palabra fiel cu ta merece pa wordo acepta completamente, cu Cristo Jesus a bin na mundo pa salba pecadornan, di cualnan ami ta esun peor. (Lesa 1 Timoteo 1:15,16 den varios traduccionnan). E mes Apostel aki ta bisa lo siguiente: "No tene berguensa pa duna testimonio tocante di nos Señor, of tin berguensa di ami Su prisonero. Pero uni cu mi den sufrimento pa e Evangelio, door di e poder di Dios, Kende a salba nos y a yama nos na un bida santo, no pa motibo di nada cu nos a haci, ma pa motibo di Su propio proposito y gracia. E gracia aki tabata duna na nos den Cristo Jesus prome cu e cuminsamento di tempo, pero awor esey a wordo revela door di e aparicion di nos Salbador Cristo Jesus, Kende a destrui morto, y a trece bida y immortalidad na lus pa medio di e Evangelo." (2 Tim 1:8-11 - NIV).

Amigonan di tur edad, cu ta lesa e articulo aki; tur e spiertamentonan, y hopi mas cu ta para den Beibel; ta pa cada uno di nos examina nos mes si nos ta den e fe cu e Evangelio ta presenta bes tras bes den varios lugar den Beibel. E Apostel Juan ta bisa nos lo siguiente: Esaki ta e manera cu Dios a mustra Su amor na nos: El a manda Su unico Yiu den e mundo, pa nos por biba mediante E. Esaki ta amor: No cu ta nos a stima Dios, pero cu ta E a stima nos, y a manda Su Yiu como un sacrificio reconciliatorio pa nos picanan. (1 Juan 4:9-10)

Nos ta conclui awe cu e porcion di Scritura aki: "Pasobra tempu cu nos tabata sin forsa , na e tempo apropia, Cristo a muri pa e impionan. Pasobra masha poco un hende lo muri pa un hende husto, aunke cu kisas pa un bon hende un hende lo risca muri. Ma Dios ta demostra Su mes amor pa nos den esaki: mientras cu nos tabata pecadornan ainda, Cristo a muri pa nos. (Lesa Romanonan 5:6-11)

"PA UN PASCO BERDADERAMENTE FELIS, OBEDECE E BON NOBO CU TA WORDO YAMA E EVANGELIO DI DIOS Y DI CRISTO, den berdadero repentimento di curason.

E EVANGELIO

2009-12-20T08:06:00.000-08:00

Sinta y bebe un copi di cofi cu mi, y lesa e mensahe cortico tocante E Evangelio - especialmente cu ta tocante e Bon Nobo aki e binimento di nos Señor den carne a tuma lugar: e ta pa nos.

E mensahe pa awe ta tocante di e Evangelio cu nos por haya varios bes menciona den Scritura enfaticamente como: "E EVANGELIO". es

For di chikito nos a tende e palabra ey den e tres islanan di Aruba, Bonaire y Curaçao. Pero masha poco of nunca nos a tende, of a wordo siña, cu e palabra "Evangelio" ta nifica "BON NOTICIA," of "BON NOBO".
Segun Scritura, e bon noticia aki ta pa wordo proclama den henter mundo, na tur ser humano. Docter Lucas ta scirbi lo siguiente: "E ora El a habri nan mente, pa nan por a comprende e Scrituranan. El a bisa nan, Esaki ta loke ta scirbi": "E Cristo lo sufri, y lanta for di morto na di tres dia; y repentimento y pordon di picanan lo ta predica den Su nomber na tur nacion, cuminsando na Jerusalem." (Lesa Lucas 24:44-48)

Amigo y amiganan di tur edad, awe mas cu dos mil añanan despues cu nos Señor a bolbe cerca e Tata cu a mand’E; e bon noticia aki ta bini cerca bo den Su nomber. E bon noticia ta: cu pordon di tur nos picanan ta ofreci na nos, si nos repenti y kere den Señor Jesus. E spiertamento di Scritura ta, cu sin repentimento no tin pordon. Nos por bisa anto, cu proclamacion di Evangelio y repentimento ta inseparabel. Prome cu e bon noticia tabatin solamente mal noticia pa henter mundo. E mal noticia tabata cu humanidad completo ta bou condenacion di e rabia husto di Dios. Y cu no tin ni sikiera un persona husto, y cu no tin un persona cu ta comprende y cu ta busca Dios. Tur hende a bira lomba pa Dios, y conhuntamente a bira inutil. Hende su garganta ta manera un graf habri, cu lenganan cu ta practica maldad, y ta yen di maldicion y amargura. Pianan cu ta lihe pa haci maldad, y cu no conoce temor di Dios," (Lesa Romanonan 3:9-18)
Pero awe den e Evangelio cu ta nifica: "Bon Noticia:, nos tin e declaracion tocante un hustificacion cu ta bini for di Dios Su mes. Y e hustificacion aki ta bini pa medio di fe den Jesus, e Cristo, na cada hende cu kere. No tin diferencia si ta un Judiu of hende di cualke otro nacion; pasobra nos tur a peca y a faya pa cu Dios. Pero awor nos por wordo hustifica gratuitamente dor di Su gracia, pa medio di e redencion cu a bini dor di Cristo Jesus. (Lesa Rom. 3: 21-26). Redencion ta nifica den Scritura, cu un otro persona a paga pa e castigo cu nos a merece. Y e otro persona aki ta nos Señor y Salbador Jesus. Nos debe tabata manera ya nos por a lesa. Un falta total di husticia y di reverencia pa Dios, y tambe entre nos mes un cu otro. Pero den Cristo nos ta wordo declara husto dor di e Tata Su mes. No solamente tin pordon completo pa cada persona cu repenti di su picanan, y pone su fe den e Yiu di Dios; ma ademas nos ta ricibi tur e bendicionnan celestial cu ta scirbi den resto di Scritura. (Lesa sin falta Efesionan 1:1-14 y Efesionan 2:1-22).

Si bo ta di acuerdo cu e mensahe aki, anto sea liber pa pas’e na otronan cu bo conoce.

BON PASCO y FELIS AÑA

2009-12-12T15:32:00.000-08:00

Nos oracion y deseo ardiente ta pa bo, amigo/a y fiel lesador di nos Blog, ta pa bo alegra bo mes tur ora den Señor, y cu bo lo no preocupa bo mes cu anshedad tocante nada; pero cu den tur circunstancia bo lo presenta pa medio di oracion y peticion. bo necesidadnan na Dios. Y cu e pas di Dios, cual ta surpasa tur comprendemento, lo proteha bo curason y bo mente den Cristo Jesus. Tanta awor den e ambiente di Pasco Di Nacemento, como cada dia den aña 2010. Pues UN FELIS PASCO Y UN FELIS AÑA!

Bicento & Betty Henriquez

GRACIA Y BERDAD continua

2009-12-01T09:26:00.000-08:00

Bon Bini na nos casita! Esaki ta e mesita chikito unda nos por come nos desayuna y nos co'i pasa boca atardi! E ta net enfrente di e parti di e cushina cu nos a mustra biaha pasa den nos blog. Otro biahe, si Señor permiti nos lo pone algun otro photo di nos lugar.

AWOR pa nos meditacion pa awe:
Den e prome mensahe tocante gracia y berdad, nos a trece padilanti den poco palabra, cu gracia ta den contraste cu e ley duna via Moises y tambe encontraste cu tur forma di Religion unda hende ta trata pa wordo hustifica mediante obranan relaciona cu religion. (Juan 1:14-17)

Religion ta igual cu un forma di ley cu ta proclama salbacion na e persona cu keda fiel y cumpli cu tur e reglanan di e religion. Nos tin un ehempel hopi cla den Scritura, tumando e Ley cu Dios Su mes a duna e Israelitanan via Moises. Siendo cu ta e Señor mes a duna e ley aki, anto e mester ta perfecto. Scritura ta presenta e Ley como santo y e mandamentonan como santo, y husto y bon. (Lesa Romanonan 7:7-13).
Pues den e mensahe cortico aki, nos no ta siña cu e Ley duna pa Moises ta malo. Y tampoco cu bon obranan ta malo. Ma e loke si nos ta proclama ta: CU NINGUN SER HUMANO lo wordo hustifica door di cumpli cu e Ley di Moises; y NINGUN SER HUMANO lo wordo hustifica pa medio di obranan siña pa religion. Esaki no ta nifica cu nos ta contra bon obranan, pasobra Scritura ta siña nos, cu nos a wordo salba pa haci bon obranan. Efesionan capitulo dos y e versiculonan 8-10, ta bisa nos lo siguiente: "Pasobra e ta pa medio di gracia boso a wordo salba, door di fe, y esaki no ta for di boso mes, e ta regalo di Dios, no door di obranan, asina cu ni un por gaba. Pasobra nos ta obra di Dios Su man, crea den Cristo Jesus pa haci bon obranan., cual Dios a prepara di padilanti pa nos haci." (Traduci for di NIV)

Hopi otro lugar den Beibel nos ta lesa tocante e gran salbacion aki cu ta absolutamente den Cristo so, y e bon obranan cu ta ser spera di cada uno cu ta kere di curason. Pues bon obranan ta fruta di salbacion; y no como un medio pa wordo salba. AdemasSeñor Jesus a siña hopi cla tocante di bon obranan, y e apostelnan tambe a splica y a siña esey. Ehempel: Mateo 6:1-8. Aki Señor Jesus siñando e multitud ta bisa: "tene cuidao pa bo no haci bo actonan di husticia dilanti hende pa sea mira pa nan. Si bo hasi asina, lo bo no tin recompensa for di bo Tata den cielo. P’esey ora cu bo ta duna na esnan den necesidad, no anuncia esey cu trompet, manera e hipocritanan ta haci den e snoanan, y ariba cayanan, pa nan sea honra door di hende. Ami ta bisa boso e berdad, ya nan a ricibi nan pago completo. Ma ora abo ta duna na esnan den necesidad, no laga bo man robes sabi loke bo man drechi ta haci, di manera cu bo dunamento ta den secreto. E ora bo Tata kende ta mira loke ta wordo haci den secreto lo recompensa bo."

Masha hopi mes nos Señor a siña nos tocante bon obranan, pero semper como fruta of resultado di salbacion cu ta pa medio di fe, y ta pa gracia. Pone atencion cu e ta bisa: Gracia y berdad a bini pa medio di JesuCristo. Gracia y Berdad ta bai hunto. Berdad ta inclui cu nos por ta sigur cu tur Dios Su promesanan ta sigur y ta Amen. P’esey ora cu un persona ta duda tocante loke nos Tata Celestial a siña pa medio di Su Yiu, y pa medio di e Apostelnan; nos ta haci Dios un gañador y Su Palabra no ta den nos. Den tur e poblacion di e mundo aki, tin e dosnan aki: esunnan cu ta kere e Evangelio, y esnan cu no ta kere.

Obedece awe y sea salba. Te otro biaha. Laga nos sabi si bo a lesa e mensahe cortico.

GRACIA Y BERDAD

2009-11-25T14:31:00.000-08:00

Esaki ta nos cushina chikito! Aki mi ta prepara desayuna pa nos y tambe algo atardi banda di cinc'or. E cuminda grandi nos ta come den e comedor grandi dje lugar aki. Nos a cuminsa e sistema aki dia prome di November! Y e ta baiendo bon.

Awor nos ta sigui cu nos TEMA pa awe cual ta Gracia y Berdad:

"Y e Palabra a bira carni, y a biba meimei di nos, y nos a mira Su gloria, e gloria di Esun y unico Yiu di e Tata, Kende a bini for di e Tata, yen di gracia y berdad." (Juan 1:14) (NIV) "Pasobra e ley tabata duna door di Moises; gracia y berdad a bini pa medi di JesuCristo." (Juan 1:17) (NIV).

Awe amigonan, nos mensahe ta tocante gracia. Kico gracia ke meen porfin? Den nos idioma Papiamento nos ta usa e plabra ey den varios manera. Nos por bisa: E persona ey ta gracioso, of e ta sin gracia, of mi a lanta sin gracia awe, etc.

Pero den Scritura e Palabra gracia su nificacion ta sumamente importante pa cada uno di nos na tur parti di mundo. Manera nos sabi, tin hopi religion y sectonan den mundo. Algun ta bon conoci, otronan no. Pero practicamente e proposito di tur religion ta pa gana bida eterno pa medio di e religion na cual un persona ta pertenece. Y sinceramente; e pensamento ey no ta desconoci den e tres islannan aki di abla Papiamento.

For di chikito nos a wordo siña cu pa nos gana bida eterno, of pa nos bai cielo despues cu nos muri, nos mester keda fiel na nos religion cual a wordo pasa na nos door di nos mayornan mediante bautismo di awa asina pronto cu ta posibel despues cu nos a nace. Un di e obranan principal cu nos mester a observa ta, pa asisti na nos sirbishinan religioso fielmente.

Ademas pa nos haci bon obranan y un sorto di sacrificio cu nos ta yama penitencia. Den otro palabra, nos ta traha pa nos gana bida eterno mediante nos obranan cu nos ta haci. Pero segun Scritura, salbacion ta pa gracia di Dios. Y gracia ta nifica cu nos ta ricibi algo cual nos no a traha p’e.

Ariba e dia aki Señor nos Dios ta ofreciendo na cada persona aki den Antiyas y henter mundo, pordon di picanan y bida eterno di gracia. Siendo cu ta pica ta e causa di nos separacion for di Dios, anto ta e pica ey mester wordo kita for di nos. CON ESEY POR SOSODE? Hende den su ignorancia y bao poder di e Maligno a inventa tur sorto di manera pa trata cu e loke ta wordo yama: "PICA" Pero na lugar di vence, nos a bai di peor pa peor, te cu nos a bira catibonan di pica. Pero apesar cu henter humanidad a cai den pica, tog nos ta lesa den Beibel lo siguiente. "Pasobra Dios a stima mundo asina tanto, cu El a duna Su unico Yiu, pa tur cu kere den djE, no bai perdi ma haya bida eterno." (Juan 3:16)

Otro scritura ta bisa nos cu: "E mes a carga nos picanan den Su curpa ariba e crus, pa nos libra di picanan, por biba pa husticia, y pa medio di Su heridanan nos a wordo cura."

Esey, Amigonan stima, ta nificacion di "GRACIA". Y e bendicion aki ta ofreci na cada uno di nos. Siendo cu ta pica ta separa nos for di Dios, nos mester admiti nos picanan y repenti di curason y asina ricibi e gracia di Dios. (Nos lo contiuna)

SPERANSA continua

2009-11-13T12:28:00.000-08:00

Ola, amigo/anan y famianan!

Ami, Betty, tin poco nostalgia awe - heimwij! Repasando poco fotonan , mi ta corda nos ultimo anochi na Camp Washington! E lugar stima unda mi a traha pa 15 aña largo den e obra dushi di Campamentonan, deporte, obra di man, musiek, etc., cu mucha y hoben, dama y adulto. Aki riba e dos foto tin Chinda y Linda cu a come hunto cu nos e anochi ey. Nos ta saboreando un Soppi y un plato di salada "Jumbo Shrimp" cu Ingrid Tromp a trece pa nos! Danki Ingrid!

Bicento ta recuperando di un griep y ami ta den su prome dianan! Ma sinembargo nos a corda nos BLOG, pues
ata e conclusion di nos topico SPERANSA.

Scirbiendo na e hendenan di Efesio cu a kere e Evangelio di gracia di Dios, e Apostel Pablo ta spierta nan cu e proposito di encurasha nan bisando: "P’esey, corda cu antes boso cu ta pagano di nacemento, y yama no circumcida pa esunnan cu ta yama nan mes :e circumcision" (esey hasi den e curpa dor di mannan di hende) – corda cu na e tempy ey, boso tabata separa for di Cristo exclui for di ciudadania den Israel, y stanheronan na e Aliansanan di e promesa, sin speransa y sin Dios den e mundo. Pero awor den Cristo Jesus boso cu un tempo tabata leuw, a wordo treci cerca dor di e sanger di Cristo." Efesionan 2:11-13.

Aki Amigonan, e distinction ta entre Judiu y no Judiu. Na manera di bisa, e mes un distincion ey ta existi aki na Aruba y Antiyas y rond mundo.

E Ley di Mandamentonan a bini mediante e Judiunan. E profetanan a bini for di nan. E Mesias, esta nos Señor Jesus, a bini for di nan, segun carni. Den e capitulo 4 di e Evangelio segun Juan, nos tin e relato tocante e descusion cu Señor Jesus tabatin cu un mohe Samaritano. Y den versiculo 22 Señor Jesus ta bisa lo siguiente, "Boso Samaritanonan ta adora loke boso no conoce, pasobra salbacion ta for di e Judiunan." Sinembargo e declaracion ey no ta nifica cu nos cu no ta Judiu di nacemento , mester bira Judiu pa nos wordo salba. Di ningun manera, pasobra otro Scrituranan ta splica masha cla, cu tanto ta Judiu y no Judiu mester repenti y kere e Evangelio pa ricibi pordon di picanan y bida eterno. Den e caso aki, no tin diferencia entre Judiu y no Judiu;pasobra tur a peca y ta falta e gloria di Dios. Mi ta pidi esunnan cu lo lesa e mensahe aki, pa bo lesa sin falta e capitulo tres di Romanonan pa un splicacion cla tocante e tema aki.
Bolbiendo na e declaracion "sin speransa y sin Dios den mundo". E ta zona manera algo imposibel pa nos, e habitantenan, di Aruba y Antiyas. Pero amigonan, e berdat segun Scritura ta; cu si un persona no ta den Cristo, ta nifica cu e persona aki no tin speransa y e no tin Dios. Algun lo bisa: Kico? Anos sin Dios? Nos tur ta Cristian, y ningun hende por gaña nos! Pero, amigonan stima, pa kende Cristo a sufri y duna Su bida; e berdad ta hopi cla scirbi pa nos den Scritura Santo. Cristo a carga nos picanan den Su curpa ariba e crus, pa nos libra di picanan por biba pa husticia .

P’esey e mandamento di Dios awe na tur parti di mundo ta, pa nos repenti y acepta Jesus como nos Salbador personal. Ta cada uno di nos mester repenti, y ningun hende, ni angelnan por haci esey pa nos. Manera ta para scirbi: "Den tempo pasa Dios a pasa over e ignorancia di hende, pero awor E ta manda tur hende na tur parti pa repenti, pasobra El a pone un dia cu E lo husga e mundo cu husticia pa medio di e homber cu El a apunta. El a duna prueba di esey na tur hende dor di a lant’E for di morto. Lesa Echunan 17:24-31.
Te aki pa awe amiganan. Si bo tin un algo pa puntra of comenta sinti liber pa scirbi nos na bbhenriquez@shaw.ca

SPERANSA

2009-11-02T13:13:00.000-08:00

Aki nos ta cla pa dal un trip chikito na un puebel mei ora distancia di auto hunto cu nos cuña Salome. E, hunto cu su esposa Bill, a yega di bishita Aruba, Bonaire y Curacao alomenos tres biaha! Su esposo tabata e predicador pa nos prome campamento na Plantashi Tromp y nan a keda den e tent cu a yama: Abraham y Sarah. Algun di bosonan por corda esey - tur e tentnan tabatin nombernan di Beibel. Salome ta bai haci 92 aña otro siman, si Dios permiti, y ta fit fit - mihor cu nos! E ta biba den e mes un lugar na unda nos ta biba y nos ta bebe coffee hunto, di bes en cuando come hunto. E ta un biuda awor di alomenos 5 aña. E ta bisa tur ora cu nos ta asina un consuelo pa nos. Wel, pa nos, e ta un dushi persona mes!

Awor na nos topico awe di SPERANSA"

Beibel ta menciona tres cos cu lo keda pa semper. Tres cos cu lo tin impacto pa eternidad y e tres cosnan aki ta: FE, SPERANSA, y STIMACION (of AMOR). E tresnan aki ta bai hunto, y no por wordo separa. No por tin berdadero speransa, si un persona no tin e fe cu ta segun Scritura. Mescos, nos no por tin berdadero amor, si nos no tin e fe di curason cu ta segun Scritura. Tin algun forma di e expresion speransa cu ta wordo usa rond mundo encluiendo Antiyas y Aruba. Ehempel; nos lo bisa: mi ta spera cu awa lo yobe e aña aki. Of, mi ta spera cu mi yiu lo pasa su examen bon, etc., etc.

E formanan ey di speransa, no ta e loke nos ta papia di dje. E loke nos ta papia di dje den e mensahe corto aki, ta e speransa bendiciona di tur esunnan cu ta kere e Evangelio segun Scritura.

E prome persona cu a practica e speransa aki ta nos Señor y Salbador Jesus. Salmo 16, mescos cu hopi di otro Salmonan, tin profecianan tocante Señor Jesus . Despues di Su resureccion nos Señor a aparece na Su discipelnan, pero nan a spanta y a haya miedo, keriendo cu nan tabata mira un spirito. Anto El a bisa nan: "Esaki ta e loke Mi a bisa boso mientras cu Mi tabata cu boso ainda. Tur loke ta para scirbi tocante di Mi den e Ley di Moises y e profetanan y e Salmonan, mester wordo cumpli." (Lesa Lucas 24:36-49)

Anto den Salmo 16:9-11 nos ta lesa, "P’esey mi curason ta contento y mi lenga ta recosiha, mi curpa tambe lo descansa cu siguransa, pasobra Bo lo no bandona mi na e graf, ni tampoco laga Bo Santo mira corupcion.." etc. E mes un Salmo aki a wordo usa pa e Apostel Pedro despues di e resureccion di Señor den Ech. 2:25-28. Lesa Echunan 2:14-36. Pues, vers 26, ta profetisa e speransa di e Mesias cu ta nos Señor Jesus, cu e Tata lo no permiti pa Su curpa mira corupcion. Y esey ta loke a tuma lugar ora cu E Tata a lanta Señor Jesus for di morto. (Ech. 3;15; Ech 4:10; Gal. 1:1; Efe. 1:18-23; Col. 2:12; 1 Tes. 1:9.10; Heb. 13:20,21; 1 Pedro 1:21; Compara 1 Pedro 1:3-5)

E motibo pakico nos ta pidi esun cu ta lesa e mensahe corto aki pa lesa e Scrituranan ey, ta pasobra cu ta SOLAMENTE mediante e Palabra di Dios, nos por tin beradero speransa awor y den e bida aki. P’esey nos ta encurasha cualke persona cu ta lesando esaki, lesa Echunan 2:14-36 cuidadosamente cu oracion. Aki nos por lesa cu Rey David no tabata papia di su mes, pero di e Mesias, Kende segun carni tabata un desendiente di David.

Den e prome mensahe cu a wordo duna despues di e resureccion di Cristo, nos por mira e importancia di e Resureccion. Nos speransa di resureccion y bida eterno, ta basa ariba e resureccion di nos Señor Jesus. 1 Corintionan 6:14 ta bisa lo siguiente: "Pa Su poder Dios a lanta e Señor for di morto, y E lo lanta nos tambe." (Tradusi for di NIV). Den e capitulo 15 di prome Corintionan, e Apostel Pablo ta enfatisa e importancia absolut di e resureccion di nos Señor bisando: Si Cristo no a wordo lanta (for di morto) boso fe ta inutil;ainda boso ta den boso picanan. Tuma tempo rumanan y amigonan pa lesa e Capitulo 15 aki di prome Corintionan cu oracion ferviente di curason. Si Señor permiti, nos lo continua tocante Speransa.

Pues, te otro biaha.

BON OBRANAN (Continua)

2009-10-23T08:56:00.000-07:00

Bon dia Amigonan na Aruba y Antiyas, mi ta continua riba e topica di "Bon Obranan" awe mainta:

E profetanan di antes, kendenan pa medio di e Spirito Santo a anuncia adelanta cu un Salbador lo bini; tambe a anuncia cu bon obranan y sacrificionan nunca por hustifica un persona.

Awe pa cuminsa nos lo considera e Israelitanan. E Todopoderoso a libera nan cu man fuerte for di esclabitud na Egipto. Y despues di esey El a duna nan e ley di mandamentonan mediante Moises. Tambe El a duna nan e profetanan entre cualnan tabatin Isaias y Jeremias y Ezekial. Despues di corto tempo cu nan a wordo libra for di man di nan enemigonan, y cu nan a ricibi e dies mandamentonan y otro leynan; nan a cuminsa ta depende ariba nan sacrificionan, enbes di obedece e otro mandamentonan di Dios. Anto Señor a manda e profeta Isaias serca nan cu e mensahe aki cu nos ta haya scirbi den Isaias capitulo uno.

"Scucha e palabra di e Señor, boso gobernantenan di Sodoma; scucha na e ley di nos Dios, boso puebel di Gomora! E multitud di boso sacrificionan, kico nan ta pa Mi? E Señor ta bisa. Mi tin mas cu basta di ofrendanan kima, di chubatunan y e gordura di animalnan gordá. Mi no tin placer den e sanger di toronan y lamchinan y cabritonan. Ora cu boso ta bini pa presenta Mi dilanti; ta kende a pidi boso esaki, e trapamento di Mi pationan? Stop di trece ofrendanan bano! Boso censia ta detestabel pa Mi" … etc., etc. (Lesa Capitulo uno di Isaias)

Tin hopi otro Scrituranan similar den e Testament Bieu y e Nobo. Señor Jesus a spierta nos hopi cla, y mescos e Apostelnan tocante e sirbishi di lipnan, mientras cu nos curason ta leu di Dios. Den e buki di Mateo capitulo 15, nos ta lesa di un grupo di religiosonan cu tabata sigui Jesus fielmente, pero no pa ricibi siñansa fo’i djE, ma pa critica y busca falta. Anto Jesus a bisa nan lo siguiente: "Boso hipocritanan! Isaias tabatin rason ora cu el a profetisa tocante boso": "E puebel aki, (of: e hendenan aki) ta onra Mi cu nan lipnan, pero nan curasonnan ta leu fo’i Mi. Pornada nan ta adora Mi; nan siñansanan ta solamente reglanan siña dor di hende." Mateo 15: 1-20 (NIV).

Amigonan stima di Antiyas y Aruba y tur otronan cu lo lesa e mensahe aki; aunke no ta parce asina, pero nos aki den e Islanan, tin e mes un peligernan cu e Judiunan cu tabata ofrece sacrificionan y ofrendanan cu tabata segun ley. Pero tog Señor a rechasa tur e cosnan ey. Pakico Señor a rechasa nan ofrendanan y sacrificionan? E contesta ta duna ey mes den Isaias capitulo uno, y den varios otro lugar den Scritura. E hendenan aki tabata trece ofrenda y sacrificio y haci oracion. Pero nan man tabata mancha cu sanger y yen di inhusticia na e sernan humano cu tabata mas vulnerabel. Nos aki na Antiyas y Aruba ta den e mes un situacion individual. Nos tambe ta haci hopi oracion na santonan y asta na Dios Su mes; pero nos no ta repenti di nos picanan y maldadnan y inhusticianan comete na esunnan cu ta mas vulnerabel. Si bo tin un Beibel, lesa loke Señor ta bisa nos den Hebreonan 10. Lesa e Capitulo aki completo, y no mucho pura. Y lesa cu oracion sincero pa Señor yuda bo comprende y duna bo fe pa bo obedece na e fe den Señor Jesus pa pordon y bida eterno. Corda bon cu Señor ta stima bo y no ta Su boluntad pa bo bai perdi. Sea sigur di esey.

BON OBRANAN

2009-09-29T10:24:00.000-07:00

Bon dia! Awe aki na Canada ta haci basta frio y biento ta supla duro! E clima
ta cambiando, y winter ta riba caminda! Awor ta dushi pa sinta paden y wak
pafo! Ata Señor Bicento ta cla pa su estudio Biblico pa awe:

"Nos tabatin dos mensahe cortico tocante e declaracion Biblico cu ta bisa nos masha cla, cu no tin ni un hende cu ta hasi bon, y cu nos tur a desvia di e bon camina. Scritura ta enfatisa cu Cristo a bin na mundo pa salba pecadornan. Lesa cuidadosamente Romanonan capitulo 4 y 5 tocante e tema ey.

Pero awe nos ke trece padilanti, e otro banda di e medaya. Y nos ta recomenda e siguiente Scrituranan aki: Romanonan capitulonan 5 y 6. Tambe Efesionan Capitulo 2. Tin hopi otro Scrituranan cu ta papia cu nos tocante con pa biba como uno cu a tende e Evangelio di gracia di Dios, y cu yudansa di e Spirito di Dios a repenti di pica y a ricibi Señor Jesus como nan Salbador.

Den Efesionan 2:8-10, nos ta lesa lo siguiente, "Pasobra pa medio di gracia boso a wordo salba, door di fe, y esaki no ta for di boso mes, e ta e regalo di Dios; no pa medio di obranan, asina cu ningun hende por gaba. Pasobra nos ta Dios Su obra, crea den Cristo Jesus pa haci bon obranan, cual Dios a prepara di padilanti pa nos hasi."

Aki anto amigonan y rumannan stima pa Dios nos Tata Su mes, nos ta haya claramente mescos cu den hopi otro Scrituranan, e otro banda tocante bon y mal hende. Ora cu un pecador ta obedece e Evangelio di gracia di Dios mediante repentimento sincero y fe den Esun cu a carga nos picanan den Su curpa ariba e crus, y cu a wordo dera, pero a resucita for di morto door di Dios e Tata; e persona aki, segun Scritura, ta nace di nobo y ta ricibi e Spirito Santo como seyo di garantia cu e ta pertenece na Dios. (Lesa Efesionan 1:13,14 y Efesionan 4:30-32).

Pone bon atencion cu den e porcionnan di Scrituranan aki, nos ta haya algo di loke bon obranan ta nifica. Pasobra aki den Antiyas y Aruba nos tabata pensa cu bon obranan ta nifica ora cu bo ta duna limosna na un pober, of bo ta asisti na misa y sorto di cosnan asina. Pero lesando e carta aki cu e Apostel Pablo a scirbi na e Cristiannan di Efeso, y esun scirbi na e Colosensenan, nos por mira hopi cla e loke bon obranan ta nifica. Lesa por fabor e dos cartanan aki cu oracion sincero di curason y cu e Spirito Santo di Dios lumina nos, pa nos por repenti y confesa nos picanan di negligencia.

Cu Señor mediante Su Palabra y Su Spirito Santo lo ilumina nos mente pa nos por mira e balki cu ta den nos
mes wowo. Anto e ora si nos lo por mira cla pa nos saca e stof cu ta den wowo di nos ruman.
......nos lo continua cu e tema aki den nos proximo mensahe cortico. PASA UN DUSHI DIA... si bo a lesa
esaki tuma un rato y comenta sea ariba Facebook, ariba blog of via email.

BON HENDE (Continua)

2009-09-24T13:08:00.000-07:00

Bon tardi, amigo/anan!

Danki pa tur emailnan, y pa commentarionan ariba Facebook. Semper e ta un bendicion pa nos tende algo di bosonan! Wel, aki na Canada e COSECHA ta tur rond di nos. Unda cu nos ta keiro, e cunuceronan ta bezig ta trece e cosecha den e mangasina prome cu winter: sea ta trigo, canola, haver, of batata, wortel, tomati, of maishi. E ta un bunita tempo di aña y tambe bunita pa para opserva. Nos ta birando benificiarionan di e cosnan ey tambe!

Ata aki algun foto nos a saca despues di un biahenan aki e siman cu a pasa: gosando cosecha di tomatinan, plums, batata, concomber, etc., y ademas nos a haya pisca fresco na abundancia, cu nos por a parti cu otro. Bicento ta ataca poco tomati cu nos a haya - oh chikito e tomatinan ta!! Ma grandi cu nan ta, nan ta masha delicisio; mira plumsnan - nos a come sin corda e consecuensianan! Mira batatanan balente y concomber. Mi a traha hopi "dill pickles" cu e mas chikitonan. Asta pisca cu nos a haya for di leuw den norte for di rasa indjan canades. Utlimo nos ta corta apelnan cu nos a cosecha aki mes riba e propiedad cu nos ta bibando - ora largo nos a corta apel y fries nan;

AWOR PA NOS MEDITACION TOCANTE "UN BON HENDE"
Den nos prome mensahe tocante e topico aki di bon hende, nos a proba for di varios scritura cu no tin ni un hende cu ta bon den bista di Dios. Un di e errornan grandi ta pa un persona kere den su mes cu e ta puro y sin mancha y sin culpa den e bista di Dios, basa ariba su propio husticia, Nos mester comprende cu pica a drenta mundo via of door di un hende, y via di pica morto tambe a drenta. Y p’esey morto a pasa na tur hende, pasobra TUR a peca. (Romanonan 5:12)

Ma e bon noticia ta; cu mescos cu pica a drenta mundo door di un hende, mescos tambe Dios Su gracia abundante di pordon y bida eterno a bini door di un hende, cu ta JesuCristo. Ta bon pa nos comprende cu e drentado di pica den mundo door di un hende, a trece morto y condenacion. Pero e drentada di e gracia abundante di Dios mediante Su Yiu nos Señor, a trece hustificacion y bida eterno. Scritura ta repeti y ta enfatisa cu bida eterno y tur e bendicionnan cu ta compaña esey, ta regalo di Dios. E no ta algo cu nos por merece mediante nos propio obranan, of mediante nos religion y bida religioso.

Amigonan tur, tanto ta di Curaçao of Bonaire of di Aruba; e bida abundante aki nos por ricibi’e di gracia, y nos no por paga p’e. Pero el a costa un preis masha halto mes. Mas cu nos lo por comprende. El a costa e bida y e sanger di e Yiu di Dios cu ta nos Señor y Salbador JesuCristo. P’esey cu awe nos ta dobla nos rudianan pa e Yiu di Dios. Pasobra El a bin na mundo den un curpa manera esun di nos. Un curpa cu por a sinti dolor y cansancio. Un curpa cu por a wordo tenta pa haci pica mescos cu nos, pero El a risisti tentacion aunke cu El a sufri pa esey. Y den tur eseynan Señor Jesus a obedece e boluntad di Dios e Tata, y umiyando Su mes, El a obedece e boluntad di e Tata te na morto, anto e morto ariba un crus. Y nos ta lesa den Beibel cu pa motibo di Su obediencia, e Tata a hals’E te na e lugar di mas halto, y a dun’E e nomber cu ta ariba tur nomber. Di manera cu pa e nomber di Jesus, tur rudia lo dobla, tanto ta den cielo como ariba mundo y bou di tera. Y tur lenga lo confesa cu JesuCristo ta Señor na e gloria di Dios e Tata. (Lesa Filipensenan 2:5-11)

P’esey Amigonan, laga nos comprende y obedece e Scrituranan cu ta bisa nos suficientemente cla, cu no ta existi ningun hende den mundo cu ta asina un bon hende, cu Dios lo recompens’e cu bida eterno ora cu e muri. Señor Jesus no a bini na mundo pa busca e hendenan cu ta husto, ma El a bini pa busca y salba e pecadornan cu repenti. Segun Scritura, awe ta e dia di salbacion. P’esey si bo ta uno cu a tende Su bos awe, no haci bo curason duro door di sigui biba manera un cos cu e spiertamento y invitacionnan ey no ta pa bo.
Obedece Señor awe y awor y biba. Pasobra na tur hende cu ricibi Señor Jesus pa medio di fe awe, ta ricibi e drecho pa bira yiunan di Dios: no nací di manera natural, pero nasí di Dios.
(Lesa Juan 1:1-14)
TE UN OTRO :BLOG

UN BON HENDE

2009-09-12T08:53:00.000-07:00

Bon dia amigonan y amiganan! Ya nos ta den e luna di September. E weekend cu a pasa, nos dos biehitonan a coge nos rumbo pa un Lagun (SLED LAKE) leuw den parti nord di nos provensia. Nos a pasa tres dia trankilo asina den un cabina ofreci na nos pa un sobrina di ami, Betty. E ta na oriya di e lagun, y ey nos por a sinta wak e lagun y e parhanan, e binanan. E cabina ta tur rond na bentana - pues bunita bista -unda cu nos a bira nos cara! Mi ta post un dos foto pa boso por gos'e hunto cu nos!
4. E cabina den cual nos a hospeda!

3. Bicento y Betty ariba QUAD ta keiro den e mondinan conoci di tin beer den dje! Basta curashi, no? 2. Bicento yen di animo pa hisa hacha pa chapi palo! Pakico? 1. Pa su "purunchi" kainta pia. Wel, wel, e tabata un dushi weekend. Ma awor na cosnan mas serio..... Kico Beibel ta bisa tocante: Un Bon Hende.

Mas tanto despues cu un persona a muri y a worde dera, nos por tende expreshonnan manera: "E tabata un bon hende." Of: "E tabata un mal hende." E forma ey di husgamento a existi for di principio di e creacion di hende riba mundo. Asina pronto cu e prome hende Adam a peca, pica a drenta den mundo, y hunto cu pica morto tambe a drenta. Y asina morto a pasa na tur hende, pasobra tur a peca.

Sinembargo e ta cla pa mira, cu no ta tur hende ta comete e mes un sorto di picanan. No ta tur hende ta comete crimennan horibel manera matamento of abuso contra mucha of hende di edad halto. Ehempel tocante loke hende ta considera como bon hende, nos por haya den Scritura mes. Den e Evangelio di Juan 7, nos por lesa con den un ocacion Señor Jesus a dicidi di asisti na e fiesta di tentnan na secreto, pasobra e Judiunan tabata busc’E pa mata. Anto den Juan 7:12, nos ta lesa lo siguiente: "Den e multitudnan tabatin hopi murmuramento tocante di Jesus. Algun tabata bisa: "E ta un bon persona. Otronan tabata bisa: No, alcontrario, E ta desvia e multitud." Nos por sigui cu mas ehemplonan for di Scritura, pero e husgamento tocante bon hende y mal hende ta algo universal. Considera e tres islanan di Aruba, Curaçao y Bonaire. E gran mayoria ta wordo yama Cristiannan. Y e mayoria di e asina yama Cristiannan, tin e pensamento cu ta e bon hendenan lo bai cielo un dia, mientras cu e mal hendenan lo wordo tira den candela y kima pa semper.

E pregunta cu ta keda ta esaki: "Con nos por haya sabi e berdad tocante algo serio y solemne manera e doctrina aki di bon y di mal hende? Danki na nos Tata Celestial e contesta pa e pregunta aki, nos ta haya cla y sigur den Beibel. Di acuerdo cu Scritura Santo. "No tin ni un persona husto, ni sikiera uno; no tin un persona cu ta comprende, ni uno cu ta busca Dios. Tur a desvia y conhuntamente a bira inutil; no tin ni un persona cu ta hasi bon, ni sikiera uno. Nan garganta ta grafnan habri; nan lenga ta practica mintira. E veneno di colebra ta ariba nan lipnan. Nan boca ta yen di maldicion y amargura. Nan pia ta lihe pa drama sanger; ruina y miseria ta marca nan caminanan, y e camina di pas nan no conoce. No tin temor di Dios dilanti nan wowo." (Romanonan 3:9-18)

P’esey, amigonan; ta necesario pa nos comprende cu e porcion di Scritura aki., mescos cu otro Scrituranan, ta enclui cada uno di nos den e tres islanan aki, mescos cu tur otro sernan humano den mundo. No ta importa di cual nacion, ni ki color ni nada otro. Simplemente no tin excepcion di persona. Sea ta homber of mohe, color scur of color cla, sabi of sin educacion, etc. Pero Scritura no ta bisa cu tur hende ta comete e mes un picanan of crimennan of bahesa, etc. Pero loke Beibel si ta bisa masha cla mes ta: "CU TUR HENDE A PECA Y TA FALTA E GLORIA DI DIOS." (Lesa sin falta Romanonan 3:21-31) Pero danki pa semper na nos Dios y Tata Celestial, cu El a hasi e posibel, pa nos pecadornan por ricibi pordon di tur nos picanan y haya bida eterno.

Con? E contesta ta cla y ta wordo repeti bes tras bes den Scritura. Tuma pa ehempel e Apostel Pablo ta bisa nos den Romanonan 5: Cuminsando cu vers 17: "P’esey si un hende ta den Cristo, e ta un creacion nobo; e biew a bai, e nobo a bini! Tur esaki ta for di Dios, Kende a reconcilia nos na Su mes mediante of door di Cristo y a duna nos e ministerio di reconciliacion: cu Dios tabata reconciliando e mundo cu Su mes den Cristo, sin conta hende su picanan contra nan…. "P’esey nos ta embahadornan di Cristo, net manera Dios ta apela na boso door di nos. Nos ta roga boso den e nomber di Cristo: Sea reconcilia cu Dios. El a haci Esun Kende no tabatin pica pa bira pica pa nos, pa nos por bira e husticia di Dios den djE.": (Lesa 2 Cor. 5:17-21) Otro Scritura ta bisa nos lo siguiente: "Ta for di Dios nos ta den Cristo Jesus, Kende a bira pa nos sabiduria for di Dios, esta, nos husticia, santidad y redencion. P’esey, manera ta scirbi, Laga Esun cu ta gloria, gloria den Señor." (Lesa 1 Cor. 1:26-31) NOS TA INVITA BO pa comenta ariba e BLOG AKI... tuma un momento pa laga nos sabi cu bo a les'e.

(Nos lo continua riba un siguiente Blog)

Romannan 1-4

2009-08-22T14:16:00.000-07:00

Romannan 1-4: "capitulonan"

UN CURPA Y UN SPIRITO

2009-08-21T07:38:00.000-07:00

Bon dia, bon dia! Cumindamento na tur nos amiga/onan di nos Blog! Nos ta confia cu boso ta bon. Danki pa

esnan cu a laga nos sabi cu boso a lesa nos ultimo blog. Semper ta bon di tende for di nos amistadnan ariba Blog, E-mail y Facebook! E fotonan awe ta saca for di nos veranda chikito. E flornan ta duna nos goso, y cu pacenshi nos ta spera e tomatinan hecha, y promenton y promente pica madura!!

Awor tuma tempo pa print e mensahe aki y les'e y medita den dje! E lo ta un bendicion grandi, bo sa pakico? Pasobra no ta nos palabra, ma e Palabra di Dios. Tuma bo Beibel y busca cada versiculo menciona, y mira cu

asina e ta!!

E doctrina di Spirito Santo ta di vital importancia pa e Iglesia di Dios como un curpa y un spirito. Pero te ariba e dia di awe, hopi berdadero keredornan ta keda ignorante di e doctrina aki, of ta kere loke Scritura no ta siña.

Uno di e peligernan grandi den e doctrina aki ta ora cu nos ta siña loke ni Señor Jesus, ni e Apostelnan no a papia di dje. Siendo asina, ta ken ta ami ta pa splica e doctrina aki. Mi ta admiti y ta confesa cu ami no por splica e Spirito Santo, pero mi ta kere di curason cu tin e Spirito aki, y cu si un persona no tin e Spirito Santo, e no ta pertenece na Cristo.

Un di obstaculonan grandi tocante e doctrina aki, ta ora cu un persona ta confia, of ta depende ariba sintimentonan emocional como siñal. Rumannan stima pa Dios nos Tata Su mes; Scritura cu ta inspira pa e Spirito di Dios, ta siña nos hopi cla, cu e husto lo biba pa medio di fe. Asina aki nos ta lesa den Rom. 1:17: "Pasobra den e Evangelio un husticia for di Dios ta wordo revela; un husticia cu ta pa medio di fe for di principio te fin, manera cu ta scirbi: E husto lo biba pa medio di fe." E declaracionnan aki ta enclui tur doctrina Sano encluyendo e doctrina di Spirito Santo. Mi ta papia di e declaracion cu: "E husto lo biba pa medio di fe." Y e fe aki ta bini mediante e Palabra di Dios.

Ora cu nos ta tende (of lesa) e Palabra di Dios, e mes un Spirito Santo ta yuda nos pa comprende y pa kere. Den otro palabra, sin yudansa di e Spirito di Dios, nos lo no por comprende e Palabra di Dios. Ademas, ora cu un persona ta tende y ta comprende e mensahe di Evangelio, e Spirito di Dios ta convence e persona di pica y di husticia y di huicio. E ta yuda e persona pa e admiti su picanan y pa e pone su fe den Cristo, Kende a carga nos picanan den Su curpa ariba e crus. Sigur cu tin otro detayenan di persona pa persona; pero den tur caso ta e mes un Dios ta obra pa medio di e mes Spirito den cada persona pa e obedece e Evangelio di Cristo y di Dios, y bira un creacion nobo.

Manera nos ta lesa den 2 Cor. 5:17: "P’esey si un hende ta den Cristo, e ta un creacion nobo; e loke ta biew a pasa, e nobo a yega"! Anto e ta sigui bisa: "Tur esaki ta for di Dios, Kende a reconcilia nos na Su mes pa medio, of mediante, of dor di Cristo y a duna nos e ministerio di reconciliacion: cu Dios tabata reconciliando e mundo na Su mes den Cristo, sin conta hende su picanan contra nan.… Dios a hasi Esun Kende no tabatin pica, pa ta pica pa nos, pa asina den djE nos por bira e husticia di Dios." (Lesa 2 Cor. 5:17-21)

Cuanto tempo e ta tuma prome cu un persona kere y obedece e Evangelio? Mi no ke meen, cuanto tempo e ta tuma pa un persona kere despues cu el a tende un sermon, of un predicashi. Pasobra hopi di nos predicashinan y sermonnan ta bashi dor di no ta conecta cu e Evangelio. Cuanto tempo ta tuma pa un persona kere despues cu el a tende e Evangelio, no ta pa nos ni supone. Beibel ta spierta nos masha cla mes cu su nos tende Su bos awe, no hasi nos curason duro. Cada dia cu ta pasa, nos curason, nos boluntad, etc., ta bira mas y mas duro. Y e Spirito di Dios lo no convence hende pa semper. No tin peliger mas grandi pa un ser humano, cu pa wordo convenci pa e Spirito di Dios pa e pone su fe den Jesus y asina ricibi pordon di tur picanan y bida eterno di gracia for di Dios; anto pa e persona aki bira lomba cu e excusa pa un otro dia. E dia di Dios ta awe, y e tempo ta awor! (Heb. 3:7 y 2 Cor. 6:1,3.)

CON CERCA? (continua)

2009-07-29T10:13:00.000-07:00

Bon dia, bon dia amigo/anan stima. Ata nos aki cu parti dos di e pensamentonan for di Scritura tocante e topico CON CERCA?

Ma prome: nos ta acustumbrando poco poco cu bida aki den Bethany Place - lugar pa hende di edad y cu ta haya yudansa segun mester. Desde cu nos a cumunica cu boso, Dios a provee un auto pa nos, y nos ta sinti liber mes - por bai bin segun cu nos kier y mester. Ayera nos a trip pa un dos ora den e barionan y cunucunan grandi di trigo, canola, haver, pitipua, etc. Tambe hofinan yen di berduranan y fruta. Nos a haya un macutu yen di strawberried grandi y zoet! Nos a come bai gol! Ata foto di nos auto! Tambe por mira con nos sala ta keda!

Y awor na e pensamento pa awe: Cada un cu ta lesa e mensahe aki mester hasi su mes e pregunta: Kico ami mester hasi pa mi por ta den Cristo? Serca kende mi mester bai, of: unda mi por bai pa mi por haya un contesta cla y sigur? Pa e autoridad di Dios Su palabra nos por contesta cu tur confiansa, cu e contesta sigur ta ey mes den bo Beibel. Habri bo Beibel y busca Romanonan capitulo 10. Lesa e capitulo completo cu oracion sincero na Dios, pa E yuda bo comprende e porcion di Scritura aki, y pa bo obedece.

Cuminsando cu e versiculo seis (6) nos ta lesa lo siguiente: "Ma e husticia cu ta pa medio di fe ta bisa: No bisa den bo curason; Ken lo subi bai na cielo? (esta pa trece Cristo abou) of, Ken lo baha den e abismo? (esta pa trece Cristo ariba for di morto). Pero kico e ta bisa? "E palabra ta serca di bo; e ta den bo boca, y den bo curason, esta e palabra di fe cu nos ta proclamando. Cu si bo confesa cu bo boca, "Jesus ta Señor", y kere den bo curason cu Dios a lant’E for di e mortonan, bo lo ta salba. Pasobra ta cu bo curason cu bo ta kere y ta hustifica, y e ta cu bo boca cu bo ta confesa y ta salba. Manera Scritura ta bisa, "Cada uno cu confia den djE, nunca lo wordo poni na berguensa." Pasobra no tin diferencia entre Judiu y Griego, e mes Señor ta Señor di tur y ta bendiciona ricamente tur cu yama na nE. Pasobra cada uno cu yama ariba e nomber di e Señor lo ta salba." (traduci for di NIV).
Den Scritura e frase "CURASON" ta wordo usa varios bes pa expresa e naturalesa humano. Den e Testament Bieu nos ta haya e frase, "curason", mas cu 700 bes. Y den e Testament Nobo, mas cu 100 bes. E prome mencion ta den Genesis 6:5 unda e ta bisa lo siguiente: "E Señor a mira con grandi hende su maldad ariba tera a para bira, y cu cada inclinacion di e pensamento di su curason tabata solamente maldad continuamente." Mediante di e profeta Jeremias, Señor ta bisa nos lo siguiente: "E curason ta mas engañoso cu tur otro cos, y totalmente corupto, kende por comprende? Ami e Señor ta scudriña e curason y ta examina e mente, pa paga hende di acuerdo cu su conducta, di acuerdo cu su echunan ta merece." (Jeremias 17:9,10)

Durante Señor Jesus Su ministerio ariba mundo, El a wordo acusa pa e lidernan religioso e tempo, cu E no tabata fiel na e tradicion di e bieunan. Jesus Su contesta tabata lo siguiente: Boso hipocritanan! Isaias tabatin rason ora cu el a profetisa tocante boso: "E hendenan aki ta honra Mi cu nan lipnan, pero nan curasonnan ta leuw for di Mi. Por nada nan ta adora mi; nan Siñansanan ta unicamente reglanan siña dor di hende." Anto Jesus ta continua bisando: "Pasobra for di e curason ta sali pensamentonan malo, matamento, adulterio, inmoralidad sexual, ladronicia, testimonio falso, calumnia." (Lesa Mateo 15:1-20.)

Tur e Scrituranan aki y hopi otro mas ta papia di e potencial di e curason humano. Ta cla pa mira cu aki e curason no ta nifica e curason cu ta pomp e sanger den e curpa humano ya for di barica di nos mama. Pero e ta papia di e capacidad mental y spiritual cu Dios a crea hende cu ne for di e prome hende Adam. Ora cu e prome hende a peca, pica a drenta den mundo, y esey a haci e posibel pa tur hende cu a nace despues di e caida, ta nace cu e naturalesa pecaminoso. P’esey cu un hende, no importa su rasa of color of apariencia, ta nace cu e naturalesa pecaminoso. P’esey, amigonan stima pa Dios, ta pa e motibo ey Dios a manda Su Yiu den mundo den un curpa manera esun di nos, pero sin e naturalesa di pica ey.
Amigonan, ta pa nos e Yiu di Dios a muri riba e crus cargando nos picanan den Su curpa. Repenti awe y hasi manera Romanonan 10 ta bisa! TE OTRO BIAHA! Si bo a lesa esaki scirbi nos na: bbhenriquez@shaw.ca

CON CERCA?

2009-07-14T09:18:00.000-07:00

Den e foto aki boso por mira tres cuña di mi cu tin e bunita edad di 90, 92 y 93 aña. Nan a bishita Bicento y ami aki den nos apartamento. Ki un dushi tempo nos tabatin di conta storia y cuenta di antesnan! Mi cuña Edna, sinta na man robes a bishita Ethiopia, Africa cu edad di 92!! Ki un privilegio nos tabatin di por a bebe un copi di te y combersa di e misericordia y bondad di nos Señor!

Awor Bicento ta sigui cu un spiertamento for di e Palabra di Dios.

Segun Scritura, e no ta haci diferencia kende nos ta, pasobra tur loke ta para scirbi, ta pa cada uno di nos. Tuma e Scritura aki como ehempel, unda e ta bisa: "P’esey si un hende ta den Cristo, e ta un creacion nobo; e loke ta biew a pasa, y e nobo a yega." (Traduci for di NIV 2 Cor. 5:17)

Pone bon atencion na loke e Scritura aki ta bisa. Pa cuminsa, e no ta bisa cu si un hudiu ta den Cristo, of si un cu no ta hudiu, of si un homber of un mohe, etc., etc., ta den Cristo. Ma e ta bisa simplemente: "Si un hende ta den Cristo, e ta un creacion nobo."

Realmente e expresion "hende" ta nifica: "cualke" persona cu ta den Cristo, etc. Pues e berdad revela aki ta cu no tin excepcion di persona serca Dios, pasobra tur hende a peca.
Otro berdad revela den e porcion di Scritura aki ta: "Tin esunnan cu ta den Cristo, y tin esunnan cu no ta." Pone bon atencion cu Scritura no ta bisa cu si un persona ta den e religion aki, e ta un creacion nobo. Hopi hende den e mundo aki, encluyendo Aruba y henter Antiyas; ta dependiendo ariba religion pa nan destino eterno. E tempo a yega y ta awe, pa nos repenti di nos picanan y ricibi Señor Jesus como nos unico y suficiente Salbador. Den e buki di Deuteronomia den e Testament Biew, nos ta lesa loke Moses a declara na e Israelitanan algun dia prome cu El a muri bisando: "Awe mi ta yama cielo y tera como testigo contra boso, cu mi a pone boso dilanti bida y morto, bendicionnan y maldicionnan. Awor scohe bida, asina cu boso por stima e Señor boso Dios, scucha na Su bos, y tene firme na nE. Pasobra e Señor ta boso bida. etc.," (Lesa Deut. Capitulo 30 y 31)

Manera nos sabi, e hudiunan no a obedece na e yamada aki di Dios dor di Su sirbidor Moses, cu excepcion di algun di nan. Amigonan di tur edad den Antiyas y den henter mundo, tin bes ora cu nos lesa un porcion manera esun ey den Deuteronomia, nos ta bisa: Si ami tabata ey, sigur ami si lo a obedece mes ora. Ma pa e autoridad di e Palabra di Dios, laga mi declara esaki: Awe nos tin Uno cu ta mas cu Moses, Kende ta papia cu henter mundo encluyendo Antiyas y Aruba. E ta Esun cu a bisa masha cla lo siguiente: "Ami ta e camina, berdad y bida, ningun ta bini cerca e Tata sino pa medio di Mi." Y den otro lugar El a bisa: "Ami ta e resureccion y e bida. Esun cu kere den Mi lo biba, aunke cu e muri, y ken cu kere den Mi lo biba, aunke cu e muri, y ken cu ta biba, y ta kere den Mi, lo no muri nunca". (Lesa Juan 11:25,26 y Juan 14;6)
Kisas bo a yega di tende e Scrituranan aki caba. Pero bo a obedece? Bo ta bibando cu fe den e Yiu di Dios cu ta nos Señor JesuCristo; Kende a entrega Su mes pa nos picanan, pa E trece nos serca Dios? Na final di e cuenta, e cos di mas importante pa nos den e mundo aki ta den Cristo. Esey ta dividi humanidad den dos. Tin esunnan cu ta den Cristo, y esunnan cu no ta.

E pregunta importante ta anto: Con un hende por ta den Cristo? E contesta ta duna na nos den Scritura Santo. Ta Dios solamente por haci algo asina. Y ta pa e proposito ey El a manda Su unico Yiu den mundo. Ta p’esey Señor a sufri y muri e morto riba un crus. El a muri pa picanan, ma no di djE, sino di henter humanidad encluyendo cada uno di nos cu ta na bida awe, y di cada uno cu lo nace ainda. E unico manera pa nos ta den Cristo ta pa nos repenti di nos pica y acepta Jesus como nos Salbador personal. Sin repentimento no tin pordon. Con serca cada uno di nos ta? E contesta ta den Scritura mes. Si un persona no ta den Cristo, e ta pafo.

Ningun hende por ta tur dos. Sea cu nos ta den Cristo, of nos no ta.

SIN EXCEPCION - continua

2009-07-03T07:53:00.000-07:00

Aki ta un foto di Sr. Bicento preparando e blog aki for di nos sala na Canada!

Beibel ta contene hopi declaracionnan asombroso, tanto ta na fabor como contrario di opinion di hende. E titulo cu nos tin pa e mensahe aki, ta uno di nan.

Di acuerdo cu Scritura, den tur e biyones di hendenan cu tin den mundo awe, no tin ni uno cu ta husto dilanti di Dios; ni skiera uno. Scritura ta enfatisa e declaracion ey bisando: "No tin diferencia, pasobra tur hende a comete pica, y ta cai corto di e gloria di Dios." Siendo cu ta asina, y e Scrituranan siendo inspira pa Dios Su mes, nunca por ta robes; ta nifica cu ningun di nos ta scapa e acusacion ey. No tin dispensa pa ningun hende. Lesa Rom. 1:20 y Rom. 3:4.

Kico anto amigonan di tur edad, nos por bisa relaciona cu e declaracionnan ey di Scritura, cu a wordo scirbi pa hombernan inspira pa Dios Su mes, y preserva pa nos por tin nan awe den nos propio idioma? Kico nos por bisa di tanto religionnan y gruponan religioso cu ta existi awe den nos mundo? Acaso ta existi un religion awe cu por hustifica un persona dilanti e Dios Santo cu ta biba den Lus inaccecibel; Kende ningun hende a mira y ni por mira? Lesa 1 Tim. 6:13-16. E contesta basa ariba e autoridad di e Palabra di Dios, ta: NO. Nunca a existi un religion of cualke grupo religioso cu por hasi un ser humano digno pa presenta dilanti un Dios Todopoderoso Kende ta biba for di eternidad. Pero danki na e mes un Dios aki, e Todopoderoso y Santo, El a haci’e posibel pa nos por proclama awe via e sistema aki di comunicacion, cu Si, tin un Persona (no un religion) cu por presenta nos limpi y sin mancha dilanti e Dios Todopoderoso aki revela den Scritura, y cu por ser visualisa dor di e obranan di Su man den e creacion. Lesa Rom. 1:18-20.

E persona aki Kende por presenta cada uno di nos limpi y sin mancha dilanti e Tata ta: "Nos Señor y Salbador JesuCristo, e Yiu di Dios." Awe nos por declara cu tur autoridad y siguransa cu: "No tin salbacion den ningun otro, pasobra no tin otro nomber bou di cielo cu ta duna na hende pa medio di cual nos mester ta salba!" Lesa Echunan 4:11,12

Amigonan di tur edad; compronde esaki bon: Ariba e dia di awe salbacion ta ofreci na bo mediante nos Señor JesuCristo; y no mediante ningun religion. Esaki ta un invitacion personal, pasobra te asta si bo tata y mama ta berdadero keredornan den e Yiu di Dios; esey no ta haci abo un yiu di Dios. Ta cada uno di nos individualmente mester admiti nos picanan cu berdadero repentimento cu ta di curason, y acepta Señor Jesus, Kende a muri pa nos picanan ariba un crus, como nos unico Salbador personal.
Beibel ta bisa nos cu sin repentimento no tin pordon. P’esey nos mester tene bon cuenta cu aki no tin wega religioso. E asunto di pica ta asina serio y profundamento ofensivo contra e santidad di Dios, y siendo cu El a stima humanidad asina tanto; E no a spaar ni Su propio Yiu, ma El a entreguE pa tur hende, pa e por trece nos serca djE. Lesa sin falta Rom.8:28-39. Si algun cu a lesa e mensahe corto aki ta convenci di e berdad, y ta di acuerdo cu e palabra di Dios; anto obedece awor mes, y no mira atras na e obstaculonan. Esun Kende ta yama bo, ta fiel y lo yuda bo awe cu ta e dia di salbacion. Lesa 2 Cor. 6:1,2.

Sea sigur amigonan di tur edad, cu e Señor nos Dios ta cumplidor di Su palabra.

Lo bo tuma un momento pa laga nos sabi cu bo a lesa e mensahe aki? Esey lo ta un manera pa encurasha nos

pa sigui scirbi mensahenan cortico for di e Palabra di Dios. bbhenriquez@shaw.ca

SIN EXCEPCION

2009-06-21T15:13:00.000-07:00

Bonbini na nos lugar di biba. 1. E grupo di edificionan pa hende grandi - tur ta conecta cu otro. 2. Nos edificio di parti patras. Ariba e blog Ingles por mira su dilanti. 3. Bicento preparando nos prome blognan! Awor un palabra for di e Palabra di Dios - "SIN EXCEPCION"

Di acuerdo cu Scritura Santo, no ta existi ni sikiera un persona husto den e mundo aki den e bista di Dios. Ademas Scritura ta bisa cu no tin un hende cu ta comprende, y ni un cu ta busca Dios, y cu tur hende a desvia y a bira inutil. Y cu no tin ni un cu ta hasi bon, ni skiera un. Ademas hende su garganta ta manera un graf habri, y lenga cu ta yen di mentira. E ta sigui bisa cu, veneno di colebra ta riba nan lipnan, y nan boca ta yen di maldicion y di amargura. Cu pianan lihe pa drama sanger; cu ruina y miseria marcando nan caminanan, y no ta conoce e camina di pas. Y dilanti nan wowo no tin temor di Dios.

Amigonan stima pa Dios Su mes; e declaracionnan aki bo por lesa den bo Beibel, y ta den Romanonan 3:9-20. Y esaki a wordo scirbi pa hudiunan y resto di humanidad. Pero cu tur reverencia y gratitud na Señor, nos Dios, e berdadnan ey no a wordo scirbi pa condena solamente; ma loke ta sigui ta pa mustra nos e unico camina di salbacion cual Dios nos Tata Su mes a proveë pa cada uno di nos, encluyendo tanto ta e Judiunan cu tabatin e ley, como e resto di humanidad encluyendo Aruba, Bonaire, Corsow, etc., etc.

E contesta ta clarisimo den Beibel, esey ta sigur. Sinembargo sin yudansa di Dios., ningun di nos lo comprende. Y e motibo ta cla den Scritura. Beibel ta declara cu nos segun naturalesa, ta morto den nos picanan, esta morto spiritual.

Den un ocacion durante Su ministerio, nos Señor JesuCristo a bisa lo siguiente: "Di berdad, di berdad, Mi ta bisa boso, esun cu tende Mi palabra y kere den Esun cu a manda Mi, tin bida eterno, y lo no bini na huicio, ma a pasa for di morto na bida."
Lesa Juan 5:16-30.

Amigonan y rumannan, e tempo cu nos Señor a papia e palabranan aki, E tabata ainda den un curpa mescos cu esun di nos, cu excepcion di e naturalesa pecaminoso cu cada otro ser humano a nace cu ne. P’esey Señor Jesus ta wordo yama: "E ultimo Adam." Lesa 1 Cor. 15:20-22 y 1 Cor. 14:45-49. Na manera di bisa; nos no a scoge pa nace cu e naturalesa di pica; pero awor si nos por scohe bida eterno of perdicion eterno. Nos por scohe salbacion of condenacion. Ta p’esey cu nos ta scirbi e mensahe corto aki. Nos ta confia cu e Spirito di Dios lo convence hopi almanan precioso tanto na Antiyas y Aruba; como na cualke otro lugar unda e mensahe aki lo wordo lesa. Ta e Spirito Santo ta convence nos di pica y di husticia y di huicio. Lesa Juan 16:5-16. Pa e motibo ey amigonan di tur edad pa kendenan Cristo a muri y resucita. Si bo a tende Su bos na manera di bisa, lesando e mensahe aki; anto no haci bo curason duro neglishando of posponiendo. Pasobra ningun di nos sabi kico por tuma lugar den un solo dia. Segun Scritura, nos a wordo cumpra cara. Señor Jesus a carga nos picanan den Su curpa ariba e crus, pa nos libra di picanan por biba pa husticia, pasobra pa medio di Su heridanan, nos a wordo cura. Lesa 1 Pedro 2:20-25 y 1 Cor. 7:23 y Efesionan 1:3-14.

Mi Tata Ta Na Timon?

2009-06-15T07:19:00.000-07:00

Bisando "AYO" na nos dushi laman di Caribe y alabes celebrando mi dia di nacemento dia 25 di April - y nos menos cu 82 añ di edad!! Danki Dios pa Su bondad.

Bon Dia na tur nos amigonan na Aruba, Bonaire, Curaçao, y Hulanda y unda ariba nos mundo aki cu tin hende cu ta papia nos dushi idioma Papiamento!
Ata awe ta dia 15 di Juni y nos bek na Canada. Ma ta mucho!!

Henter e caminda nos a sinti cu nos Tata Celestial tabata na e timon. Danki Dios pa nos sobrina Verna Ratzlaff cu a haci hopi trabao adelanta pa haci nos biaha largo di 13 ora di bula asina suave. Ma, danki Dios nos ta comfortablmente situa den nos apartamento, unda mas of menos 400 hende, manera nos, birando dia pa dia mas dedpendiente ariba yudansa di otronan. Nos biahe a bai masha bon mes. Aunke largo y nos a yega basta cansa, pero den bon salud. Nos ta gradicido na tur cu a duna nos un man prome, durante y despues di nos biahe.
Nos a prepara e mensahe aki pa wordo imprimi como un tractado, ma a dicidi tambe di pon’e riba nos Blog pa bosonan por les’e tambe. E ta titulo "Mi tata ta timon?" Aunke e ta bai ariba un biahe riba boto, nos tabata masha consiente cu nos Tata Celestial tambe tabata na timon di nos avionnan den cual nos tabata bula. Danki

Dios cu nos a yega sano y salvo!

Mi TATA TA NA TIMON?
Ora nos ta considera e inkietud internacional awe, y tur inhusticia y violencia cu ta tuma lugar na varios parti du mundo, nos ta puntra: Pakico Dios ta keto? Pakico E ta permiti inhusticia pa triunfa? Pakico E no ta castiga e rebeldenan cu ta trastorna pas di mundo?
E Salmista Asaf lo mester a pasa door di experencianan similar ora el a bisa den Salmo 74:10,11: " Cuanto tempo mas, O Dios, e atversario lo hasi bofon? E enemigo lo keda blasfema Bo nomber pa semper? Pakico Bo ta wanta Bo man, Bo man drechi? Sak'e for di Bo bus, destrui nan!" Pakico? Pakico? Pakico? Nos ta puntra awe.
Pakico Dios no ta mustra communismo su locura? Paciko E ta permiti pa nan blasfema Su nomber? Scucha contesta di Dios den Salmo 110:5,6: "Señor, ta na Bo man drechi; E lo plecha reinan den e dia Su furia. E lo huzga entre e nacionnan, E lo yena e lugarnan cu cadavernan, E lo plecha e kabesnan di hopi pais."
Laga nos considera y comprende awe, cu Señor no ta lihe na castiga, ma si, E ta pronto pa pordona. Si Señor lo castiga pica sin tene misericordia, ken lo por existi? Kende lo scapa? Manera e profeta isaias a sclama: "Riba esaki mi ta pensa, p'esey mi tin speransa. Di berdad, e misericordia di Señor no ta caba nunca, pasobra Su pacenshi nunca no ta faya. Tur mainta nan ta nobo; grandi ta Bo fieldad." Lamentacionnan 3:21-23
Nos ta ser spierta bes tras bes, pa nos no perde pacenshi, y pa spera riba Señor. E no por haci eror, E no por fracasa, E no por nenga Su mes. Aunke con e tempestad ta den su furia, aunke con e nacionnan ta borota, nos Tata Celestial ta e gran capitan di e universo. El a forma e curason di hende: y sigur sigur, e rabia di hende lo alab'E.
Un biaha a sosode cu un barco cual tabata nabegando from inglatera pa Estados Unidos a ser sorprendi pa un gran tempestad. Pronto e barco tabata tira p'aki p'aya door di e olanan fuerte. Tur hende abordo tabata den estado di alarma, menos un mucha-mohe di 8 aña, yiu di e capitan. "Ta kico a pasa?" el a puntra ora nan a lant'e y a sak'e fo'i cama. Su mama a bis'e di e peliger cu nan tabata aden. "Y mi tata ta na timon?" el a puntra. Nan a bis'e cu si, y el a contesta: "Anto mi ta bai drumi bek numa," y el a tira su mes di nobo ariba cama sin miedo y pronto e tabata morto na soño.
Ki un les esaki mester ta pa nos awe, ora nos considera e tempestad di nacionnan. Nos mester puntra manera e mucha: "Y mi Tata ta na timon?"
Si Tata ta na timon, anto mi no mester tene miedo. Sucha Salmo 4:8: "Na pas lo mi bai drumi y pega soño, pasobra ta Abo so, O Señor, ta haci mi biba den siguridad." Cualke rey por faya, y cualkier podoeroso por fracasa, ma nos Tata alcanse awe pa medio di Su Yiu JesuCristo. Pa medio di Su morto ariba e crus, y Su resureccion, e pecador por ser pordona di tur pica y haya pas cu Dios y pas di Dios.
E mundo si ta yen di dolor, y e mas peor ta pa bini ainda; ma pa nos ku ta den Cristo tin goso y pas cerca Dios, pa medio di nos Señor JesuCristo. :Y e pas di Dios ku ta surpasa tur comprendemento, lo warda boso curason y mente den Cristo Jesus." Fil. 4:7
Ora lamt’e olanan,
Tempestad ta den laman;
Den mi alma mi tin pas
Maske fuert’e bientu ta;
Si mi anker ta ancra,
E ta want’e tempestad.
Den laman peliger ta
Subiendo mas y mas;
Cielo yen di nubia scur
Ta mustra oracan sigur;
Mi lo want’e tempestad
Cu mi anker bon pega.
Tin peliger den laman
Menesando mas y mas,
Shelu ya ta yen di nubia scur,
Tempestad ta bin sigur,
Pero mi ta sigura,
Cu mi anker bon pega.
Sí, mi anker ta pegá;
Su cabuya ta mustra
Cu e ta basta fuerte, sí,
Aunke e ta tur scondi;
Den laman cu ta rabia
Lo e want’e tempestad.
Ma den Cristo, mi Señor,
Ta mi anker, bon sigur.
Cantica: My Anchor Holds pa
W.C.Martin, y traduci pa Betty
Henriquez & Marge McClain.

Pentecostes

2009-04-24T12:01:00.000-07:00

Atenshon!! Nos tin plan, si Dios permiti, pa bolbe Canada pa biba. Un apartamento a habri pa nos den e mes in lugar na unda nos tabata prome, ma adres lo ta lo siguiente: 158 –211
Pinehouse Drive, Saskatoon, SK., S7K 0G5. Probablemente nos email adres lo ta bbhenriquez@shaw.ca, ma nos lo cofirma esey despues cu nos reestablece nos mes! Ta nos deseo y plan pa sigui cu nos ministerio di scirbi tractadonan y e Blog. Corda nos blog ta: bbhenriquez.blogspot.com na e idioma di Papiamento y Ingles.
PENTECOSTE
Henter Antiyas y Aruba ta celebra e dia di Pentecoste como un dia special. For di mucha nos por corda, e nomber of titulo of exprecion ey wordo menciona. Pero nunca nos a duna bon atencion pa haya sabi ta kico Pentecoste ta nifica, of kico ta su importancia.
Pero amigonan, e berdad ta cu Pentecoste ta ensera un di e doctrinanan fundamental di Scritura. E Palabra Pentecoste ta nifica simplemente: "e di sincuenta dia," y e tabata un celebracion Judia pa recorda e pasco of e "Passover" Judiu cu a tuma lugar e anochi cu Señor a pasa ariba Egipto, y a kita bida di tur e primogenitonan di Egipto tanto ta di hende como di animalnan (lesa Exodo captiulo 11 y 12). Anto cada aña, e Judiunan tabata bini for di tur parti pa celebra e dia ey na Jerusalem.
Pa nos awe, Pentecoste, tin un otro nificacion cu e tabata pa e nacion Judiu un tempo. Pa nos e ta nifica cu ariba e dia ey di e Pentecoste Judiu; e Spirito Santo a bini ariba e keredornan, di acuerdo cu Señor Jesus Su promesa duná na e Apostelnan. Pa fabor lesa e capitulo 14, 15 y 16 di Juan, y tambe Echunan capitulo uno y dos, y mira e importancia cu e doctrina di Spirito Santo tin pa cada persona den e mundo aki. Y esey ta inclui cada Antiyano, y cada Arubiano sin excepcion. Pa cuminsa e importancia di e Spirito Santo den e bida di nos Señor Jesus Su mes. Anto e absolut importancia di Spirito Santo den proclamacion di e Evangelio, y den salbacion y pordon di picanan di cada persona cu ta kere den nos Señor JesuCristo. Beibel ta bisa nos claramente y enfaticamente, cu si un hende no tin e Spirito Santo aki, e no ta pertenece na Cristo. (Lesa Romanonan captilo 8 sin falta.)
Ademas Beibel ta contene e palabranan di Señor Jesus unda E mes ta bisa nos masha cla, cu si E no bai serca e Tata, e Spirito Santo lo no bini, pero si E bai, E lo manda e Spirito Santo ya menciona. Den Juan 7:37-39, Jesus ta bisa cu boso duro: "Si un hende tin sedu, lagu’e bini serca Mi y bebe. Ken cu kere den Mi manera Scritura ta bisa, riunan di awa bibo lo brota for di su enterior." Ma esaki El a bisa di e Spirito cual esunnan cu a kere den djE lo bai ricibi: te na e tempo ey e Spirito Santo no tabata duna, siendo cu Jesus no a wordo glorifica ainda.
Amigonan stima pa nos Tata Celestial y pa nos Señor JesuCristo, kende a duna Su bida boluntariamente pa cada ser humano cu a biba y cu lo biba ainda. Awe nos no por bisa mas cu Jesus no a wordo glorifica. Pasobra esey a tuma lugar despues di Su morto y resureccion, y cu Su discipelnan a mir’E, con El a wordo tuma y desparece for di nan bista. (Lesa e episodio aki completo den Echunan capitulo dos.) E tempo a yega pa cada uno di nos examina nos mes si nos ta den e fe, si of no. (2 Corintionan 13:5. Lesa tambe Efe. 1:13,14 y Efe. 4:30) Si algun no tin e Spirito Santo aki den su bida; e ta bibando continuamente bou di condenacion. Pues, arepenti awe y awor mes, y ricibi Señor Jesus como bo unico Salbador, y bo lo ricibi e Spirito Santo aki. No ta existi ningun otro manera.

BOUTISMO

2009-04-02T12:44:00.000-07:00

Kico boutismo ta? Pakico hende ta wordo batisa? E contesta corecto pa e preguntanan aki, y otro preguntanan similar, bo por haya den Beibel. Personalmente mi no tin e capacidad pa splica e doctrina aki na un manera cu lo convence tur hende. Pero di acuerdo cu Scritura Santo, masha hopi hende mes ta den error tocante boutismo di awa.
Den e tres islanan aki di Aruba, Bonaire y Curaçao, e gran mayoria di cuidadanonan a wordo batisa. Awor e pregunta ta: PAKICO NOS A WORDO BATISA? Ki probechi of previlegio tin entre un persona cu a wordo batisa, y un cu no a wordo batisa?
Manera ya mi a menciona; e contesta corecto nos ta haya den nos Beibel. Y pa mi sea onesto y sincero, e forma di boutismo cu nos a ricibi mediante nos grandinan, no ta di acuerdo cu e siñansanan di Scritura. Mi no ta bisa cu boutismo no ta importante; pero separa di e Evangelio di gracia di Dios, e no tin balor. Si un hende no repenti di pica y obedece e Evangelio di Cristo, aunke e ta batisa e ta keda bou di condenacion di perdicion.
E prome boutismo cu a tuma lugar despues di e resureccion di Señor Jesus for di morto, y despues cu El a subi na cielo, y cu El a manda e Spirito Santo cual El a priminti, nos ta haya scirbi den Echunan 2:37-41. Aki nos ta lesa tocante di e multitud cu a scucha e mensahe cual e Apostel Pedro hunto cu e otro apostelnan a duna, a wordo convenci profundamente di nan pica.
Anto nan a bisa na Pedro y e otro Apostelnan: Rumannan, kico nos mester haci? Anto Pedro a contesta: Repenti y sea batisa, cada uno di boso, den e nomber di JesuCristo pa boso picanan por wordo pordona. Y boso lo ricibi e don di Spirito Santo, etc. Lesa Echunan 2: 1-41.
Ricibi e don di Spirito Santo ta nifica cu e persona cu repenti di su picanan y kere den Señor Jesus basa ariba Su morto pa nos picanan y su resureccion for di morto, Dios ta pordona e persona aki y ta dun’e e Spirito Santo como seyo di garantia. Lesa sin falta Efesionan 1:13,14 y Efesionan 4:30. Lesa tambe Romanonan capitulo 8 completo. Y tin hopi otro Scrituranan cu ta sigura na nos e gran salbacion cu nos tin mediante fe personal den Cristo Jesus.
Boutismo di awa ta un testimonio personal di e persona cu ta wordo batisa. Y e testimonio ta cu e persona aki a admiti su picanan, y cu e ta of a ricibi Jesus lamta di mortonan como su Salbador personal. P’esey prome cu un persona batisa, ta importante pa e comprende, cu sin repentimento y fe personal den Cristo, no tin pordon, y boutismo no tin nificacion.
Pone bon atencion cu ariba e dia ey cu e Apostel Pedro a duna e prome mensahe despues cu Jesus a bai cerca e Tata y cu Dios e Tata a duna na nos Señor, e Spirito Santo, y cu Señor Jesus a drama e loke a tuma lugar ariba e dia di Pentecostes.
Si algun por pensa cu mi ta scirbiendo mi propio idea; anto fabor lesa loke mi a scirbi di dje den Echunan 2:29-36. Ta mas mihor pa lesa e capitulo dos di Echunan completo pa ta mas sigur. Lesa tambe: Romanonan 6:1-14 y Romanonan capitulo 8 completo.
Boutismo di awa separa di fe personal den Cristo ta pornada. Ata aki algun Scritura tocante repentimento y fe den Cristo sigui pa boutismo di awa – Ech. 9:18, Ech. 10:47,48, Ech. 18:8, Ech 19:3-5 y tambe 1 Corintionan 1:10-18.

ATEISMO

2009-03-26T06:34:00.000-07:00

ATEISMO
Un Ateo ta un persona cu ta nenga e existencia di Dios. Sinembargo e asunto aki a existi for di cuminsamento di civilisacion. For di principio tabatin creëncia den un of otro dios cu diferente nomber. Y un persona cu no ta kere den e dios cu ta wordo sirbi den e nacion na cua e ta pertenece; e lo wordo yama un Ateo. E palabra ey ta nifica simplemente "no dios".
E mensahe aki no ta pa splica detayenan tocante diosnan falso y e Dios berdadero. Ma nos proposito ta pa spierta tocante e peliger di ateismo moderno cu ta tur camina, incluyendo aki na Aruba y Antiyas.
Pa cuminsa, henter Antiyas y Aruba ta wordo conta como keredornan den Dios. Pues ningun hende por yama nos: "Ateonan".Y si uno di nos wordo yama un ateo, nos lo tuma esey como un ofensa baho. Sinembargo, segun Scritura, mundo ta yen di ateonan. Tin ateonan religioso, y esunnan anti-religion. Na television y den bukinan nos por lesa y tende con e creëncia den un Dios como e creador y sostenedor di e universo ta wordo rechasa diariamente.
Pero awor; ta den ki sentido tin hopi ateo religioso aki den Antiyas y Aruba? Nos mester tene cuenta cu e expresion Ateo ta nifica: "no dios". Si un persona bisa: "Ami ta un ateo, ta nifica cu e persona aki ta bisa cu e no ta kere cu tin un Dios. Pero kico Scritura ta bisa nos? Den Testament Nobo den e carta di e Apostel Pablo scirbi na Tito, nos ta lesa lo siguiente: " Pa esnan cu ta puro, tur cos ta puro, ma pa esnan cu ta contamina y cu ta incredulo, nada no ta puro, ma tanto ta nan mente como nan consenshi ta corompi. Nan ta profesa cu nan conoce Dios, ma cu nan echonan nan ta nengu’E. Nan ta detestabel, desobediente, y no ta sirbi pa hasi nada bon." (Lesa Tito 1:10-16)
Beibel ta hopi cla tocante e doctrina di un Dios cu ta e Creador y Sostenedor di e Universo. Y cu e Dios aki a stima mundo asina tanto cu El a duna Su unico Yiu, pa tur cu kere den djE no bai perdi, ma haya bida eterno. Beibel ta bisa nos ademas: "Esun cu kere den e Yiu tin bida eterno, pero ken cu nenga e Yiu lo no mira bida, pasobra Dios Su rabia ta keda ariba dje." (Lesa Juan 3:35,36)
Manera mi a menciona caba, aki na Aruba y den Antiyas nos ta considera nos mes como keredornan den Dios. Sinembargo e creëncia ey no por pasa e prueba revela den Beibel. Segun Scritura, si un persona no repenti y kere e Evangelio, e no tin Dios. Ehempel den Scritura ta hopi. Den e carta di 1 Juan 2:23, nos ta lesa lo siguiente: "Ningun cu nenga e Yiu tin e Tata; ken cu reconoce e Yiu tin e Tata tambe ." (NIV).
Amigonan, pa reconoce e Yiu ta nifica pa ricibi E como nos unico Salbador personal, admitiendo nos pica den berdadero repentimento. Esaki ta un decision entre bida y morto. Esun cu tin e Yiu tin e bida, esun ku no tin e Yiu lo no mira bida, ma e rabia di Dios ta keda ariba dje. Pa fabor tuma bo Beibel awe mes, lesa y bolbe lesa y obedece.
Nos lo desea di tende algo for di bo si bo a lesa e mensahe cortico aki. E siman aki nos a haya un yamada di Hulanda y e persona a compparti cu nos cu e ta lesa e BLOG tur ora cual tabata un bendicion y encurashmento pa nos! Sea bo ta biba na Aruba, of Antiyas of unda cu bo ta – manda bisa nos!

E SANTONAN

2009-03-11T10:14:00.000-07:00

Bon dia tur lesador di nos blog! Ya nos ta den luna di Mart! Ta tempo pa nos post un mensahe nobo den nos blog y conecta cu boso! Danki na tur cu ta lesa fielmente nos blog. E "biento di cuaresma" (manera hende di antes tabata bisa) a yega! Nos por mir'e na e afecto ariba nos matanan den nos hofi! E pobernan ta wanta sla duro di solo y biento den e dianan aki!

Antiyas y Aruba ta bon familiarisa cu e titulo di "Santonan". Antes, babynan ta haya nan nomber segun e Santo cu ta ser recorda riba e dia cu el a nace. Y esey ta nifica cu e Santo ey, ta bira patrono di e criatura innocente ey, pa resto di su bida.

Ya awe, e custumber religioso ey no ta wordo practica mas aki den Antiyas y Aruba. Y esey mes caba ta un testimonio di e falsedad di e custumber ey. Pero papiando di Santonan; con ta posibel pa un ser humano yega na ser un Santo? Kico Scritura Santo ta bisa nos tocante esey?

Amigonan di tur edad, pa e gracia y misericordia di e Dios todopoderoso, nos ta haya e contesta masha cla den Beibel. E palabra ey, esta e titulo di Santo y Santonan, ta menciona hopi bes. Y pa e autoridad di e Palabra di Dios cu ta duna na nos den e Scrituranan Santo, mi por declara lo siguiente: "Nunca a existi un persona den e mundo aki, cu a hiba un bida asina bon y puro, te cu el a merece e titulo di Santo, manera hopi ta kere te awe. No ta existi ni un solo persona awe, cu por considera su mes un Santo, basa ariba un bida limpi y puro den e bista di Dios. Ni sikiera uno!" Manera ya menciona, e palabra ey ta wordo usa hopi den Beibel. Y e ta wordo aplica no solamente na sernan humano, ma tambe na cosnan material manera bisti, tempel, materialnan cu ta ser usa den tempel. Un di nificacionnan di e palabra ey ta: "Separacion". Ehempel: E cosnan manera wea, cuchara, etc., etc., cu ta wordo usa pa e sirbishi den tempel; no por wordo usa pa ningun otro forma di uso.

Mescos e tempel di Judiunan. E tempel tabata dedica y consagra y separa pa e sirbimento di Dios e tempo, y muy particular como un lugar di oracion. Otro nificacion di e palabra ey ta Puresa. Ma aki nos tin di hasi cu puresa perfecto cual ta pertenece solamente na Dios. Den e buki di Revelacion 15:3,4, nos ta lesa lo siguiente, "Y nan a canta e cantica di Moises, e sirbidor di Dios, y e cantica di e Lamchi bisando: Grandi y maraviyoso Bo obranan ta, O Señor Dios Todopoderoso; husto y berdadero Bo caminanan ta, Bo Rey di e Nacionnan. Kende lo no teme, O Señor y glorifica Bo nomber? Pasobra Bo so ta Santo; pasobra tur e nacionnan lo bin y adora Bo dilanti pasobra Bo obranan husto a wordo revela."

Nos por puntra: Ta di cual Santonan anto nos ta lesa hopi bes den Beibel? E contesta ta: "E Santonan den Cristo". Of mi por bisa: Tur e berdadero keredornan, y esey ta inclui homber y muhenan cu a tende e Evangelio di e gracia di Dios den Cristo; y nan a kere di curason, a repenti y a ricibi nos Señor JesuCristo como nan unico Salbador personal. Scirbiendo na e rumannan na Corintio, e Apostel ta bisa lo siguiente: "Na e Iglesia di Dios den Corintio, na e santificanan den Cristo Jesus y yama pa ta Santo, hunto cu tur e otronan tur parti cu ta yama ariba e nomber di nos Señor JesuCristo, nan Señor y di nos: gracia y pas na boso for di Dios nos Tata y di e Señor JesuCristo." (1 Cor. 1:1-3)

Asina e ta, amigonan di tur edad, repeti bes tras bes den e Testamento Nobo. Ta e pecadornan cu ta kere e Evangelio ta wordo yama Santonan – y nunca lubida cu nos ta Santonan den Cristo. Ademas den tur caso ta esunnan na bida y den e lucha contra pica cu ta ser yama Santonan y no esunnan den cielo. Ta di comprende cu un tema manera esaki tocante e Santonan segun Scritura, no ta facil pa splica den e mensahe cortico manera esun aki. P’esey, si bo tin interes den e doctrina aki tocante e Santonan; scirbi nos libremente na e direccion cu ta bai hunto cu e mensahe aki. Aki ta algun porcion di Scritura cu por ser un yudansa: Salmo 34:9; Daniel 7:18,21, 22, 25, 27 y Ech. 9:13,32; Ech. 26:10; Rom. 8:27, Rom. 15: 25, 26, 31. 1Cor. 14:33; 2 Cor. 1:1 y 2 Cor. 8:4 y 9:1; 2 Cor. 13:13).

Nos adres ta: Washington 23A, Aruba, y nos Telephone # ta: 587-7472; Cel 566-2069.

E CAMINDA DI BIDA

2009-02-26T13:23:00.000-08:00

Bon bini na nos blog awe tardi, dia 26 di Februari, 2009!

For di tempo cu nos a haya sinti, nos ta familiarisa cu CAMINANAN. Nos ta siña conoce e camina cu ta bai cunucu, esun cu ta bai cas di Madushi, esun cu ta bai pa tienda, esun cu ta bai skol, etc., etc.
E ta maraviyoso pa lesa den Beibel, con
Spirito Santo di Dios a guia esunnan cu a scirbi e Scrituranan Santo, pa scirbi hopi cla tocante e "CAMINA DI BIDA ETERNO" Nos no ta papiando aki di un camina di bida largo den e mundo aki; di rikesanan terenal manera plata y oro y luho, of di poder y gloria segun e sistema di e bida temporario y insigur aki; ma aki nos tin di hasi cu Bida Eterno den un curpa inmortal y glorioso.

Pero, un hende por haci e pregunta aki: Y ta con nos por ta sigur di algo asina, y ta con esey a wordo hasi posibel?

Amigonan stima, pa Señor Su mes, e contesta pa e pregunta ey, y otro preguntanan similar, bo por haya cla den bo Beibel. Un tempo, manera tur Antiyano y Arubiano cu a biba den e siglo cu a pasa por duna testimonio; tabata extrictamente prohibi dor di religiosonan pa lesa Beibel. Pero cu binimento di e Evangelio di e gracia di Dios, e tabu ey a wordo venci, di manera cu awor tur hende den e islanan aki por tin nan Beibel. Y loke ta mas, nos tin esey den nos lenga Papiamento. Y den e Beibel aki nos por lesa e testimonio aki duna dor di e Apostel Pablo, na un hoben cu a kere e Evangelio e tempo ey: "Loke ta abo, continua den e loke bo a siña , y a wordo convence di dje, pasobra bo conoce esunan for di kende bo a siña esey, y con for di infancia bo a conoce e scrituranan Santo, cual ta capas pa haci bo sabi pa salbacion dor di fe den JesuCristo. Tur Scritura ta inspira Pa Dios y ta util pa siñansa, reprendemento, coreccion y disciplina den husticia, pa asina e hende di Dios por ta completamente ekipa pa tur bon obra (trabou)." (2 Tim. 3:14-16)
Den e porcion aki di Scritura, nos ta lesa di salbacion pa medio di fe den Cristo Jesus. Y den otro Scritura nos ta lesa e siguiente: "Y no tin salbacion den ningun otro; pasobra no tin bou cielo ningun otro nomber cu a wordo duna na hende, pa medio di cual nos mester wordo salba." (Echunan 4:12) Segun Scritura e UNICO CAMINA pa bai cerca Dios e Tata, ta nos Señor Jesus. Ta pa e proposito ey El a nace for di e birgen Maria den un curpa manera esun di nos. El a bin pa busca y salba pecadornan. Y con El a haci esey? Beibel ta masha cla mes tocante e pregunta ey. El a haci esey dor di a duna Su bida pa nos. El a carga nos picanan den Su curpa ariba e crus, pa nos libra di picanan por biba pa husticia. Lesa sin falta 1 Pedro 2:24,25. Den Juan 14:6, tin e declaracion di Señor Jesus, cual e Spirito di Dios a usa pa salbacion di hopi pecadornan. E ta bisa nos lo siguiente: Jesus a contesta,"Ami ta e camina, y e berdad y e bida. Ningun ta bini cerca e Tata sino dor di Mi." Sea prudente pa pone bon atencion na e scritura aki y kico e ta bisa nos, y kico e no ta bisa nos. Aki Jesus no ta bisa nos cu E ta un camina, sino "E CAMINA." Pues nos mester comprende cu no ta existi un otro camina pa yega cerca e Tata. Tuma bo Beibel y lesa e siguiente Scrituranan aki: (Juan 3:13-21; Juan 5:24-30; Col. 3:1-4; 2 tim. 1:8-10 y Tito 1:1-3 y 1 Juan 5:9-12).

Engaño Di Pica

2009-02-11T05:31:00.000-08:00

Bon dia tur bishitantenan di nos Blog! Basta dia a pasa y ta tempo pa nos post un otro blog. Aki rato Sr. Bicento lo papia tocante e asunto di engaño di pica. Ma prome nos kier laga boso mira un parti di nos isla cu ta asina bunita, y sinebargo hopi no sa bai te eynan. E caminanan siguramente no ta dje bon ey, ma ki bunitesa tin eybanda ! E prome ta e laman grandi, y Bicento ta wak si por tin pisekchi ey! E otro ta e bunita barancanan y cadushinan asina berde den e temponan aki!

E circunstancianan mundial ta birando dia tras dia asina malo, cu ya hende no tin interes mas pa tende of lesa tocante di algo manera "PICA". Sinembargo segun e fuente di sabiduria cu ta e Palabra di Dios ta declara: Pica ta e causa di tur maldad cu a tuma lugar desde e cuminsamento di e historia humano, y te awe.
E berdad ey nos por lesa claramente den e Scritura. Ehempel: Romanonan 5:12-21, ta declara claramente cu pica a drenta mundo via un persona, y morto a compaña pica. Y asina morto a bini na tur hende, pasobra tur a peca.
Amigonan stima, cu tur nos respet pa tur hende, siendo cu nos ta crea den e imahen y semehansa di Dios, pero a perde e gloria ey pa motibo di pica; nos lo purba presenta e manera cu pica a drenta den mundo via "Engaño". E gañador ta e diabel of satanas, y e prome victima tabata Adam. Pa e motibo ey, tur criatura aunke con bunita y inocente cu ta nace awe, sin importa nacion ni rasa ta nace cu e naturalesa pecaminoso.
Esey amigonan ta un berdad irrevocabel contra cual nos mes no por a hasi nada. Ma danki na nosDios y Tata, Kende si por y a hasi e loke pa nos tabata imposibel. Con El a haci esey? El a haci esey pa medio di Su Yiu stima, Su unico Yiu nos Señor JesuCristo. Henter Antiyas y Aruba ya a tende bes tras bes, y bes tras bes, cu Dios a stima mundo asina tanto, cu El a duna Su unico Yiu, pa tur ku kere den djE, no bai perdi, ma haya bida eterno (Juan 3:16). Siendo asina, pakico anto, te awe ta algun hende solamente ta kere e Evangelio di gracia di Dios den e tres Islanan aki?? E contesta pa e pregunta ey, nos ta haya den Scritura mes. E mes un gañador ey cu a gaña e prome hende den paraiso, ta sigui henter mundo, encluyendo Antiyas y Aruba. Den e buki di prome Juan 5:19, e Apostel ta declara lo siguiente: "Nos sabi cu nos ta yiunan di Dios, y cu henter mundo ta bou di e control di e Maligno. Ta nifica pa nos Antiyano y Arubiano y henter mundo; cu si un persona no ta un yiu di Dios dor di su fe personal den e Yiu di Dios; e persona aki ta bou di control y dominio di e malbado ey cual ta Satan.
Nos por puntra: Pero ta di ki manera algo asina por tuma lugar? Toh e tres islanan aki ta ser considera como tres isla Cristian! E contesta ta hopi cla den Scritura Santo. Satanas a logra gaña hende den hopi manera; y un di nan ta pa hasi un hende kere cu e ta un Cristian, pasobra su mayornan cu ta wordo yama Cristian a batisa nan tempo cu nan tabata un baby, y a hasi nan un Cristian. Mayoria di e berdadero keredornan den e tres islanan aki, tabatin e mes un error ey prome cu nos a repenti y a kere di curason den nos Señor Jesus, Kende a carga nos picanan den Su curpa ariba e crus, y a muri pa nos picanan y a wordo lanta for di morto pa nos hustificacion. Nos lo continua cu e mensahe aki den nos siguente blog. Lesa 1 Pedro 1:1-12 y 1 Juan 2:15-27.

Te otro ocasion! B&B

E Dios di Pasenshi - continua

2009-01-15T11:06:00.000-08:00

E foto aki saca dilanti nos cabina ta di un amiga hopi precioso di mi. E ta di Sita Semeleer. El a yuda mi den e compilacion di e Diccionario Papiamento/Ingles y Ingles/Papiamento y e buki di e Historia di Centro Juvenil Washington. No tin palabra suficiente pa expresa mi intimo sintimentonan pa tur su yudansa. Awor den nos biehes, e cu su esposo Max, ta cla pa yuda nos ki ora nos tin un mester. Danki Sita!

Awor .... pa nos Mensahe pa awe.....

Den e prome carta scirbi pa e Apostel Pedro den e Testament Nobo, nos por lesa den e capitulo tres for di versnan 18-22; tocante con Dios a spera cu pasenshi den e dianan cu Noë tabata trahando riba e Arca prome cu e deluvio. Y pa e gracia di Dios, solamente un poco hende a wordo salba door di e awa, esta ocho persona na tur. E resto a perece hunto cu tur e animalnan y tambe nan pertenencianan.

Mi ta admiti y ta confesa, cu e porcion di Scritura aki scirbi dor di e Apostel Pedro, no ta facil pa comprende, y pa splica. Pero un di e berdadnan di mas precioso posibel pa nos como sernan humano ta, cu awe Salbacion Eterno ta ofreci na cada uno di nos for di perdicion eterno. Awe nos no tin un Arca pa salba nos di e huicio y castigo husto di Dios; ma nos tin Señor JesuCristo, Kende a muri pa nos picanan, y Kende Dios e tata a lamta for di morto, pa asina E, esta nos Señor Jesus por rescata nos for di e era malo den cual nos ta bibando actualmente. (Lesa Galationan 1:1-5).

Nos ta lesa cu tempo cu Noë tabata trahando e Arca, Dios tabata spera cu pasenshi pa hende repenti y bolbe cerca djE. Esey ta berdad, pasobra Noë ta wordo yama un predicador di husticia den Scritura. (Lesa 2 Pedro 2:1-5). Of lesa e capitulo ey completo. Awe nos ta bibando cu e pensamentu cu nos ta mihor cu e hendenan ey cu a muri den e deluvio, of esunnan cu a muri ora cu Dios a castiga e hendenan di Sodoma y Gomora cu candela, kimando nan huntu cu tur nan pertencianan, y asina a hasi nan como un ehempel pa esunnan cu lo biba despues. Y esey ta pa nos si; pa cada uno di nos cu ta biba awe. Awe nos ta bibando den e ultimo dianan ariba e planeta cu yama Mundo. Ya a cumpli dos mil aña durante cual tempo e Evangelio cu ta worda yama den Scritura: E Evangelio di Dios y di Cristo. Y tambe e Evangelio di e gracia di Dios cu ta wordo proclama.

Amigonan stima pa Dios, ariba e dia aki cu nos ta scirbiendo e mensahe cortico aki, nos no ta miho cu e hendenan cu a biba prome cu e deluvio, y ni tampoco mihor cu esunnan cu a crucifica nos Señor. Cualke persona cu ta hasi menos caso di e Evangelio awe, praticamente ta di acuerdo cu esunnan cu a rechasa Cristo e tempo. E mensahe berdadero di Dios na nos awe, encluyendo nos di abla Papiamento ta; pa nos repenti y kere e Evangelio. Repentimento ta enclui pa cada uno di nos admiti nos culpa di pica, y ricibi pa medio di fe, Señor Jesus como nos Salbador y Señor. Mi ta repeti: "CADA UNO DI NOS" Esey ta enclui homber y mohe, hoben y adulto, rico y pober, esunnan bon educa y tur otro. Esey ta enclui tambe, nos gobernantenan civil di tur rango. Mi por menciona mas, ma nos ta confia cu e Señor Su mes lo sigui obra pa medio di Spirito Santo, basa ariba e bida, morto y resureccion di nos Señor y Salbador JesuCristo; den e curason di nos tur. Scritura ta bisa nos masha cla, cu Dios ta sperando cu pasenshi te awe, pasobra E no kier pa uno bai perdi.
Pero, corda cu nos dianan ta poco, y e dianan ta malo. P’esey obedec’e Señor awe y awor mes invocando Su nomber.

Si bo ta di acuerdo di e mensahe aki, nos ta invita bo pa liberamente imprim’e y parti e, of mand’e via email na bo famia of amigonan. Te otro ocasion.

E Dios Di Pasenshi

2009-01-09T06:08:00.000-08:00

Bon dia Amigunan di nos Blog! Nos ta confia cu awe mainta cada uno di boso ta salud y gosando y dia cu Señor nos Dios a duna cada uno di nos - oh cu nos lo obedec'E awe den tur cos!

Ariba tin algun foto di nos actividanan den e dianan aki: despues di tanto awa cero yerba a crece y a bira mondi. Nos rumannan y amigonan Marcelino (Max) y Juana (Sita) Semeleer a tuma un dia completo pa yuda nos corta yerba, snoi ramanan y trece nos mondi bou di control. #1. Un foto di nos pampunanan (3) birando madura pa nos come! #2. Papayanan ta crece rapido! #3. Ata mi ta "pose" cu mi bisti nobo regalo di mi esposo pa Pasco! Lief di dje! #4. Un santanero? No uno di nos BONCHINAN LARGO!! Nan ta den nan tweede ront. #5. Max ta hiba yerba pa kiuma y #6. Sita ta corta yerba, coba rais y snoi ramanan. Ami a yuda algo, ma masha nada!! Ma mi a sirbi cuminda y snacks henter dia, y Bicento su rudiya a nek e. Ma ki gratidud nos tin den nos curason pa e trabao di amor di Max y Sita. Dios mes bendiciona nan.

AWOR: laga nos sigui cu nos TEMA DI AWE: E DIOS DI PASENSHI.... Antes nos biewnan tabata bisa algo manera esaki, despues cu e aña a pasa: "Tanto cu nos tabata spera aña nobo, ata el a bini te bai, y tur cos ta sigui mescos."

Antes tabatin masha anticipacion pa e prome dia di Aña Nobo. Pero mescos cu awe, despues cu e selebracion ey a pasa; bida ta sigui cu su curso normal. Sinembargo, mi amigonan stima pa Dios den nos Señor JesuCristo; den Scritura Santo nos ta lesa bon cla cu cada dia ta critical pa cada ser humano. Cu e palabra: "Critical", mi ta referi na e urgencia tocante pordon y bida eterno pa cada ser humano. Scritura ta spierta nos masha cla mes, cu cada ser humano, sin importante con e ta pará, sea rico of pober, sea fuerte of debil, etc., etc; e ta puro bandidad. Ehempel: Salmo 62:9 ta bisa nos lo siguiente: "Hende di nivel umilde ta solamente banidad, y hende di puesto halto ta un mentira; den balansa nan no ta pisa nada, tur hunto nan ta pisa menos cu rosea." Y Salmo 94:11 , ta bisa: "Señor conoce e pensamentonan di hende, cu nan ta bandidad."

Anto algun hende por hasi e pregunta aki: Si ta asina, pakico anto Dios a crea hende? Amigonan, e contesta pa un pregunta asina, y pa otronan similar, nos ta haya solamente den Beibel. Y cuminsando for di e Buki di Genesis, nos ta lesa, cu Señor nos Dios a crea hende pa e tin domino ariba e mundo, trahando hunto cu Dios Su mes. Den e buki scirbi na e Hebreonan capitulo 2:5-8, nos ta lesa e siguiente: "Pasobra no ta na angelnan El a somete e mundo cu ta bin, di cual nos ta papiando. Ma un hende a testifica un camina bisando: Kiko hende ta, cu Bo ta corda riba djE? Of yiu di hende, cu Bo ta haci caso di dje? Pa un poco tempo Bo a hasi e, menos cu e angelnan; Bo a coron’e cu gloria y honor, y Bo a pon’e riba e obranan di Bo man. Tur cos Bo a somete bou di su pianan."

Sigui lesa cu un atitud di respet y sumicion na Esun cu a crea nos, y nos por mira e pakico Dios a crea nos. Tambe Scritura ta revela con hende a perde e autoridad cual Dios a dun’e, ora cu el a scucha y obedece Satanas. Ma awor Jesus nos Señor a bini den un curpa manera esun di nos, y a wordo tenta pa e mes un Satan cu a hasi e prome hendenan cai den pica. Scritura ta rebela cu nos Señor Jesus a wordo tenta den tur cos mescos cu nos, pero sin pica (of sin haci pica). Sinembargo El a muri, y tabata den un graf pa tres dia. Anto nos por hasi e pregunta aki: "Siendo cu Jesus no a comete ningun pica; di con anto El a muri?" E contesta, mi amigonan stima pa Señor, ta cla y bibo den Scritura. Jesus a muri pa motibo di nos picanan. Y esey ta nifica; e pica di mundo completo. Y esey ta nifica, cu El a carga bo cu ta lesando esaki tambe su picanan den Su curpa ariba e crus.

Esey ta e berdad solemne cu consecuensia eterno. Manera nos ta lesa den Scritura; E Tata no a laga Jesus mira corupcion, pero a lant’E na di tres dia for di morto, y for di mortonan. Y awor nos Tata Celestial ta sperando cu pasenshi pa hende REPENTI y kere den nos Señor JesuCristo. E no ta e boluntad di Dios pa un hende bai perdi, y ta p’esey cu E ta sperando cu pasenshi. Mira den nos medionan di noticia diario, of scucha na Radio, etc. Practicamente tur dia tin hende di tur edad cu ta muri den e tres islannan aki. Awe ta di nan, mañan por ta di nos.

Amigonan, un persona cu no ta den Cristo Jesus segun Scritura ta na peliger di perdicion eterno cada momento cu ta pasando. Obedece Señor awe.

E NACEMENTO DI JESUS - continua

2008-12-25T07:18:00.000-08:00

BON PASCO NA UN Y TUR!! - Dios ta bendicionando Aruba cu un awacero henter mainta awe, dia 25 di December, 2008. Awor, un poco prome cu merdia e solo a sali un rato. Ariba por wak un bunita regenboog cu nos ta mira na Aruba. Awor ta sigui nos mensahe cortico ariba e Nacemento di Jesus - cual henter mundo ta celebrando awe, aunke hopi no sa mes e berdadero nificacion di Pasco.

Den e prome mensahe, nos a papia di e nacemento di Jesus como un beby, for di Maria kende tabata compremeti cu un carpinte cu yama Jose. Manera nos sabi, cu ora un señora ta duna lus na un beby, ta nifica cu un persona nobo a bini na mundo. Esey ta nifica cu e persona of e beby aki a cuminsa existi for di barica di su mama. Pero e nacemento di Señor Jesus tabata completamente otro, aunke ta berdad cu e curpa humano di Jesus no a existi antes. Ma e berdad ta, cu nos Señor Jesus no solamente a nace como un beby, ma tambe El a bini den mundo. El a existi prome cu El a nace for di Maria. Aki mi ta purba splica e encarnacion di nos Señor, pasobra mi no por. Ma e berdad ta cu Esun cu a nace despues di tabata nuebe luna den barica di Su mama, a existi for di temponan di eternidad.

Den e buki di Mikeas den Testament Bieu nos ta lesa lo siguiente den capitulo sinco vers dos: "Ma abo Bethlehem Efrata, mucho chikito pa ta entre e famianan di Juda, for di bo lo sali Uno pa Mi pa ta gobernante na Israel. Su origin ta for di hopi tempo pasa, dor di e dianan di eternidad." E profecia aki ta repiti den Mateo 2:6 unda e ta bisa: "Y abo Bethlehen, tera di Juda, di ningun manera ta esun di mas chikito entre e lidernan di Juda; pasobra for di bo lo sali un Gobernante, Kende lo pastoria Mi Puebel Israel."

Pues Amigonan stima di tur edad, nos por bisa cu tur confiansa cu Esun Kende nos ta celebra Su nacemento den e dianan aki; no solamente a nace como un Beby den un curpa humano; ma El a bini den mundo pa haci e boluntad di e Tata cu a mand’E, y a dun’E pa nos. Aki nos por puntra: "Y kico e boluntad di e Tata ta?" Amigonan stima pa Dios; e contesta ta cla y sigur di Scritura. Pues, nos kier tuma e momento aki pa encurasha tur hende den e islanan aki, pa bo busca un Beibel cumpra y disiplina bo mes pa tuma tempo pa lesa fielmente for di dje. Y semper pidi Señor pa E lumina bo pa bo por comprende y pa obedece. Bo ta liber pa scirbi nos pa algun conseho, ma e boluntad mester bini for di abo mes cu yudansa di e Spirito di Dios.

Pa fabor Amigonan, e obra aki di Dios ta di sumo importancia pa cada uno di nos. Nos mester yega na e comprendemento, cu Señor nos Dios ta stima nos, y ta cla pa haci loke ta imposibel pa un ser humano. Y esey ta encera den e loke nos ta yama Pasco di Nacemento. Dios ta stima nos asina tanto, cu El a duna Su unico Yiu, pa tur cu kere den djE, no bai perdi, ma haya bida eterno. Sea sigur, sea masha sigur, cu no tin salbacion den NINGUN OTRO, pasobra no tin otro nomber duna na hende pa medio di cual nos por ta salba. Lesa Echunan 4:12

Awe cu bo ta lesando esaki, salbacion y pordon di picanan y bida eterno ta siendo ofreci na tur hende di mundo incluyendo Aruba, Curaçao y Bonaire. No ta asunto di celebra pa loco sin pia ni cabes manera: laga nos come y bebe, pasobra mañan nos ta muri. Oh, no, aki nos tin di hasi cu un situacion di bida y morto. E mes Jesus aki cu ta ofrece pordon di picanan y bida eterno na tur esunnan cu ricibi E, lo bolbe un dia pa huzga como Hues. Repenti y kere Evangelio, pasobra mañan por ta lat! Amigonan di tur edad, nos oracion ta cu cada uno cu lesa e mensahe corto aki lo hasi e decision di mas importante di henter bo bida. Y esey ta pa obedece e Evangelio di gracia di Dios. Bo por scirbi nos na e adres cu ta hunto cu e mensahe aki.
bbhenriquez@setarnet.aw

E NACEMENTO DI JESUS

2008-12-19T11:11:00.000-08:00

Si mi lo a busca un titulo adecuado pa e mensahe corto aki, e por tabata: "BON NOTICIA", pasobra esey ta loke e Angel di Señor a participa na e wardadornan di carne, e anochi cu nos Señor a a nace den un curpa humano manera esun di nos, pero sin e naturalesa di pica. Siendo cu e wardadornan a spanta masha ora e gloria di Señor tabata resplandece tur rondo di nan; e angel a calma nan bisando, "No tene miedo, mi ta trece BON NOTICIA pa boso di gran goso cu lo ta pa tur hende. Awe den e ciudad di David un Salbador a nace pa boso; e ta Cristo e Señor. Y esaki lo ta e señal pa boso: boso lo haya un beby lora den paña , y drumi den un pesebre." Anto nos ta sigui lesa cu: "Di ripiente un multitud grandi di e ehercito celestial a aparece hunto cu e Angel, alabando Dios y bisando: Gloria na Dios den haltura, y ariba tera pas na hende riba kendenan Su fabor ta descansa."(traduci for di NIV)

Amigonan di tur edad, manera nos sab,i aki den Antiyas nos tin e custumbra ariba e dia 25 di December, cual ta e fecha cu nos ta recorda e nacemento di e beby Jesus; di saluda un y otro bisando, "Bon Pasco". Ademas henter Antiyas ta considera e dia aki como un dia di celebra den varios forma. Pero segun Scritura e motibo principal pa nos celebra ta, cu e nacemento di Señor Jesus como un beby tabata pa salba humanidad.

E pregunta ta: Salba humanidad for di kiko of for di kende? E contesta cla y sigur nos ta haya den Scritura mes. I mi por ta asta sigur, cu bo tin esey ey mes hunto cu bo den bo cas. Habri bo Beibel anto, y busca den e Evangelio di Mateo, capitulo un y versnan 18-25. Den vers 21, nos ta lesa lo siguiente: E (esta Maria) lo duna lus na un yiu homber, y abo (Jose, e esposo di Maria) lo dun’E e nomber Jesus, pasobra E lo salba Su puebel for di nan picanan.

Amigonan, ata e causa berdadero di e celebracion pa cual nos Señor Jesus a bini na mundo. El a bini pa salba nos for di nos picanan. Ma atrobe y cu rason nos por puntra: "Pero con El a haci esey? Con ami por haya e salbacion ey?" Pa nos bisa e berdad amigonan di tur edad. Nos Tata Celestial Su mes ta mucho, pero mucho mas interesa cu cualke di nos, pa nos por ricibi e gracia inexplicabel aki di pordon y bida eterno. Den 1 Pedro 2:22-25, nos ta lesa lo siguiente: "E (JesuCristo) no a comete pica, y ningun mintira a wordo haya den Su boca. Ora cu nan a insult’E, E no a insulta bek; ora cu El a sufri, E no a menasa, ma El a confia Su mes na Esun Kende ta huzga cu husticia. E mes a carga nos picanan den Su curpa ariba e crus, pa nos por muri pa picanan y biba pa husticia; pa medio di Su heridanan boso a wordo cura. Pasobra boso tabata mescos cu carne cu a dwal, ma awor boso a bolbe na e wardador y cuidador di boso almanan." Tambe nos ta lesa lo siguiente: "Pasobra Cristo a muri pa picanan un bes y pa semper, e Husto pa e inhustonan, pa trece boso (nos) serca Dios." 1 Pedro 3:18
Amigonan di tur edad; di acuerdo cu Scritura, e pordon pa nos picanan a wordo hasi posibel a costo di un preis masha halto mes. Y esey tabata cu Jesus e Yiu di Dios a carga den Su curpa ariba e crus, e picanan di henter humanidad, y esey ta inclui abo cu ta lesando esaki: Kico nos mester hasi awor? E contesta ta cla y sigur den Beibel, y ta esaki: Repenti y kere e Evangelio, y lo bo ricibi pordon y bida eterno. Sea sigur di esaki: Sin repentimento no tin pordon.

Bon Pasco y Feliz Aña Nobo
Amigo y amiganan di tur edad. Nos ta desea di curason, cu cada uno di boso por tin un dia felis, celebreandi e recuerdo di e Nacemento di Señor.

Nos Aniversario di 10 aña di Matrimonio

2008-12-19T10:47:00.000-08:00

Dia 16 di December nos a corda cu esaki tabata e fecha di nos casamento dies aña pasa! Ki lihe e añanan a core - ta dificil pa pensa cu ta asina tanto tempo caba. Ma nos ta gradici Dios Pa Su misericordia y fieldad pa cu nos cada dia. Nos a biba den varios lugar y a biaha entre Aruba y Canada varios biaha cu bishita na Bonaire un dos of tres biaha! Nos no a celebra na grandi, ma nos a invita un pareha, amigonan di nos cu a yuda nos masha hopi den e ultimo siete lunanan cu nos ta aki na Aruba. Ki ora cu tabatin un trabou mucho duro pa nos, nan tabata ey pa duna un man. Pues, nos a celebra cu un cena hunto den un resturant na Oranjestad. Aki ta un dos fotonan cu nos a saca dilanti nos cas y na e resturant.

1. Max y Sita dilanti nos casita.

2. & 3. Sinta na mesa na e Restuarant "Promenade"

4. Na e resturant

5. Den nos hofi dilanti cas.

" Mi alma ta haya sosiego den Dios solamente; E so ta mi Roca y mi Salbacion; E ta mi forte, mi lo no wordo movi." Salmo 62:1 y 2

BON DIA, bon dia, ariba e Dia Aki!! - December 2/08

2008-12-02T06:03:00.000-08:00

Despues di hopi awa ceru nos ta bolbe post algun foto di nos dushi Aruba - asina bunita y berde! E foto ariba ta di nos mata dilanti porta di nos cas, y e otro dos foto ta saca ora nos a keiro pa explora cu coasta di laman parti noord y pariba.

E TEMPO ACEPTABEl - continua

Den e prome mensahe cu nos a duna tocante e tema aki di "E TEMPO ACEPTABEL", nos a purba enfatisa e berdad ensera den cada uno di e porcionnan di Scritura inclui den e mensahe ey; cu e tempo aceptabel ta pa awe y awor. Y mescos e ta cu: E dia di salbacion, cu ta pa awe y awor. Den tur y cada uno di e Scrituranan cu nos a menciona brevemente ta inclui e urgencia y e seriedad di e Evangelio di Dios y di nos Señor JesuCristo.

Awe mi ke encurasha cada persona cu ta lesa e mensahe aki, pa bo lesa e prome capitulo den e buki di Romanonan. Sea cu bo ta un persona cu a kere e Evangelio pa varios añanan caba, of uno cu a kere recientemente. Of sea cu bo ta un persona cu ta wel religioso, pero bo nunca a haci e decision personal mediante fe den Señor Jesus. E prome cos pa nos tene cuenta cu ne mientras cu nos ta lesando e prome capitulo di Romanonan ta: pa pone atencion ta na kendenan e Apostel Pablo a scirbi e carta aki. Anto nos lo mira bon cla, cu e Apostel no a scirbi e carta aki na e gobernantenan religioso sea Judiu of no Judiu. Ma versnan uno te siete ta mustra claramente cu e Apostel a scirbi na tur esunnan cu a kere e Evangelio na Roma sea Judiu of no Judiu. Pues el a scirbi e carta aki na esunnan cu ya ta kere e Evangelio. E motibo pakico mi ta bisa esaki y ta enfatis’e ta: "cu ta na nos cu ta kere di curason den nos Señor y Salbador JesuCristo, a wordo duna e responsabilidad y privilegio pa sigui duna testimonio di e Evangelio di gracia di Dios. Cu esaki mi no ta bisa cu nos tur mester predica of siña e Evangelio, of cu nos tur mester sirbi como misionerona den otro partinan di mundo. Ma e loke si nos por mira bon cla ta: cu tanto den e carta scirbi na e Romanonan como tur e otro cartanan den e Testament Nobo, ta inclui tur y cada persona cu ta kere e Evangelio.

Nos mester lanta fo’i soño y realisa cu ta un curpa so tin di cual Cristo ta e cabes. Ta un Spirito tin cu ta biba den cada pecador cu a repenti y kere e Evangelio. Nos tin un Señor y un fe y un bautismo, y esey ta nifica cu cada uno di nos cu a tende y a obedece e Evangelio a wordo batisa den un curpa cu ta wordo yama: "E Iglesia di Dios bibo, pilar y fundeshi di berdad. Lesa 1 Timoteo 3:15 y Efesionan 5:23-35. Segun Scritura e nomber Iglesia no ta nifica edificionan cu nos ta yama Iglesia. E berdadero Iglesia ta consisti di sernan humano cu ta obedece e Evangelio di e Yiu di Dios. Den e Testament Nobo nos por mira bon cla con gruponan di keredornan cu ta reuni hunto ta wordo yama Iglesia; pero no e edificio.

Ta e pecadornan cu a tende e Evangelio y a kere cu nan curason y confesa nan fe den Cristo cu nan mes boca ta esakinan ta e Iglesia. Lesa Romanonan 10:10-13. E mes Scritura ey ta bisa nos masha cla mes cu "fe ta bini for di tendemento di e mensahe, y e mensahe ta wordo tendi door di e palabra di Cristo." Romanonan 10:17 (NIV = New International Version).
Na e Iglesianan di Cristo cu ta plama den varios distrito di Aruba y e resto di Antiyas Hulandes.

Na nos tambe ta toca e spiertamento cu ta tempo pa nos lanta for di soño. Ademas e spiertamento cu ta bisa lo siguiente, "Con nos lo scapa si nos ignora un salbacion tanto grandi asina?" Pone atencion cu e no ta bisa: Con nan lo scapa, etc., ma: con NOS lo scapa?….. y esaki ta e spiertamento pa awe, pa cada uno di nos cu ta den Cristo.

Te otro biaha, di Bicento y Betty
Corda nos email adres ta: bbhenriquez@setarnet.aw

Nos Pasa Temponan!

2008-11-13T13:59:00.000-08:00

Aki ta un foto cu mi a traha poco dia pasa for di cocolishinan cu laman bruto ta tira riba santo blanco na oriya di laman. Realmente mi a traha alomenos un dies di e tiponan aki, anto tur sorto di otronan tambe. E ta algo cu ta bon terapi pa mi pa mi relaha!!

Un otro pasa tempo cu nos tin ta - planta, cuida y gosa nos hofi. Aki ta sigui un foto saca recien. E foto ta un di dos mata di papaya cu nos a hinca den tera awor y nan ta creciendo bunita asina! Nan ta floriando y nos ta confia cu nos lo mira e dia cu nos lo por come un dushi papaya di nos mes palo! Temponan cu mi tabata chikito mi a yuda mi mayornan masha hopi den hofi, y mi a gusta masha. Ma ora mi a drenta e ministeriso aki na Camp Washington, no tabatin tempo, aunke tempo tempo mi tabata purba planta algo! Ma awor cu nos a bolbe biba aki na Camp Washington, mi tabatin e deseo di purba atrobe. Bicento ta yuda masha hopi mes, pasobra e tambe ta gusta mata, flor, parha y barbulet! Hunto nos ta gosa nos hardin!

E TEMPO ACEPTABEL

2008-11-13T13:44:00.000-08:00

E foto ta di nos hofi dilanti nos casita chikito! E ta tene nos ocupa y nos ta gosa tur e flornan y matanan cu ta atraë barbuletnan, parhanan y beinan, pa no menciona vruminganan!

Ma awor laga nos sigui cu nos tema pa awe: e dia aceptabel!!

Den e buki di 2 Corintionan 6:1 y 2, nos ta lesa lo siguiente: "Y trahando hunto cu nE, nos ta roga boso pa no ricibi e gracia di Dios enbano, pasobra E ta bisa: "Den tempo aceptabel Mi a scucha bo, y riba e dia di salbacion Mi a yuda bo. Mira, awor ta e tempo aceptabel, mira, awor ta e dia di salbacion."
Nada mas cu ayera tabata un dia cu a trece basta movemento pa e doñonan di auto aki na Aruba, pa motibo cu a wordo anuncia cu e preis di gasolin a baha considerablemente. Pa colmo algun a comprende cu tabata pa un dia so, y asta un solo Stacion di Gasolin. Francamente, mi no por acusa e doñonan di auto pa nan accion, pasobra e preis di gasolin ta halto, y un rebaho lo alivia hopi.

Pero aki nos por siña algo hopi importante si. E Scritura cu nos a mira na cuminsamento di e mensahe aki, ta recorda e puebel di Dios cu nos cu ta kere e Evangelio, ta co-trahadornan cu Dios Su mes; y pa nos no hasi menos caso cu un responsabilidad tanto grandi asina. E Scritura aki ta siña nos cu nos ta bibando den e tempo aceptabel y e dia di Salbacion. Y cu e tempo aceptabel ta AWOR, y e dia di salbacion ta AWOR.

Pero hopi hende ta tende y ta bisa: Awe no, ma un otro dia, despues, mas despues. Pero amigonan, e despues ey probablemente lo no yega. Mira cuanto hende conoci ta muri cada dia den e tres islanan aki so, sin conta e resto di Caribe, of di e otro nacionnan. Y no ta tur ta hendenan di edad halto. Ademas, considera loke nos ta bira lomba p’e, ora cu nos ta haci menos caso di e gracia di Dios cu ta den Cristo. Segun e Scritura den 2 Cor. 6:1,2, ta pa Dios Su mes nos ta bira lomba ora cu nos ta nenga di repenti y kere den nos Señor JesuCristo. P’esey cu otro Scritura ta spierta nos lo siguiente: "Awe si boso tende Su bos, no haci boso curason duro." Hebreonan 4:7. Tambe den Hebreonan 2:1-4 nos ta lesa lo siguiente: "Pa e motibo aki nos mester paga mucho mas atencion na loke nos a tende, pa nos no drief pasa bai, (of drief for di nan). Pasobra si e mensahe papiá dor di e angelnan tabata firme, y tur violacion y desobediencia a ricibi su pago husto, con nos lo scapa si nos ignora un salbacion tanto grandi asina? E salbacion aki cual tabata anuncia prome pa e Señor, tabata confirma na nos dor di esunnan cu a tend’E (tende e Señor) Dios tambe tabata duna testimonio na esey pa medio di señalnan, maraviyanan y varios milagernan y donnan di e Spirito Santo parti di acuerdo cu Su boluntad."
Amigonan di tur edad, tur e spiertamentonan solemne cu nos ta lesa den Scritura, ta pa nos tene cuenta cu nos curason por bira duro y insensitivo pa e palabra di Dios. Den e buki di Romanonan 13:11-14, nos ta haya e siguiente spiertamento: "Y hasi esaki, conciendo e tempo actual (of e tempo presente) e ora a yega pa boso lanta for di soño; pasobra awor nos salbacion ta mas serca cu ora nos a kere. Nochi ta serca di pasa y e dia ta serca. P’esey laga nos pone e obranan di scuridad un banda y bisti e amrmadura di lus. Laga nos comporta nos mes desentemente manera den dia, no den parandamento y buracheria, no den inmoralidad sexual y sensualidad, no den pleito y envidia. Ma bisti boso mes cu Señor JesuCristo, y no pensa con pa satisface e deseonan di e naturalesa pecaminoso." E spiertamento pa cada uno di nos ta, pa nos obedece Dios Su Palabra tocante Señor Jesus.

Te otro oportunidad. Nos ta encurasha bo pa laga nos sabi dor di scirbi un noto na: bbhenriquez@setarnet.aw si e Blog aki tabata di spiertamento of bendicion pa bo, Siguramente esey lo encurasha nos pa sigui cu e ministerio aki.

E REINO DI DIOS (continua)

2008-10-15T07:38:00.000-07:00

E foto: un mirada di nos hofi y su progreso!

Den nos prome mensahe corto tocante e Reino di Dios, mi a menciona cu Beibel ta papia hopi di esey; y mescos tocante e reinonan di e mundo aki.
Esey ta asina fo’i Genesis ta na e buki di Rebelacion. Mi ta admiti cu no ta facil pa papia of pa scirbi y splica tocante e Reino di Dios, y e reinonan di mundo. Hopi di esunnan cu ta kere e Evangelio di gracia di Dios, ta confundi tocante ambos reinado. Hopi precioso almanan cu ta kere di curason den nos Señor JesuCristo ta pensa cu tin un diferencia entre e Reino di Dios y e Evangelio. Ma e berdat ta cu e Evangelio y e Reino di Dios ta inseparabel, pero mester wordo distingui. Pa cuminsa, nos Señor Su mes a siña y proclama tocante e Reino di Dios. For di cuminsamento di Su ministerio te na su final Señor Jesus a siña tocante e Reino di Dios. Tuma como ehempel, Señor Jesus Su palabranan na Nicodemus kende tabata un miembro di e Conseho Judio, den Juan 3:3, unda Jesus ta bisa Nicodemus lo siguiente: "Ami ta bisa bo e berdad, si un hende no bolbe nace, e no por mira e Reino di Dios." Anto contestando Nicodemus su pregunta y su observacion, Jesus a continua bisando, "Si un hende no nace di awa y di e Spirito, e no por drenta e Reino di Dios."
Den nos prome mensahe corto, nos a trece e doctrina aki caba padilanti, pero nos ta haya mas di esey den otro scrituranan pa yuda nos comprende pa medio di fe. Den prome Pedro 1: 3-5, nos ta lesa e siguiente, "Alaba sea e Dios y e Tata di nos Señor JesuCristo, Kende segun Su gran misericordia a hasi nos nace di nobo den un speransa bibo pa medio di e resureccion di JesuCristo for di e mortonan, etc., etc. Aki nos por mira hopi cla, cu nacemento di nobo ta relaciona cu e morto y e resureccion di nos Señor; y cu ta obra di Dios e Tata mediante Su Spirito. Mas leu den prome Pedro 1: 23-25, nos ta lesa asina aki: " Pasobra boso a nace di nobo, no di simia coruptibel, ma incoruptibel, ma medio di e palabra bibo y permanente di Dios. Pasobra tur hende ta manera yerba, y tur nan gloria ta manera e flornan di yerba. E yerba ta seca y e flornan ta cai, ma e Palabra di Señor ta permanece pa semper. I esaki ta e palabra cu a wordo predica na boso."
Aki Amigonan, nos por mira bon cla, cu nacemento di nobo ta tuma lugar ora cu nos como pecadornan ta tende E PALABRA di Dios, den e Evangelio. Scritura ta bisa nos cu: "fe ta bini pa medio di tendemento di e mensahe, y e mensahe ta tendi pa medio di e Palabra di Cristo." Romanonan 10:17
Un estudio simpel di e porcion di Scritura aki ta mustra cu e mensahe y e Palabra ta nifica e Evangelio. Y e palabra Evangelio ta nifica: Bon Nobo, of Bon Noticia. Nos por conclui anto cu ta solamente e pecadornan cu ta repenti di nan picanan ora cu nan ta tende e Evangelio, y ta obedece Dios dor di pone nan fe den Señor Jesus, Kende a muri y a wordo lanta for di morto pa nos; lo drenta e Reino di Dios. Beibel ta cristalinamente cla tocante e berdad aki! Tur e declaracionnan di Scritura tocante e berdad aki di e Reino di Dios, ta sigur y irrevocabel, pasobra e ta e Palabra di Dios bibo cu ta permanece pa semper.
Ata aki poco Scritura pa yuda esunnan cu kier sabi mas tocante e Reino di Dios: Echunan 1:3 y 19:8 y 20:25 y 28:23-31. Tur e Scrituranan aki ta fo’I e buki di Echunan. Lesa nan cu oracion sincero di bo curason, y Señor mes lo yuda bo.
Te aki nan pa awe. Ora bo ta cla di lesa y studia e mensahe cortico aki, tuma un rato y communica bo pensamentunan cu nos na: bbhenriquez@setarnet.aw
Bicento y Betty Henriquez for di Washington 23A, ARUBA

E REINO DI DIOS

2008-10-06T15:01:00.000-07:00

Den Beibel nos ta lesa hopi tocante e Reino di Dios. Ma na e mes un tempo, Beibel ta papia hopi cla tocante e reino di e mundo aki. Tocante e reino di e mundu aki, nos no tin mester di hasi decision pa ta pertenece na n’e; pasobra for di e momento cu nos a nace for di barica di nos mama, nos ta pertenece na e reinado na cual nos mayornan ta pertenece.

Nos no tin mester pa hasi ningun decision, pasobra nos ta nace como un ciudadano di e nacion na cual nos mayornan ta pertenece. Ma, e no ta asina cu e Reino di Dios; e Reino Celestial. Te asta si nos mayornan ta miembronan di e reino di Dios; nan yiunan no ta nace automaticamente un miembro di e Reino di Dios. Si nos mayornan ta miembro di un of otro religion; nan por pone nos nomber den e lista di nan religion. Pero loke nos mayornan nunca por hasi ta; pa hasi nos un miembro di e Reino Celestial di nos Dios y Tata.

E mundo ta parti den diferente reinadonan bou di diferente nombernan. Pero e Reino di Dios ta un solo reino cu ta consisti di hendenan for di tur nacion y tribo y di tur idioma. Awor, si nos no por ta miembro di e Reino di Dios, aunke nos mayornan si ta; con anto nos por drenta of bira un miembro di e Reino ey?

Amigonan di tur edad; e contesta ta duna na nos cla y sigur, dor di Señor Su mes. Si bo tin un Beibel, busca den Juan 3:1-21. Aki nos ta lesa cu si un hende no nace di nobo, e no por mira e Reino di Dios, y e no por drenta e Reino di Dios. Pero pa un hende drenta e Reino di Dios, e mester nace di nobo mediante e Spirito di Dios. Anto ta bin e pregunta: Con esey por ta? Con un hende por bolbe nace siendo cu ya el a nace caba for di barica di su mama kerida? Nos meste bisa danki na Señor Jesus, pasobra E mes ta duna e contesta den e versnan cu ta sigui den Juan 3:10-21. Den e versnan 14,15, Señor ta papia di e colebra di metal cu Moises a halsa riba un staca pa e orden di Señor Dios, tempo cu e puebel cu Moises a saca for di Egipto tabata rebelde y papia contra Dios y contra Moises. Anto Señor a manda colebranan venenoso meimei di e puebel cu a morde y mata hopi hende. E ora ey numa e puebel a reconoce nan error y a admiti nan pica. E ora Señor a bisa Moises "traha un colebra di metal y pon’e riba un staka y hals’e, pa esun cu worde mordi, por mira na e colebra di metal y biba."
E storia ey, amigo y amiganan di tur edad, nos Señor a bisa na Nicodemus como un ilustracion di loke lo socode cu nos Señor Jesus Su mes. E ta Esun cu a wordo hisa ariba un crus pa salba nos for di nos picanan. El a muri pa motibo di picanan, pero no di djE, pasobra E nunca a peca, y ningun mentira a wordo haya den Su boca. Lesa sin falta, 1 Pedro 2:21-25.

Ora cu nos ta lesa cu E mes a carga nos picanan den Su curpa riba e crus, etc., anto enbes di nos picanan, lesa: mi picanan. Esey ta e berdad, ta p’esey e ta scirbi den Scritura, pasobra ta pa nos El a sufri, ta pa nos El a muri, y pa nos El a wordo lanta for di morto. E yiunan di Israël cu a kere Moises y a atmiti nan culpa, y a hisa cara wak na e colebra di brons, a hasi ey pa fe. Mescos e ta awe amigonan, kere e Palabra di Dios cu ta bisa cu nos tur a peca y ta falta e gloria di Dios. Lesa Romanonan 3:21-26. Tin un spiertamento sumamente solemne cu ta compaña e oferta di pordon y bida eterno aki cu ta bisa: "Con nos lo por scapa si nos neglisha un salbashon asina grandi?" Lesa Hebreonan 2:1-3.

Esaki ta tur pa awe, nos lo sigui e topico aki otro ocasion, si Dios permiti.

Our New Home in Aruba

2008-09-29T12:05:00.000-07:00

This is the small cabin we are living in temporarily. It is a cabin on the camp grounds where I, Betty, was director for some fifteen years. It is called: Camp Washington. Washington is the area where the campsite is founded. It is airconditioned, for which we are very thankful. It would not be possible, we think, to survive in the constant temperatures in the 90's these months that we have been here! We love to garden so we have planted flowers and shrubs and they are beginning to blossom and bring life to the yard, as you can see in some of the additional images.

E Curason - conclusion

2008-09-25T14:57:00.000-07:00

Nos a mira for di Scritura Santo, cu e curason di e sernan humano ta falso mas cu tur otro cos y desesperamente malo. Y nos a menciona cu e curason den Beibel no ta papia di e curason cu ta pomp e sanger door di nos curpa, pero e curason segun Scritura ta inlcui na prome lugar e mente y e spirito humano cu ta diferente cu animalnan.

Nos ta lesa den Beibel cu Dios a crea hende segun Su imahen y semehansa cu e capacidad pa distingui mei mei bon y malo. Sinembargo e prome hende Adam, a wordo gaña y a cai den pica, y asina morto a drenta y a pasa na tur hende, pasobra tur a comete pica. E Palabra di Dios ta enfatisa cu no tin ni un persona cu nunca a peca of hasi pica. Beibel ta bisa tur a peca y ta falta e gloria di Dios. No ta keda ningun persona cu ta liber di e condenacion ey. Beibel ta enfatisa esey bisando, "No tin ni un hende husto, ni sikiera UN; no tin ni un hende cu ta comprende, no tin ni un hende cu ta busca Dios. Tur a desvia; conhuntamente nan a bira inutil; no tin ni un hende cu ta hasi bon, no tin ni sikiera un. Nan garganta ta un graf habri, nan lenga ta practica mentira, veneno di colebra ta ariba nan lipnan. Nan boca ta yen di maldicion y armagura. Nan pianan ta lihe pa drama sanger, ruina y miseria ta marca nan pasonan, y e camina di pas nan no conoce. No tin temor di Dios, dilanti nan wowonan." Lesa Romanonan 3:9-20
E loke nos a caba di lesa aki ta inclui cada uno di nos sin excepcion prome cu nos a tende e Evangelio y cu nos a kere e mensahe y a repenti y kere di henter nos curason den Señor Jesus, Kende a carga nos picanan den Su curpa ariba e crus; pa asina libra di nos picanan nos por biba awor den husticia y segun e boluntad di nos Tata Celestial, na Kende ta pertenece gloria y alabansa pa semper.
Pero si bo ta un persona cu te na e momento aki di bo bida, bo no a wordo convenci di pica y di husticia y di huicio; ta nifica cu te na e momento aki, bo ta bou di e sentencia di condenacion. Pa ta pertenece na un of otro religion no ta e contesta. Cu miedo francamento mi mester menciona loke Scritura ta siña nos, y asta for di boca di Señor Jesus Su mes; cu hopi hende religioso cu a confia den nan religion, lo ta condena pa eternidad. Den Mateo capitulo siete y ver 21 padilanti, Jesus ta bisa lo siguiente: "No ta tur hende cu ta bisa na Mi; Señor, Señor; lo drenta e Reino di cielo, ma solamente esun cu hasi e boluntad di Mi Tata Kende ta den cielo. Hopi lo bisa Mi ariba e dia ey, Señor, Señor, nos no a profetisa den Bo nomber, y saca demoñonan den Bo nomber, y haci milagernan? E ora ey lo Mi bisa nan claramente; nunca mi a conoce boso. Bai for di Mi, boso hasidornan di maldad."

Amigonan di tur edad, Señor ta yama awe na tur hende na tur parti, pa nos repenti y kere den Su Yiu nos Señor Jesus. Pasobra ta pa medio di Jesus, Dios lo huzga henter mundu cu husticia, y no pa medio di religion of ki grupo of ki esaki of esaya.
Lesa por fabor den Echunan 10:34-43, y tambe Echunan 17:29-31. Lesa y pidi Señor di henter bo curason. E ta sperando pa bo.
Nos email adres ta: bbhenriquez@setarnet.awe

E CURASON - continuacion

2008-09-22T12:03:00.000-07:00

Pakico tin tanto maldad asina den mundu? Pakico tanto guera, matamentu, krueldad y tur forma di inhusticia? Segun Scritura, tur e maldadnan ey ta sali for di e curason di hende. For di e principio cu Dios a crea hende den Su imagen y Su Semehansa, El a dun’e un mandamento cu e spiertamento aki; cu e dia cu e desobedece, e lo muri sigur. (nos garage natural!!>>>>>>>

E prome hende a desobedece Dios, y a scucha na e Diabel, y for di e momento ey morto a drenta, y hende a perde comunion cu Dios. Sinembargo Dios a duna e promesa aki, (mientras cu E tabata reprende e colebra cu tabata representa e Diabel of Satanas). "Lo Mi pone enemistad entre abo y e mohe, y entre bo simia y su simia. E lo herida bo cabes, y abo lo herida Su hilchi." Aki anto nos ta haya un di e prome promesanan di nos Salbador Jesus.
Awe despues di miles di añanan, nos ta bibando den e periodo di tempo, cu e Salbador a bini y a pachura e cabes di e colebra biew cu ta e diabel y satanas. Lesa sin falta, e capitulo 12 den e buki di Rebelacion tocante e colebra di cual nos ta lesa den Genesis. Sinembargo, for di e momento ey, cu e prome hende a desobedece Dios, pica a drenta den mundu y hunto cu pica; morto. Y asina morto a pasa na tur hende, pasobra tur a peca. Romanonan 5:12. Nos por descuti y reclama y pleita tocante e doctrina aki; pero e berdad ta cu no ta existi ningun hende den e mundu aki cu nunca a peca. Segun Scritura, tur hende a peca y ta falta e gloria di Dios. Romanonan 3:23. Pero nos por puntra: Den ki sentido of di ki manera y con nos por comprende cu Jesus a pachura e cabes di e diabel?
Amigonan, e contesta ta cla y sigur y ta irevocabel y ta scirbi pa nos den e Beibel. E ta sirbi cu e proposito pa duna nos bida eterna si nos obedece e Evangelio. Evangelio ta nifica: "Bon Noticia", y e bon noticia ta cu Cristo a muri pa nos ariba un crus. Beibel ta bisa nos clarisimo cu El a tuma of carga nos picanan den Su curpa ariba e crus; pa nos libra di picanan por biba pa husticia; y pa medio di Su heridanan nos a worde cura. Lesa 1 Pedro 2:24.

Pues cu e ta Dios Su boluntad di amor y di misericordia na cada persona cu ta lesa e mensahe corto aki, pa bo sabi cu Dios ta stima bo, y E no kier pa bo bai perdi, pero pa cada uno di nos por repenti y admiti cu nos ta un pecador, y pone nos fe den Esun cu a muri den nos lugar ariba un crus. Ma e Tata a lanta Jesus for di morto despues di tres dia den graf. Di e manera ei, e Yiu di Dios a pachura e cabes di e colebra segun Scritura. Di ningun manera esey por nifica cu Satanas no tin poder pa mata y pa destrui awe. Beibel ta bisa hopi cla, cu henter mundu, of sea humanidad cu no ta kere di curason den Señor Jesus; ta drumi den e malbado, of sea bou di su control. 1 Juan 5:19

Beibel ta bisa: "E palabra ta serca bo, den bo boca y den bo curason, y cu si bo confesa Señor Jesus cu bo boca y kere den bo curason cu Dios a lant’E for di e mortonan, lo bo ta salba. Pasobra cu curason hende ta kere pa haya husticia, y cu boca e ta confesa pa haya salbacion. Romanonan 10:8-13.

Danki pa lesa e mensahe aki. Si bo a worde bendiciona of spierta, laga nos sabi esey dor di scirbi nos na: bbhenriquez@setarnet.aw

E CURASON

2008-09-09T11:51:00.000-07:00

Kico Beibel ta siña nos tocante curason di e sernan humano? Masha hopi mes; pero no den e sentido fisical, sino spiritual. Manera nos sabi, e asunto di curason humano ta bon conocí tur parti di mundo. Y si e curason stop di funciona ta nifica morto di e persona. Tin te asta especialistanan di curason cu por splica detayadamente con e curason ta funciona. Ma e scrituranan cu ta duna na nos via inspiracion di Dios Su mes pa medio di Spirito Santo, ta papia cu nos den e sentido spiritual tocante e curason. Ehempel: Jeremias 17:9,10 ta bisa esaki: "E curason ta engañoso mas cu tur otro cos, y totalmente corupto; ken por comprende? Ami e Señor ta scrudiña e curason, y ta examina e mente, pa recompensa cada hende di acuerdo cu su conducta, di acuerdo cu loke su echonan ta merece."
Ta cla pa mira aki, cu e Señor no ta papia tocante e curason di carni y sanger, sino di e totalidad di e potencial di e naturalesa humano, incluyendo particularmente e mente. P’esey cu e Profeta no a bisa cu ta e curason di e Judiunan, of di e paganonan etc; ma simplemente e ta bisa: "e curason" y tambe e "mente". Tanta e curason y cerebro ta miembronan masha importante den cada ser humano sin importa rasa ni colo ni nada otro.

Pero ya mi a menciona cu aki nos tin di hasi cu e ser humano completo. Den Scritura nos ta lesa di e curason , e mente, e spirito humano, e alma y e consenshi. Tur eseynan ta mescos den cada uno di nos. P’esey, e declaracion di e profeta tocante e curason corupto y engañoso ta enclui nos tur sin excepcion. Ademas tin hopi otro Scrituranan cu ta papia tocante e mes un facto ey. Den Mateo capitulo 15, e Señor ta reprende algun persona religioso masha fuerte mes. Anto e Apostel Pedro a pidi Jesus pa e splica e comparacion na nan. Jesus su contesta tabata lo siguiente: "Ainda boso ta sin comprendemento?" "Boso no ta comprende cu tur loke ta drenta e boca ta bai den e stoma, y despues ta sali for di e curpa? Ma e loke ta sali for di e boca ta sali for di e curason, y esey ta haci un hende impuro. Pasobra for di e curason ta sali mal pensamento, matamento, adulterio, inmoralidad sexual, ladronicia, testimonio falso, calumnia. Eseynan ta loke ta haci un hende impuro, pero come sin laba man no ta hasi hende impuro."

Amigonan di tur edad; e maldadnan ey menciona pa Señor Jesus, ta sali for di e mente di nos como sernan humano. Nos ta nace cu e naturalesa pecaminoso ey, cada uno di nos. Ta p’esey Cristo a bini na mundo den un curpa humano mescos cu nos, pero sin e naturalesa di pica ey. El a nace pa e obra di e Spirito Santo for di un birgen cu yama Maria. Y E ta e unico den un curpa humano cu a risisti contra tur e maldadnan menciona y tur otro no menciona sin hasi pica. P’esey E tabata e Unico cu por a duna Su bida den lugar di henter humanidad dor di a tuma den Su curpa ariba e crus, e pica di nos tur. Y e Tata a lant’E na di tres dia victorioso, y e victoria ey tabata pa nos. Awor nos por haya pordon di tur pica si nos repenti y acept’E como nos Salbador personal.
Pa Bicento Henriquez

Nos lugar di biba - Washington 23A

2008-08-27T12:07:00.001-07:00

Bida of Morto (conclucion)

2008-08-27T12:00:00.000-07:00

Amigonan y stimanan; nos tabatin dos mensahe corto tocante bida of morto, y awe nos ta conclui e tema aki. Esey no ta nifica cu nos a bisa tur loke tin di bisa relaciona cu bida of morto, pasobra tur mensahe biblico di un of otro manera ta den e contexto di bida eterno of perdicion eterno. Jesus a bisa e siguiente palabranan aki, mientras cu E tabata den un curpa humano aya na Palestina. "Ami ta bisa boso e berdad, kende cu tende Mi palabranan y kere Esun cu a manda Mi tin bida eterno y lo no ta condena; el a pasa for di morto na bida." Juan 5:24

Tempo cu Jesus a bisa e palabranan ey, E tabata den un curpa humano mescos cu esun di nos, cu excepcion di e naturalesa pecaminoso. Pero, mescos cu e prome hende Adam por a wordo tenta pa desobedece Dios Su mandamento, mescos Señor Jesus tambe por a wordo tenta ora E tabata den un curpa humano mescos cu nos. Y mescos cu nos por sinti dolor y calor y friu y hamber, etc., mescos Señor Jesus tambe por a sinti mescos cu nos. Y mescos cu nos por wordo tenta pa hasi loke ta malo, nos Señor tambe a wordo tenta.

Den Hebreonan nos ta lesa lo siguiente: "P’esey siendo cu nos tin un gran Sumo Sacerdote Kende a bai dor di e cielonan, Jesus e Yiu di Dios, laga nos tene firme na e fe cu nos ta profesa. Pasobra nos no tin un Sumo Sacerdote kende ta incapas pa simpatisa cu nos debilidadnan, ma nos tin Un kende a wordo tenta den tur manera, mescos cu nos ta ser tenta, ma sin pica, (of sinhasi pica)." Hebreonan 4:14-16.

Den e mes un buki ey nos ta lesa: "Siendo cu e yiunan ta di carni y sanger, E tambe a comparti den nan humanidad, di manera cu dor di Su morto E por destrui esun kende tabatin poder di morto, esta, e diabel, y duna libertad na esunnan cu henter nan bida tabata teni den sclabitud dor di nan miedo di morto… Pa e motibo aki E mester a wordo haci mescos cu Su rumannan den tur manera, pa asina E por bira un Sumo Sacerdote misericordioso y fiel den sirbimento na Dios, y cu E por haci reconciliacion pa e picanan di e puebel. Pasobra E mes a sufri ora cu E tabata wordo tenta, E por bini na yudansa di esunnan cu ta wordo tenta." Hebreonan 2:14-18
Den e Scrituranan ey tin masha hopi berdadnan spiritual involvi cu no ta facil pa pone riba papel. Nos ta combida sinceramente na cada uno cu ta lesando e mensahenan aki, pa bo mes personalmente lesa den bo Beibel e scrituranan aki. Y nos ta enfatisa cu cada uno di nos mester haci esey cu oracion y confesion di nos ignorancia, pa Señor ilumina nos mente y obra den nos spirito y den nos ser completo, pa nos por comprende y kere y ricibi e bendicionnan indescribibel cu e Scritura ta contene.

Pues, te aki pa awe. Te otro ocacion. Corda cu nos adres di email ta: bbhenriquez@setarnet.aw Nos lo tin deseo di tende cu bo ta lesando nos blog, y nos ta contento tambe pa cualke sugerensia, pregunta of palabra di encurashamento.
Bicento y Betty Henriquez, Washington

BIDA of Morto #1

2008-08-25T14:25:00.000-07:00

Kerida lesador di nos blog, bon tardi! Mi atencion a wordo hala cu e prome mensahe di "Bida of morto a worde poni den nos blog Ingles. P'esey mi no por a hay'e!! Wel, wel, dispensa mi e error aki. Pues, e mensahe aki ta e prome riba e topico aki, anto esun cu ta prome cu esaki realmente ta sigui esaki. Di tur manera tur dos ta aki awor. Betty

Beibel ta contene e historia di e creacion di mundo, y di tur loke tin den dje. Tambe nos tin e relato tocante e creacion di e prome sernan humano. Prome Dios a crea e homber, y despues Diosa a crea e mohe for di curpa di e homber. Segun Genesis 1:27, "Dios a crea hende segun Su mes imagen; segun e imagen di Dios. El a crea hende; homber y mohe El a crea nan." Anto nos ta lesa den Genesis 2:16, 17; cu e Señor a ordena e homber bisando, cu e ta liber pa come di tur e palonan den e hofi, cu excepcion di e palo di conocemento di bon y malo, pasobra si e come di dje, bo lo muri sigur. Y si nos ta sigui lesa, nos lo mira cu con apesar di e spiertamento di e Señor Dios, tog e homber a come di e fruta; aunke ta e mohe a persuadi’e. Y for di e momento ey morto a drenta, y asina morto a pasa na nos tur, pasobra nos tur a peca y ta falta e gloria di Dios.
Pa un splicacion hopi cla tocante e tema aki di pica universal, lesa pa fabor e capitulo sinco di e buki di Romanonan. Si bo ta un persona cu tin e deseo intimo den bo ser, pa por ta den bon relacion cu nos Tata Celestial; anto cu bo mes boca y di curason pidi e Señor pa E yuda bo comprende y obedece. Comprende esaki bon amigonan; cu ta nos tur ta nace for di e barica di nos mama, cu e naturalesa di pica. Ta pa e motibo ey, cu for di e tempo cu e prome hende a cai den pica, ya Dios a priminti un Redentor. Y e Redentor aki ta e Jesus cu a nace for di un birgen den un curpa mescos cu esun cu nos tin, pero sin e naturalesa di pica. Un otro scritura sumamente importante tocante e tema aki di bida y morto, ta haya den 1 Corintionan 15:45-49. Aki Señor ta bisa nos door di e Apostle Pablo, cu ta para scirbi cu e prome Adam a bira un ser of un persona bibo, y cu e ultimo Adam a bira un spirito cu ta duna bida. E ultimo Adam aki ta nos Señor y Salbador JesuCristo. Pa E por a duna nos bida, e mester a tuma un curpa mescos cu esun di nos, pero sin e naturalesa di pica cual tur otro ser humano tin. Anto El a carga e pica di henter humanidad den Su curpa ariba e crus. Pues, El a muri den nos lugar. Y e Tata a lant’E for di morto y a ricibi E den gloria.
Pesey, O Aruba, Bonaire y Curaçao; salbashon ta haya solamente pa medio di fe den e Jesus aki manera Scritura ta bisa: "Y no tin salbacion den ningun otro, pasobra bou di cielo no tin ningun otro nomber cu ta duna na hende, pa medio di cual nos por ser salba." Echunan 4:12. Esun cu tin e Yiu tin e bida, esun cu no tin e Yiu di Dios, lo no mira e bida, ma Dios Su rabia lo keda ariba dje.
Nos lo continua si Señor permiti; y no vacila y scirbi nos cu bo pregunta y observacionnan na: bbhenriquez@setar

2008-08-22T11:44:00.001-07:00

BIDA OF MORTO – continua
Segun Scritura amigonan, den cada momento cu bida humano ta continua ariba e mundo aki, tin esunnan cu tin e bida eterno menciona hopi bes den Scritura; ma tambe na e mes un tempo tin esunan cu no tin e bida ey. Tambe Scritura ta menciona cu si un persona no tin e bida eterno aki, e ta morto den su picanan. Ta hopi importante pa nos comprende cu Scritura no ta bisa cu ta e personanan cu ta comete crimennan manera matamento di hende, of ladronicia of abuso na tata of mama, of crueldad di un esposo pa cu su esposa of vice versa, etc., etc. Ma Scritura ta menciona masha cla, cu si un persona no ta kere e Evangelio, e persona aki ta morto den su picanan.

Ata aki algun ehempel for di Scritura. Romanonan 6:23 ta bisa lo siguiente: "Pasobra pago di pica ta morto, ma e regalo di Dios ta bida eterno den of dor di Cristo Jesus nos Señor." Pone bon atencion cu e Scritura aki no ta bisa cu e pago di picanan ta morto, sino cu: E pago di pica ta morto. E pica cu ta ser menciona ey, ta e naturalesa pecaminoso cu nos tur a nace cu ne. Y esey ta e motibo pakico nos ta comete tur sorto di picanan. Ta berdad cu un persona por ricibi un bon educacion sea na cas of na cualke otro luga sea cu ta religioso of no religioso. Pero, e naturalesa di pica nunca por ser kita dor di ningun forma di educacion.

Pakico? E contesta ta, cu e pago di pica ta morto. Nos mester muri pa motibo di e naturalesa di pica ey. Siendo asina, ta nifica cu ningun ser humano por scapa e condenacion di morto, pasobra nos tur a nace cu e naturalesa di pica ey cu ta menciona masha cla den Scritura.
Pero amigonan, aki e bon nobo ta bin aden. Den e prome mensahe mi a menciona cu e unico persona cu a nace sin e naturalesa di pica ey, ta nos Señor, e Salbador JesuCristo. Pakico anto El a muri, aunke cu E tabata sin pica? Amigonan, henter Scritura ta duna testimonio, cu ta pa salba pecadornan El a bin den mundo. Y cu ta pa nos picanan El a wordo mata riba e cruz. El a carga nos picanan den Su curpa riba e cruz, pa nos libra di picanan por biba pa husticia y pa medio di Su heridanan nos a wordo cura.

Pesey cu awor nos mester repenti di nos picanan, y kere den nos curason cu Dios a lamt’E for di morto pa nos por ricibi pordon. Pasobra ta cu curason un persona ta kere y ta hustifica, y e ta cu su boca e ta confesa y ta salba. Manera Scritura ta bisa, ken cu confia den djE, lo nunca wordo poni na berguensa. Lesa por pabor Romanonan 10: 1-13 .

E SPIRITO SANTO

2008-08-02T11:01:00.000-07:00

Esaki lo ta e di tres y ultimo mensahe corto tocante di e Spirito Santo di Dios. Ma esey no ta nifica cu mi a siña tur loke ta ensera den esun Doctrina aki. Mi por asta bisa cu e Doctrina aki , ta pertenece na e loke e Apostel Pablo a menciona varios bes como e Misterio di Dios; y tambe e Misterionan di Dios. Sinembargo e mes Apostel ta declara cu e loke tabata un misterio scondi bou di e Testamento Bieu, a wordo revela y hasi cla den e Testamento Nobo. Na prome lugar e Apostel ta menciona e misterio di e boluntad di Dios den Cristo, cu nunca antes tabata revela manera awor si e ta mediante e Spirito di Dios.

Den e buki di Efesionan nos ta lesa cu: "den Cristo nos tin redencion mediante Su sanger esta pordon di picanan, di acuerdo cu e rikesa di Dios Su gracia, cual El a basha abundantemente ariba nos cu tur sabiduria y comprendimento. Y El a haci e misterio di Su boluntad conoci na nos, di acuerdo cu Su bon placer y proposito den Cristo…. pa trece loke ta den cielo y ariba tera hunto bou di un cabes, esta Cristo." Y e ta continua bisando: "Lesando esaki anto, boso por bin comprende con leu mi conocemento ta den e Misterio di Cristo, cual no a wordo haci conoci na hende den otro generacionnan, manera awor a wordo revela door di e Spirito, na Dios Su Apostelnan santo y e profetanan. E misterio ta cu pa medio di e Evangelio, e paganonan ta eredero hunto cu Israel; miembronan hunto den e promesa den Cristo."
Amigonan, e misterio di cual nos ta scirbiendo aki cu Pablao ta yama e rikesanan insondabel, of sin fin, incalculabel, di Cristo, tabata teni secreto den Dios e Creador di tur cos. Y Su proposito tabata cu awor dor di e Iglesia, e sabiduria multiforme of supremo di Dios, por worde hasi conoci na e gobernantenan y autoridadnan den e lugarnan celestial, di acuerdo cu Su propositonan eterno, cual El a cumpli den Cristo Jesus nos Señor. Ta den e Jesus aki, y pa medio di fe den djE, nos por yega serca Dios, cu libertad y confiansa. Tuma bo Beibel, y lesa capitulonan uno dos y tres di Efesionan, y tambe Colesensenan 1:24-29, y Col. 2:1-5. Tuma tempo pa bo lesa tur e scrituranan ey, pidiendo Señor na e mes un tempo den nomber di Jesus, pa e Spirito di Dios duna bo comprendemento den e Misterio di Dios revela den Cristo. E proposito ta, pa nos repenti for di nos bida di pica, y ricibi pa fe pordon di tur pica, y di e manera ey pasa fo’i morto na bida y for di e poder di Satanas, na Dios.

Amigonan di tur edad; segun Scritura, motibo pakico Dios a manda Su Unico Yiu den mundo, y permiti pa El a sufri asina tanto na man di pecadornan; ta pasobra cu E ta stima nos, y no ta Su boluntad pa uno di nos bai perdi, ma pa nos tur bini na e lugar unda nos ta repenti, cu yudansa di e Spirito Santo. Lesa pa fabor e siguiente Scrituranan aki cu oracion den bo curason. 2 Pedro 3:9; Lucas 5:31,32; Lucas 24:45-49 y Echunan 17:30,31.
Prepara pa Bicento y Betty Henriquez

SPIRITO SANTO - continua

2008-07-22T07:52:00.000-07:00

E SPIRITO SANTO – continua

Manera nos sabi, e doctrina tocante e Spirito Santo di Dios ta ser haya den tur religion cu ta relaciona cu Cristianismo. Y sin lugar na duda, e Spirito Santo di Dios ta na manera di bisa cu tur reverencia: Ocupando un lugar mes importante cu Dios e Tata, y cu e Yiu di Dios nos Señor y Salbador Jesus, den Scritura. E Spirito di Dios ta wordo menciona for di cuminsamento di Scritura Santo den Genesis 1:3, unda nos ta lesa cu "E Spirito di Dios tabata moviendo ariba e awanan." Y e mes Spirito aki nos por lesa di djE den e utlimo buki di Scritura Santo. Den Rebelacion 22:17, nos ta lesa lo siguiente: "E Spirito y e bruid ta bisa, Bini! Y laga esun cu tende bisa, Bini! Y esun cu tin sed, laga e bini; y ken ku desea, laga e tuma e awa di bida pornada."
Den otro Scritura nos por lesa lo siguiente for di nos Señor Jesus: "Ariba e ultimo, y e dia dia mas grandi di e fiesta, Jesus a lanta para y bisa cu bos duro" "Si un hende tin sed, laga e bin serca Mi y bebe. Kende cu kere den Mi, manera e Scritura ta bisa, riunan di awa bibo lo brota for du su paden."
Esaki El a bisa di e Spirito, cual esunnan cu ta kere den djE, lo ricibi despues. Te na e tempo ey, e Spirito no a wordo duna ainda, siendo cu Jesus no a wordo glorifica ainda. Lesa Juan 7:37-39. Si ta posibel lesa e traducion na Ingles, Spaño y Hulandes pa mas claridad. Ta intersante y hopi importante pa nos por comprende e ministerio di e Spirito Santo actualmente tanto ta den henter Antiyas como aki na Aruba. Palabranan comun ta wordo usa den Scritura relaciona cu e obra di e Spirito di Dios. Ehempel: E por wordo hasi tristo, y por ser risisti y desobedeci. E Spirito no ta papia cu nos awe cu bos audibel; y lo no trece otro doctrina cu no por ser haya den Scritura Santo. E Scritura cu nos a mira den Juan 7:37-39, ta bisa nos cu e tempo ey, e Spirito no tabata duna ainda, pa motibo cu e tempo ey Señor Jesus no tabata glorifica ainda. Pero awe esey no ta e caso, pasobra awe nos por bisa cu tur confiansa, cu nos Señor Jesus ta glorifica door di Dios e Tata. Pues, awe si e Spirito aki ta wordo duna na cada persona cu tende e Evangelio y kere di tur su curason den e Yiu di Dios cu a muri ariba un crus pa nos picanan, y a wordo lanta for di morto na di tres dia door di e Tata. Ademas Dios e Tata a hals’E na e lugar di mas halto y a dun’E e nomber cu ta ariba tur nomber, cu pa e nomber di Jesus, tur rudia mester dobla, den cielo y ariba tera, y tur lenga lo confesa cu JesuCristo ta Señor, pa e gloria di Dios e Tata. Ta e Jesus aki nos ta presenta na cada uno cu ta lesa e mensahe aki. Y cada persona cu repenti y kere di curason den djE, ta ricibi pordon di picanan y bida eterno den Su nomber. Y for di e momento ey e persona aki ta ricibi e Spirito Santo den su bida como seyo y garantia di bida eternpo y un curpa glorifica na e dia di resureccion di tur esunnan cu ta kere.

Amigonan, mi ta reconoce y ta admiti y confesa, cu den Beibel tin hopi declaracionnan menciona pa e Profetanan y e Apostelnan y asta pa nos Señor Jesus Su mes, cualnan ami personalmente no por splica, pasobra cu mi no ta comprende nan completamente, pero pa gracia di Dios y cu yudansa di e Spirito di Dios mes, mi ta kere nan. Y e doctrina di e Spirito Santo di Dios ta uno di nan. Laga nos mira un rato, e obra di e Spirito, den e bida di nos Señor Jesus Su mes, relaciona cu Su encarnacion. Den Mateo, capitulo uno y versnan 18-25, nos por lesa tocante e manera cu Jesus a wordo consebi den e curpa di Maria, Kende tabata compremeti cu Jose. Aki nos por lesa masha cla mes, cu ta e Spirito Santo a obra e milager aki. Lesa di e mes un milager aki den e Evangelio di San Lucas 1:26-38. Despues di Jesus Su nacemento nos por lesa den Lucas 2:40-52 cu El a crece y bira fuerte; y cu E tabata yena cu sabiduria, y cu e gracia di Dios tabata ariba djE. Y cu El a crece den sabiduria y statura y den gracia cu Dios y cu hende.

Despues di esey nos ta lesa di Jesus te e dia di Su boutismo den Jordan door di Juan e Boutista. Aki atrobe nos ta lesa cu e Spirito Santo a baha riba Jesus den e forma di un paloma. Lucas 3:21,22. Despues di Su boutismo, e Spirito Santo a guia Señor Jesus den e desierto, unda El a wordo tenta pa cuarenta dia door di e diabel.

Despues di Su tentacion den desierto, El a bolbe den e poder di e Spirito pa Galilea, y Su fama a cuminsa plama den tur e districtonan rond. Anto El a bai Nasaret unda El a lanta para pa e lesa e Scritura di e profeta Isaias cu ta bisa: " Spirito di e Señor ta ariba Mi, pasobra El a hunta Mi pa predica e bon nobo na e pobernan. El a manda Mi pa proclama libertad na e prisoneronan y restoracion di bida na e ciegonan, pa liberta e opriminan, pa proclama e aña agradabel di Señor."
Amigonan; si e Spirito Santo tabata asina importante den e bida y ministerio di Señor Jesus Su mes; cuanto mas nos tin mester di Su guiansa y yudansa y consuelo!!

Corda cu nos tin deseo di tende algo for di bo cu ta lesando nos Blog! Tuma un rato asina y manda nos un palabra di encurashamento of por ta bo tin un pregunta cu bo tin gana pa haya contesta, etc. Realmente, via email nos a tende di un cu a scirbi cu el a wordo encurasha y spierta door di e blog cu el a lesa! Wel, siguramente, esey ta un encurashamento pa nos tende esey!

Bicento a haci 85 aña di edad dia 19 di Juli! E famia y e rumannan na Iglesia Evangelica di Oranjestad a pone hunto un bunita sirbishi di gradisimento y alabansa na nos Señor JesuCristo dia 20. Podise otro biaha lo mi nos lo comparti algo foto di e ocacion aki!! PUES, scirbi nos awe sin falta.... bb.henriquez@setarnet.aw

E SPIRITO SANTO

2008-07-07T13:13:00.000-07:00

Bicento y Betty cu nan dos prendanan "Tanishka y Lixiëre" - yiunan di Bicento su nieta!!

Nos ta sigui awor cu nos tema: E Spirito Santo
Den e buki di Efesionan 4:30 ta para scirbi lo siguiente: "Y no haci e Spirito Santo di Dios tristo, pa medio di Kende boso a wordo seya pa e dia di redencion."
E Apostel Pablo, inspira y guia pa e Spirito Santo mes, a scirbi e spiertamento aki, na tur e berdadero keredornan na Efesio. Y e spiertamento aki ta pa cada uno di nos tambe cu ta profesa fe den nos Señor Jesus. Nos por comprende hunto cu otro scrituranan, cu e Spirito Santo aki Su mes ta e seyo. Den Efesionan 1:13, e Apostel ta bisa nos lo siguiente: "Den djE boso tambe a confia, despues di a tende e mensahe di berdad; e Evangelio di boso salbacion; den Kende tambe despues di a kere, boso a wordo seya cu e Spirito Santo di promesa, Kende ta e garantia di nos erencia te na e redencion di e posecion di Dios, pa e alabansa di Su gloria." Ta hopi siñansa mes tin den e poco palabranan aki.
Pa cuminsa; e Apostel ta menciona na prome lugar e Judiunan cu a kere e Evangelio den vernan 11 y 12. Anto e ta sigui cu esnan cu no ta Judiu den vers 13. Nos por mira cla anto cu awe no tin diferencia entre Judiu y no Judiu. Den Efesionan 2:11-18, e Apostel ta splica masha cla mes cu e muraya cu tabata separa nos y e Judiunan, a wordo basha abou door di Señor Jesus, mediante Su morto riba e crus. Segun Scritura cada persona cu a pone su fe den Cristo despues di a tende e palabra di berdad, esta e Evangelio; ta ricibi e Spirito Santo for di e momento ey. Y e Spirito aki ta e garantia pa e dia di redencion. Di manera cu si un hende no tin e Spirito aki, e no tin speransa di e redencion cu ta menciona aki. E doctrina aki di Redencion, tin dos aplicacion importante pa cada pecador, cu a tende e Evangelio, y a comprende y a obedece door di a repenti y kere den Señor Jesus.
E prome aplicacion ta pa awor mes den e bida aki. E palabra: "REDENCION", ta nifica cu nos a wordo cumpra. Of sea cu un preis a wordo paga pa nos libertad. Tin varios scritura tocante e tema sumamente importante aki, esta e tema di Redencion. E Apostel Pedro ta scirbi lo siguiente: "Sabiendo cu boso no a wordo redemi cu cosnan cu ta ta perese, manera plata of oro, for di boso manera bano di biba cu boso a ereda di boso antepasadonan, ma cu e sanger precioso di Cristo, un Lamchi sin defecto y sin mancha."
Segun e scritura aki, ni oro ni plata por cumpra un hende su libertad for di poder di e maligno. Ma den 1 Cor. 6:19,20, nos ta lesa lo siguiente: "Boso no sabi cu boso curpa ta un tempel di e Spirito Santo, Kende ta den boso, kende boso a ricibi for di Dios? Boso no ta pertenece na boso mes; boso a worde cumpra pa un preis. P’esey glorifica Dios cu boso curpa."
Pues, segun Scritura, e pecador cu kere e Evangelio ta pertenece na Dios awor caba den e bida aki, y cu for di e momento cu un persona a kere e ta pertenece na Dios, y cu e Spirito Santo di Dios ta biba den cada uno cu ta kere pa duna nos victoria ariba pica awor den nos bida diario si nos obedece.
Ma e di dos aplicacion ta cu e mes un Spirito aki ta e garantia pa e redencion final. Y di esaki nos por lesa den Romanonan 8:18-27. Aki nos por lesa cu aunke cu awor nos tin e prome frutanan di e Spirito, toch nos ta keha of suspira paden di nos curpa mientras cu nos ta sperando ansiosamente pa nos adopcion como yiunan, esta e redencion di nos curpa. Y e ta sigui bisa cu ta den e speransa aki nos a wordo salba… y siendo cu nos ta sperando pa e loke nos no tin ainda nos ta spera pa esey cu pasenshi. Ademas e Spirito di Dios ta yuda nos den nos debilidad, y ta intersede pa nos cu suspiro cu palabranan no por expresa, etc., etc. Lesa e porcion aki den bo Beibel pa bo mes. E ta hopi importante pa cada uno di esunnan cu ta kere e Evangelio, pasobra diariamente nos ta experimenta e berdadnan aki.
Y sea sigur di esaki amigonan cu ta lesando e notanan aki; cu e persona cu no tin e Spirito Santo, no ta pertenece na Dios. Y cu ningun hende por ricibi e Spirito aki sino pa medio di fe den nos Señor y Salbador JesuCristo. Cu tur reverencia mi ta bisa esaki basa ariba e Palabra di Dios. Lesa pa fabor, e capitulo ocho completo di Romanonan. Ey e Spirito Santo ta ser yama: E Spirito di Dios, e Spirito di Jesus; y ademas e ta bisa tambe cu e persona cu no tin e Spirito di Cristo, e persona aki no ta pertenece na Cristo. Lesa e capitulo aki cu oracion, y scirbi nos pa laga nos sabi cual ta bo opinion; of bo creëncia of bo fe.

Esaki ta nos direccion na cual bo por scirbi : Bicento & Betty Henriquez, Washington 23A, Aruba. Of via email bo por scirbi na: bbhenriquez@setarnet.aw

DIA DI HUICIO - continua

2008-06-18T13:44:00.001-07:00

Esaki ta un foto saca na Bonaire dia 10 di Juni. Autor (Betty Ratzlaff-Henriquez) di e diccionario Papiamento/Ingles y Ingles/Papiamento su di dos edishon, ta entregando e prome copia di e diccionario na e Gezaghebber H. Domaccasse. Pa mira mas foto y informacion por hay'e na: www.PapiamentuDictionary.com

Nos ta sigui awor cu nos continuacion ariba e topico: E DIA DI HUICIO.
Den e ultimo mensahe nos a scirbi un poco tocante e dia di huicio cu ta pa bin. E huicio di cual nos ta scirbiendo aki, ta nifica huzgamento; e sentencia final cu Dios ta duna mediante nos Señor y Salbador JesuCristo. Scritura ta hopi cla tocante e huicio final aki, tanto ta den e Testament Bieu y e Testament Nobo. E profeta Daniel ta scirbi di dje bisando: "Lo tin un tempo di angustia manera nunca tabatin for di tempo cu tabata existi un nacion te na e tempu ey. Ma na e tempu ey bo puebel, cada uno cu su nomber ta haya scirbi den e buki, lo wordo rescata. Multitudnan cu ta drumi den e stof di tera lo lanta:algun pa bida eterno, y otronan pa berguensa y confusion eterno. Esunnan cu ta sabi lo briya manera e splendor di e cielonan, y esunnan cu ta guia hopi na husticia, manera e streanan pa semper y semper." Lesa 12:1-3
Aki e profeta Daniel ta bisa nos tocante esunnan cu nan nomber ta scirbi den e buki, y cu nan lo ta rescata. Di ki buki e profeta ta papiando aki? Por ta den buki di religion? Of di un of otro asina yama Iglesia? Danki na Señor nos Dios cu e contesta ta den Beibel. Y pa sea franco, y sumamente cauteloso mi por bisa cu tur reverencia pa e Nomber di Señor, cu aki nos tin di hasi cu algo sumamente solemne pa henter mundo, encluyendo cada Antiyano y Arubano. E berdad ta cla y directo y ta scirbi como e advertencia di mas solemne posibel; ma na e mes un tempo como un invitacion y spiertamento pa nos repenti y kere e Evangelio. E Evangelio cu mi ta papia di dje ta, e bon noticia di pordon y bida eterno pa cada persona cu ta repenti di su picanan, y kere di curason den Esun cu a muri y a resucita pa nos. E no por ta mas cla cu e loke ta ser bisa ey den Revelacion 20:15 "Y si uno su nomber no wordo haya scirbi den e buki di bida, el a wordo tira den e tanki di candela." Den e Nomber di Señor Jesus, Kende a entrega Su mes pa nos, mi ta puntra na cada uno cu ta lesa e mensahe aki. Bo tin e speransa cu bo nomber ta scirbi den e buki di bida? Algun por hasi e pregunta: Y ta kico mi mester hasi pa mi nomber por ta scirbi den e buki ey? E contesta ta masha cla den Beibel, ma mi no ta bisa cu e ta facil, pasoba e no ta.
Uno di prome obstaculonan ta: nos naturalesa pecaminoso. Nos tur, pues cada uno di nos ta nace for di barica di nos mama, cu e naturalesa di pica. Y segun cu nos ta crece nos lo experimenta esey mas y mas. Te asta si nos mayornan ta berdadero keredornan den nos Señor JesuCristo, y cu nan nomber ta scirbi den e buki di bida; ainda nos nan yiunan lo nace cu e naturalesa di pica. Mi sabi cu e declaracionnan aki ta hopi pisa, pero tuma bo Beibel y lesa pa bo por comprende. Tambe bo por scirbi nos na e direccion cu nos ta scirbi na final di cada mensahe.

Un otro obstaculo, ker’e of no ta; religion. Religion ta un sistema religioso den cual e persona por pone su confiansa, y ta spera cu despues di su morto su religion lo sirbi manera un passport pa drenta Reino di Cielo. E siñansa ey no ta existi den Beibel, pero sinembargo multitudanan den henter mundo ta confia cu un dia nan religion ta nan salbacion. Pa e autoridad di e Palabra di Dios mi por bisa cu tur respet pa tur e almanan precioso aki den Antiya Hulandes y Aruba; cu e enemigo principal di humanidad cu yama e diabel y satanas, no tin problema cu religion; pero si cu e Evangelio di gracia di Dios cu ta ser proclama den henter mundo na tur nacion prome cu e fin yega. E Evangelio no ta un religion, sino e bon noticia di pordon y bida eterno mediante repentimento pa nos picanan y fe den nos Señor Jesus, Kende a muri y resucita pa nos, pa cada uno di nos. Pero ta nos mes personalmente mester repenti di pica y ricibi E como nos unico Salbador personal. Ningun otro ser humano por haci esey pa nos.

Un otro obstaculo masha peligroso ta, negligencia of tardansa y posponementu. Nos a mira caba tocante dos obstaculo cu ta stroba nos di kere e Evangelio di gracia di Dios, cual ta e unico medio dor di cual nos nomber por ser haya den e buki di bida di e Lamchi. (Rebelacion 13:8). Pero lesa, por fabor, e capitulo 13 completo.
Nos a menciona e naturalesa di pica, pasobra masha masha hopi hende, homber y mohe, adulto y hoben, ta cai pa e pensamento cu ora un persona kere e Evangelio, e no por gosa bida mas, etc., etc. E manera di pensa ey ta un gran mintira, y e ta bini dor di e Maligno via nos naturalesa di pica. Hebreonan 11:24-26 ta bisa nos lo siguiente: "Pa medio di fe Moises, ora cu el a crece bira grandi, a nenga di wordo yama yiu di Farao su yiu mohe, scohiendo mas mihor pa sufri maltrato hunto cu e puebel di Dios, cu di goso di e placernan pasahero di pica, considerando e reproche di Cristo como rikesanan mas grandi cu e tesoronan di Egipto, pasobra e tabata mira padilanti na su recompensa." Tambe nos a mencion Religion como obstaculo pa kere e Evangelio. Por ultimo un otro obstaculo cu Satanas y e sistema di mundo y e carni di pica ta usa ta: Awor no, mas despues.

Amigonan, e decision ey ta resulta den perdicion eterno di multitudnan, pasobra mas tanto e despues ey, nunca ta yega. Segun Scritura, Awe y awor ta e tempo aceptabel, awe ta e dia di Salbacion. Lesa 2 Cor. 6:1,2 y 14-18
Scirbi y prepara pa Bicento y Betty Henriques, Washington 23A, Aruba
Scirbi nos libremente na e direccion aki:
Bicento & Betty Henriques,
Washington 23A, Aruba.
Tambe por yama nos na: (297) 587-7472

E DIA DI HUICIO

2008-06-04T14:26:00.000-07:00

Nos tabatin dos mensahe tocante e tempo di cosecha, y awe nos mensahe ta bai tocante e Dia di Huicio cu por wordo yama tambe, e dia ultimo huicio, of e huicio final. Con cu nos yam’e, e dia ey lo yega sigur net manera cu e ta scirbi den Scritura Santo na varios luga. Segun Scritura, e personanan cu a muri den nan pica, lo wordo tira den e tanki di candela cu ta wordo yama tambe: "E di dos morto." Lesa pa fabor den e buki di Rebelacion 20: 11-15 y 21:1-8. Lesa e porcionnan ey cu tur reverencia, y nos ta conseha bo pa pidi na Señor pa E yuda bo comprende y pa bo obedece e yamada di Dios cu ta na tur hende den e Scrituranan ey. Sea sigur pa lesa nan. Sea sigur cu si te awe nunca bo a repenti di bo picanan, y kere di curason den Esun cu a carga nos picanan den Su curpa ariba e crus; cu bo ta inclui den e yamada di e Señor di Cosecha den e porcion di Scritura aki unda E ta bisa: "Ta cumpli. Ami ta e Alfa, y e Omega, e principio y e fin. Y esun cu tin sed, lo Mi dun’e di bebe for di e fuente di awa di bida, pornada, " etc., etc.

Amigonan, kendenan Dios ta stima cu un amor inexplicabel, ta awe y ta awor ta e tempo aceptabel, ta awe ta e dia di salbacion. Si bo a tende Su bos awe, no hasi bo curason duro. Uno di e bendicionnan increibel cu ta scirbi den Beibel ta esaki. Nos no mester spera pa e huicio ey di Dios, bibando dia tras dia un bida sin speransa, of ta confia ariba un speransa falso cu ta bini dor di siñadornan falso cu ta plama den henter mundo. Nos por scapa e huicio final ey cu lo ta e huicio di condenacion, awe y awor mes.

Bo lo puntra: Con esey por ta posibel? Con ami por scapa e huicio ey di condenacion? E contesta ta cla y sigur den bo Beibel, pasobra nos ta confia cu bo tin uno y cu bo ta les’e.
Hopi hende na Antiyas tin un Beibel, pero masha poco, of nunca ta habri e pa nan les’e of scucha kico Dios ta bisa nos den Scritura. Beibel ta bisa nos masha cla mes, cu fe ta bini dor di tendemento y tendemento pa medio di e Palabra di Cristo. (Romanonan 10:17) Aki e palabra di Cristo ta nifica e mensahe tocante Cristo (compara e versiculo 16) Y e mensahe tocante Cristo ta e Evangelio, of e bon noticia tocante Cristo. Y e bon noticia ey ta loke nos ta presenta na prome lugar den tur nos mensahenan. Nos ta combida cada uno cu tin e hamber y set di husticia den e intimo di bo spirito, pa bo habri bo curason na Señor Su mes; y manera cu El a bisa den un ocacion: "Tur loke e Tata duna Mi lo bin serca Mi, y esun cu bini serca Mi lo Mi no tira afo di ningun manera."

Awor lo mi bolbe na e declaracion cu mi a hasi tocante con nos por scapa di e huicio di condenacion awe mes, Scucha e palabranan aki di Señor cu El a laga pa nos tur. "Di berdad, di berdad, Mi ta bisa boso, esun cu tende Mi palabra y kere Esun cu a manda Mi tin bida eterno, y no ta bin na huicio, ma a pasa for di morto na bida. Di berdad, di berdad Mi ta bisa boso, e ora lo yega, y ta awor, cu e mortonan lo tende e bos di e Yiu di Dios y esunnan cu tende lo biba." (Juan 5:24,25)

Ma un hende lo puntra: Con mortonan por tende e bos di e Yiu di Dios awe? E contesta ta den Scritura cu nos ta yama Beibel. Den e buki di Efesionann capitulo dos cuminsando cu vers uno nos por lesa loke e Apostel Pablo a scirbi na e hendenan di Efesio cu a kere e mes Evangelio cu nos ta proclama awe bisando: "Y boso tabata morto den boso delitonan y picanan, den cualnan boso tabata camna antes segun e curso di e mundo aki, segun e prins di e poder di laira, di e spirito cu ta obra awor den e yiunan di desobediencia. Nos tur tambe tabata biba antes meimei di nan den e pashonnan di carni y di mente y tabata yiunan di rabia, mescos cu e otronan. Ma Dios, Kende ta rico den misericordia a duna nos bida hunto cu Cristo, asta tempo cu nos tabata morto den transgrescionnan, ta pa graci boso a wordo salba. Y Dios a resucita nos hunto cu Cristo", etc., etc.

Tuma bo Beibel y lesa e capitulo dos di Efesionnan completo. Pero no bai pura, lesa cu calma y permiti pa e Spirito Santo di Dios obra den bo curason, anto obedece y pone bo fe den e yiu di Dios, Kende a stima nos, y a entrega Su mes pa nos picanan.

Amigonan stima pa Dios, scucha kico e Palabra ta bisa nos den Romanonan 8:1 "P’esey cu awor no tin condenacion mas pa esunnan cu ta den Cristo Jesus. Pasobra e ley di e Spirito di bida den Cristo Jesus a hasi mi liber di e ley di pica y di morto. Pasobra loke e ley no por a haci, pa motibo cu e tabata debil dor di e carni, Dios a hasi, mandando Su mes Yiu den e semehansa di hende pecaminoso, como un ofrenda pa pica. Y asina El a condena pica den hende pecaminoso, pa e demánda husto di e ley por wordo cumpli completamente den nos, cu no ta biba segun e naturalesa pecaminoso ma segun e Spirito."

Pa mas di esaki, lesa e capitulo ocho completo di Romanonan, pidiendo Señor na e mes un tempo pa Su guiansa y yudansa. Nos lo continua cu e tema aki den un otro mensahe.
Bicento y Betty Henriquez, Washington 23A, Aruba

PS Si bo a lesa e mensahe aki, tuma un momento pa scirbi nos un email y laga nos sabi esey! Ki un bendicion esey lo ta pa nos, y alabes un afirmacion. bbhenriquez@setarnet.aw